Хезмәт

Балтач районы

18+
2024 - Гаилә елы
Азьлане

«Трактор сӧриськыку гинэ ужме уг яратӥськы», — серекъя Владислав Петров

Та нуналъёсы «Яна тормыш» обществоысь механизаторъёсын тодматскыны удалтӥз. Та дырозь пӧртэм гуртъёсысь механизаторъёсын вераськеме вал ни ке но, Кушкетъёс тужгес шумпоттӥзы.

Огшорыесь, вераськисесь, серем поттӥсесь. Мон понна валантэм луись кылъёсты, техникаослэсь нимъёссэс гинэ но серекъятэк, валамон мед луоз шуыса пыр-поч карыса валэктӥзы. Нырысетӥез механизатор, кудӥныз мон тодматски, луиз Владислав Александрович Петров.   

«Яна тормыш» обществоысь механизатор Владислав Александрович редакциын трос аръёс ӵоже ужам Александр Сергеевич Петровлэн пиез вылэм (Александр Сергеевич, та чуръёсты лыдӟиськоды ке, милесьтым тӥледлы пӧсь салам).

— Мон пичи дырысеным техника борды кыстӥськи. Бусыын ужась трактористъёс шоры закыраса учкисько вал. Соос сьӧрысь кыльытэк, сьӧразы ветлэмме али но тодӥсько. Трактористъёс но ведь милемыз, кӧня ке аресъем пиосыз, кабинаязы пуктыса ветлыто вал, ӧз уллялэ. «Та пичиослы мар кылем татын» шуыса малпаськиллям, дыр, ни асьсэ понна..., — серекъя Владислав Александрович, асэныз тодматыса. — Бадӟым будэмея но техникалы яратонэ ӧз кысы — агае, Борис, комбайнэн ужакуз, солэн юрттӥсез луыса ужаны ветлӥ.

Гурт удысэз сокем матын карем ке но, Покчи Лӧзя гуртысь школаез йылпумъямез бере дышетсконзэ азинтыны мылкыдыз бадӟым луэм егит пилэн. Но, жаляса верано, та малпанэзлы быдэсмыны кылдымтэ. 1994-тӥ арын школазэ йылпумъямез бере Владислав «Алга» колхозэ пӧртэм ужъёсты быдэсъясь луыса ужаны интыяське (школаын дышетскыкуз ик тракторен ветлон понна праволы но дышетскем). Кӧня ке ужамез бере, 1995-тӥ арын, арми радъёсы басьтӥське.

— Кык ар Хабаровск улосын служить карыса, вордскем гуртам бертӥ но нош «Алга» колхозэ ужаны интыяськи. Соку ужам кивалтӥсьлэсь, Раиф Гильмуллинлэсь, трактор кури. Со отказать ӧз кары. Али гинэ ужаны кутскем бере, выль техника ӧз оске ке но, вуж МТЗ-80 трактор мынам луиз. Соин ужай, — егит дырзэ тодаз вайыса вера Владислав Александрович.

Ньыль ар ужамез бере, 2002-тӥ арын механизатор Кушкетэ выже — кузпалэзлэн, Алевтиналэн, вордскем гуртаз. Владислав Александрович «Яна тормыш» обществое ужаны интыяське. Со дырысен Владислав Александрович татын ужа ини. Гусеничной «ДТ-75», ЮМЗ, Т-150 тракторъёсын тырше, котькуд техникаен умой ужаны быгатэ. 2013-тӥ арысен ини опыто механизаторлы выль МТЗ-1221 тракторез оско.

— Кыӵе гинэ техникаен медаз ужа, арлэн котькуд дыраз механизаторлэн ужез тырмыт. Гужемзэ, валамон, лумбыт бусыын луиськомы. Нышырлы но бусыын сюдо. Сенаж нуллӥськомы, кизьыны музъемез дасяськомы — нокыӵе ужъёслэсь палэнэ ум кылиське. Али тани бусыосты гырыны потӥськомы ини. Толалтэзэ мон бульдозерен ужасько, ферма, амбар котыръёсысь лымыез утялтӥсько. Тулыс, бусыосысь лымы шунам бере, удобрениосты пазясько. Кизён дыръя но салляськыса пукыны дырмы ӧвӧл. Сётэм ужлы шумпотыса ужаськомы, — валэктэ ужан радзэ механизатор.

Уждэс яратӥськоды-а шуэм юанлы но серекъяса таӵе ответ сётӥз Владислав Александрович: «Тракторын пукыса ужаны туж умой. Трактор сӧриськыку гинэ ужме уг яратӥськы».

Ма, сӧриськыку кин яратоз? Мон но куддыръя серем юанъёс сётъясько ни интервью басьтоно адямиослы. Собере малпасько: малы сыӵе йӧнтэм юанъёс сётъясько, кызьы бен уз яраты механизатор аслэсьтыз ужзэ? Гуртын будэм пиос ведь азьло тросэз техника борды, музъем борды кыстӥськиллям, малы ке шуоно механизаторлэн ужез азьло дырысен гуртын тужгес гажамон ужъёслэн одӥгез луэм. Владислав Александрович но та кылъёсме зэматыса вераз: «Ми егит дыръя техникаен ужасьёс гажамон вал. Туннэ котькинлэн шуымон хозяйствояз машинаез, кинлэн ке тракторез но вань. Азьло трос адямиос вазиськыло вал юрттэт курыса. Гуртын ведь я соиз, я таиз кулэ луэ — трактор кулэ луэ, аслад ӧвӧл бере, механизаторъёслы вазиськоно. Соин но, дыр, та уж борды туж кыстӥськимы. Анай-атайлы но, гуртоослы но юрттыны быгатомы шуыса малпаськимы».

Кыстӥськем но ужез борды — кошкыны быгатымтэ ни. Ассэ городын улӥсен син азяз пуктыны уг быгаты Владислав Александрович. Солэн вань улонэз — гуртын. Кышноез Алевтина но «Яна тормыш» обществоысь кладовщица луыса ужа. Туннэ нуналэ соослэн куинь нылпиоссы будо. Денис пизы Арчаысь педагогикая колледжын дышетске, Лилана нылзы школаын дышетске, Ратмир пизы садике ветлэ. Нош ачиз Владислав Петров — «Яна тормыш» обществоысь адӟем карымон механизатор.

— Школаын басьтэм ӧнере мыным улонын интыяськыны юрттӥз, — шуэ со. — Мон малпасько, школаын тракторен ветлон праволы дышетонэз азинтыны кулэ. Малы ке шуоно гурт удыслы яратон мылкыдэз школаысен пыӵатоно. Егитъёслэн гуртэ туж ик кылемзы уг поты. Сыӵе дышетсконъёс луысалзы ке, оло, кин тодэ, егитъёслэн тунсыкъяськонзы луысал.

Владислав Александрович, зэмзэ но, гуртлэн вуоноез понна сюлмаське. Егитъёслэн гуртэ кыльымтэзы туннэ нуналэ шӧдскымон бадӟым проблема луэ шуыса валаськомы. Соин обществое ужаны лыктэм котькуд механизаторлы со ваньмыз ласянь юрттыны дась. Кылсярысь, туннэ нуналэ «Яна тормышын» егит, бадӟым осконъёс сётӥсь Антон Павлов ужа вылэм. Солэсь, пе, тракторист пӧрмытыны тыршиськомы. Мукет ужасьёсынызы но кусыпъёссы туж умой, шӧдске. Коллектив эшлыко, татын котькин котькудӥзлы юрттыны дась. Кинлэн ке техникаез сӧриськем-а, кыӵе ке визь-кенеш кулэ-а — опыто механизаторъёс Владимир Карабаев, Сергей Щербаков (нялтас вераса, соосын газетлэн вуоно номеръёсазы тодматскыны быгатоды — Н. Ж.) юрттэт кизэс сёто. «Кӧня ар ужад ке но, ноку ваньзэ тодыса вуттыны уг луы. Соин валче ужась эшъёсылы вазиськыны тупа. Соос ноку но отказать уг каро, юртто. Кушкетысь механизаторъёс сярысь гинэ верам кылъёс ӧвӧл та, Янгулысь бигер эшъёсмы но котьку юрттыны дась», — шуэ Владислав Александрович. — Ужын но, семьяын но — котькытын — тонэ валазы ке, юрттэт кизэс сётӥзы ке, ваньмыз умой пишме».

Та ласянь Владислав Александрович ассэ шудо адями шуыны быгатэ.  Ужаз — радлык, семьяяз — каньыллык. Шудо улон понна солы нош мар кулэ на?

 

 

    

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

3

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: адӟем карымон механизатор

2
X