«Толягай, та тынад нылыд!» (2-тӥ люкет)

Суй-пыд пуктыны, кӧт сыланы дыши Ион Семонлэсь

— Толягай, кызьы дышид суй-пыд пуктыны?

— Парсь фермаын кочегарить кариськом вал. Таре бертӥ но, берен ӵукна пыдъёсы тӧрналлям. Мар луэм, дыр? Таре Ион Семон агай доры мынӥ. Семон агай, тани мынам, шуисько мон, пыдес вырӟем-а, мар-а? Таид кырма. Вӧсь луэ, шуисько мон, мазед ӧвӧл-а ма? Мунчо укно йылаз ик мазез вань вылэм, конгыртыса басьтӥз но, мазьзэ зыраз но пуктӥз. Мон кызьы мар каремзэ йырам басьтӥ.

— Кӧт сыланы ку, кызьы дышетскид?

— Турын люкаськом вал валэн, ӵошатскыса нуллӥськом вал. Мон актыксэ вайи но, дыртыса, валэз берыктӥ, ӟуген маин, кӧтын ӝутӥськем вал, кӧтэз вырӟытӥ. Нош мынӥ Семон агай доры. Мынӥ но, Семон агай, шуисько, тани кӧт вырӟиз. Тожо кӧтэз сылаз. Кызьы сыламзэ учкыса улӥ. Со бордысен кошкиз сэре.

— Толягай, кин вал самой первой юрттэт курисед?

— Артём, асьме пимы, пичи маке. Куро кабанэ тубыса шудӥллям. Отысь нискылтыса васькыкуз, гырпумзэ вырӟытэм.

— Кыӵе гуртъёсысь вуылӥзы ини тон доры суй-пыд пуктылыны?

— Кукмор палъёс уно ветлӥзы ини, Кировский, Марийской палъёс. Балтач сопалась Ярак-Чурма палъёс, Кугунуръёс но таляк ветлӥзы ини, Кизнерысь но огез вуиз…

Ымныртӥ ву вия

— Огвадес Кукморысь бигер кышно лыктӥз <…>.  Кунянэз доры мыныкуз, мӧйы мурт ини со, 40-45 арес маке, вольтчыса усьыса нюк пыдэсэ вуытозь бергаса васькем. Больницае, пе, понӥзы. Укол сёто, таблетка, укол. Массаж кулэ, пе, шуисько. Массаж карись, пе, ӧвӧл. Отын Кукморын тодо вал ини беда уно мурт. Соос татчы лэзиллям мон доры. <…>. Кык час но ӝыны массаж кари мон сое. <…>. Жадиськиз. <…>. Ымныртӥ ву вия. Сэре больше уг лу ини, шуи мон, вырӟы. Вырӟиз. Мон шуисько, давай ветлыса утьы. Ветлыса утиз. Всё, пе, луиз.

— Нош солэн мар луэм вал?

— Позвночникезлэн дискъёсыз быдэсак интыысьтыз вырӟиллям.

— Эске вырӟем сюрлыез но интыяз пуктыны быгатӥськод?

— Массаж карисько позвоночникез но, олокӧня муртлэсь кари ини. <…>.

«Толягай, ми витьсэ вайим ини!»

— Кӧня муртлэсь тазалыксэ тупатӥд ини, лыдъямед вань-а?

— Ӧвӧл. Тани 3-4 ар, дыр, ини со. Одӥг нуналэ 7 муртэ принимать кари. Черодэн витизы, сомында мурт вал.

— Эскеее, одӥг нуналэ 7 муртэ! Больницаын врач но куд ке дыръя сомында уг кары, дыр!

— Сэре тани картэн-кышноос лыктӥзы, кӧтсы вырӟем. Азьло картэзлэсь сылай. Таре кышноезлэсь сылай но со шуэ: «Толягай, тодӥськод-а мар?» Мон шуисько: «Мар?» Мон, пе, УЗИ-е мынӥ. Ми, пе, нылпи вайыны ум быгатӥське. Кык нылпи, пе, вайим, больше вайыны, пе, уг лу. Врач, пе, вераз: «Тынад маткаед куашкам, больше нылпи вайыны уд быгатэ». Вот мериськиз: давай, пе, массаж кар. Таре массаж кари, кык толэзьскын картэз звонить каре: Толягай, пе, кышно секыто. Ныл вайиз соку. Тӥни со массаж бере нош куинь нылпи вайиз али. Таре со куинетӥзэ ваем бераз куинь-а ньыль-а толэзьскын нош кӧтсэ вырӟытэм. Нош лыктӥз, сьӧраз пичи нылзэ ваем. Пырыкуз ик, Толягай, тани, пе, та тынад нылыд ини! Ми, пе, витьсэ вайим ини, шуэ. <…>.

Пульсэд вобше уг ужа ук!

— Толягай, кӧт вырӟон куинь турлы луэ шуид…

— Озьы, а-а, ог турлыяз — кӧт тордэ, мукетаз — сиыны уг лу, ӧсытэ, куинетӥез — сӥтяськытэ.

— Кӧт вырӟем шуыса кызьы тодӥськод?

— Вырӟымтэ кӧтлэн пульсэз гогы шорын луэ. Вырӟиз ке, улэ ваське я палэнэ кошке. <…>.

Р.S: Кызь ар люкаське ни Толягайлэн эмъяськон удысысь стажез. Кызьы валамы, со суй-пыд пуктӥсь но кӧт сылась гинэ ӧвӧл, солэн шӧдон-валанэз, быгатонлыкез трослы паськытгес. Медицинской ВУЗ-ын дышетскысал ке, я эмъяськон удысын ке ужасал, яке ӧжыт ке но шӧдон-валанэ ке луысал, мон ачим Толягай доры дун тӧляса дышетскыны ветлысал! Газетэ сётэм веросмы, Толягайлэн мадемезлэн вакчиятыса сётэм пичи люкетэз гинэ луэ. Пумиськонъёсамы гожъям аудио но видео веросъёсыныз быдэсэн тодматскыны луоз, кылдэм ке, вылӥын верам выль книгаын.

Леонид Сапожников,

Сырья гуртысь клубен кивалтӥсь