«Толягай, та тынад нылыд!»

Сырья гурт, мукет гуртъёс сямен ик, ас калыкеныз данъяське. Кин ке колхозын яке мукет удысын азинлыко тыршеменыз данэ потэ, соин валче гуртлэн нимыз но шараяське, кин ке киужъёслы усто, кин ке спорт удысын кужмо, кин ке ӟеч мылкыдыныз калыкез бордаз кыске.

Мадён ужпуме — Инмарен сётэм эмъяськон ӧнеренызы данъяськем гуртоосме югдытон. Бен, вань сыӵе Адямиос. Героелэн валэктэмезъя, Ин+Куазьлэн сётэм шӧдонлыкез вылэ нырысь ик ватсаны кулэ аслэсьтыд кулэ карондэ. Озьы гинэ пӧрмоз тынэсьтыд эмчи яке мукет ӧнерчи. Паймыто сыӵе адямиос: пӧртэм висёнъёсты эмъяло — укол карытэк, таблетка сюдытэк, сыласькыса, кыл вераса, висёнэз тӧлӟыто. Со пелляськон кыллы скал но «оске», озьы ноныысьтыз легезез куасьме. Син усьыса кулыны выдэм пудо-живот лулъяське. Туала медицина туж кужмо ини шуыса тодӥськомы. Кужмо ке но, калык эмчиослэн быгатонлыкъёсазы тубыса ӧз вуы на со. Кылсярысь, вир кыллэсь но мукет сыӵе макеослэсь кужымзэ валэктыны туала наука уг быгаты на кадь… Со ӧрысь ик история: «Корка котыраз ужакуз, ачиз адӟымтэ дыръя, миндэр улаз поныса кельто, пе, вал жугиськонэ кошкем пизылэсь я картсылэсь чыры-пыры дӥськутсэ, я мукет марзэ ке. Берен ӵукнаяз лыкто юаны, мар вӧтад шуыса. Одно ик со муртэ, пе, адӟе вылэм: я сӧсырмемен, я ожмаськемен, я гожтэт адӟе». Эшшо одӥг учыр: «Нуназе изись маке, вӧтаса черекъя: «Валъёс, валъёс, картаккаез лёгало!» Дораз мынӥ — изе, синмыз чимамын. Копей бакча пала картка бакчаез учкыны бызьыса кошки. Ньыль валъёс бакча шорын ик посмыллясько ук!» Данлы экстрасенсмылэсь нимзэ тододы, кылдэм ке, Инмар сётӥз ке, «Сэрья гуртэ — Вордскем шаере» книгаысь.

«Массажист планетарного масштаба» — тазьы нимасал мон эмчи-герое сярысь ӟуч кылэ берыктэм веросме. «Ӵукае Америкае лобисько, нылы отын улэ, пе», — шараям сыласькыны лыктэм Казаньлэн азьвыл мэрезлэн нылыз. Я, бен, ойдолэ тодматскоме асэныз эмчиен.

Чернов Анатолий Максимович вордскиз 12 феврале 1939 арын Сырья гуртын. Атаез Чернов Максим Степанович (1913 - 4.04.1945) «курегпузысь ӵогиськем папапизэ» мусояса вуиз-а, ӧз-а, дыр, финнъёсын ожмаськонэ кошкиз. Отын сӧсырмыса, бурмыса вуиз-а, ӧз-а, Быдӟым оже кошкиз. Быриз Польшаез мозмытыкузы, ватэмын Гданьск воеводствоысь Рюкфорт городын. Анаез — Чернова Пелагея Павловна  вордскемын 1913-тӥ арын Удмурт Лӧзя (Б.Лызи 2 люкет) гуртын Бак-бак (Кумаевъёс) выжыын. Семьяязы кык пиос будо: Петыр агаез но Толягай ачиз — куинетӥ нылпи. Зоя апайзы 1937 арын куинь аресэн, висьыса кулэм. Быдӟым ожен сэрен пал бурдо кылем Палӥ апай, 1953 арын кык пиосыныз яна потэ. Со дырысен Пильмон Толялэн нимыз Палӥ Толялы пӧрмытске. Та кушем ним Толягайлэн нылпиосызлы но пыӵа. Анаез выжые мынэм: мугорызъя пичи, выросэзъя чупрес луэмысьтыз, 1990-тӥ аръёсы Толягайлы, кинлэн ке капчи кылыныз, «Песьтэр» ним лякиське. Дораз улӥсь пиез но со дырысен кык нимын улэ: Палӥ Коля но Песьтэр Коля.

Ципьяысь удмурт шоръёзо школаын 7 класс дышетскемез бере, анаез висемысь, Анатолий ужаны кутске. Нунал куспатыса, валэн Шеморданэ ветлэ. Мыныкузы татысь каб, буш ящикъёс, чыры-пыры макеос нуыса мыно, бертыкузы сылал, майтал, керосин но мукет вузъёс ваё Ципья сельпое. 1960 арын армие мынэ. Куинь ар Азербайджанын служить каре, Астара кар дорысь Иран кунгожез уте. Армиысь бертэмез бере, Хакимов С. предколхоз сое Урняке шофёрлы дышетскыны лэзе. 1964 арын шофёрлы право басьтыса бертэ но Газ-51 машинае пуксе. Кӧня ке ужамез бере, колхозэ ДТ-74 гусеничной трактор бертэ.

— Хакимов нош мериське: «Анатолий, тракторист ӧвӧл, трактор бертӥз, давай тракторе пуксьы!». «Бен, — мон шуисько, — правое ӧвӧл ук мынам». Бусые, право, пе, кулэ ӧвӧл! Озьы шофёрысь потыса, тракторист луи, — маде улонзэ Толягай. — Пильмон Колялэн помошникез луыса ужай. Таре ходовоез быдмиз. Азьло сыӵе закон вал: запчасть уг сёто, трактордэ нуиськод, со интые выль трактор сёто. Нурма СХТ-е нуыса мынӥмы, аслым юлтош Бечей Сандырез басьтӥ. Мыныса вуим но мон шуисько вот озьы. Завскладзы, Нурма бигер пи шуэ: «Малы вайиды ини та выль макеез?» «Эске, — шуисько мон, — давай милемлы запчасть, тае нуыса бертӥськом». «Уг лу, озьы не положено», — шуэ со. Озьы тӥни отысь выль тракторен бертӥмы. Таиныз дядяеныд — Асан Митреен — ӵош ужамы.

Тракторе пуксемез дырысен арлы быдэ Кировское я Марийское нюлэс кораны, нюлэс нуллыны ветлӥз. Сӥзьыл кынтэм бере тракторъёс кошко, тулыс берто. Арлэсь ӝынызэ шуымон отын улӥзы, толэзьлы огпол я кык пол мунчое пырыны бертылӥзы. Тани соослэн вунонтэм нюлэс корам «курорто шаерзы»: Алинер, Захватово, Димитровка, Доноурово, Константиновка, Крупино, Пиштанка, Плотбище, Шоба… Улӥзы соос отын оген улӥсь ӟуч я пор кышно дорын патерын. Сиён пӧзьтылӥзы кузё кышноос ик. Со понна патер кузёлы колхоз, азьвыл вераськемъя, уждун тыриз. Нюлэс погыръязы тракторист но солэн «помошникез» — 1975-тӥ арозь шуымон киын бичкыен, отияз — «дружбаен». 1980 арын Толягаез нюлэс кыскась трелировочной тракторе пукто. Азьвыл аръёсы погыръям писпуоссэс валэн кысказы ке, табере ужзы трослы капчиёмиз.

— Огвадес Яким урдсын пилорамын ужаку, Кумай Алик Паву Коляен капка выжые вуыса: «Тани, Толягай, Т-16 трактор вайим, ужалод-а?», — шуыса юало. Ӵукнаяз предколхоз Чернов П.Г. но: «Васькы, тани выль трактор, ужаськод-а?», — шуэ. Ужасько, шуи мон. 13 ар соин ужаса пенсие потӥ, — веранзэ азьланьтэ Толягай.

Кызь вить аресаз вуэм ӟыгыт гуртысь Макар Онсялэн нылызлы — Макар Анналы кызынэ. 1964 арын Октябрь праздник дыръя сюан каро. Котьмар ужлы провор луэм кен Палӥ апайлэсь улон югдурзэ капчиятэ, шулдыртэ. Улэм-вылэмъя нылпиоссы вордско: Рита, Миша, Коля. 1974 арын вӧл-вӧл бадӟым корка пукто. Аннапай кен луыса лыктэмез дырысен 1986 арозь — скал фермалэн липетэз куашкатозь — скал кыскиз. Азьмынӥсьёс радын ветлэмез пӧртэм наградаосын пусъемын. Собере пенсие потытозяз амбарын ужаз. Кузпалъёс кыкназы но асьык мылкыдоесь, кыллы ӧткынэсь, мылкыд кенжытыны устоесь — сюанъёсын, турлы юондыръёсын соос котьку но тӧршорын ветлэмын, шоразы учкыса мылкыдъёс ӝутскылӥзы. Доразы кылиз покчи пизы — Николай Анатольевич, ООО «Труд»-ын бригадирын ужа, кузпалэз Ципья шоръёзо школаын удмурт кылъя но литературая дышетӥсь Ираида Анатольевна, Эшкей выжыысь Ципья ныл. Улон нюжазэс азинтӥсь осконо пизы но кензы анай-атайзэс Артём но Вероника муспотон нунокъёсын шумпотто, озьы выжызэс азьланьто. Нылзы Маргарита Анатольевна, бызиз Вукогуртэ Кузнецов Павел Васильевич ветврачлы. Кӧня ке ар Ципья шоръёзо школаын дышетэмез бере, егит кузпалъёс Мамадыше шонско. 2022 арозь отын ужаса, выльысь Вукогуртазы, атай юртазы бертыса пыризы.

Толягайлы но Аннапайлы улон-вылон гумыразы кезьытсэ но пӧсьсэ но чиданы тупа… 2010 арын Миша пизы улонысь кошкиз, 2016 арын юртъерзы: гид-мунчо-лапасъёссы, вуж корказы ӝуаз. Котырысь калык юрттэмен но асьсэос тыршемен котыр выльдӥськизы. 2019 арын Аннапай улонысь кошкиз. Пал бурдо кылем Толягай уг чигиськы, пиезлэн, кенэзлэн, внукъёсызлэн ӟеч мылкыдъёссы шунто сое. Ачиз но Толягай внукъёсызлы будыны-ӝутскыны весь юрттыса улэ. Та семьялэсь Дӥнь-Выжызэ — Толягаез — ӟечкылаломе на прадедушка луэменыз! Пумтэм-йылтэм мед вӧлмоз, Толягай, выжыед!

Леонид Сапожников

(Азьланьтонэз вань)