Удмурт лулчеберетлы сӥзем конкурслэн гала-концертэз ортчиз

Конкурс удмурт калык лулчеберетэз утён, вӧлмытон но популяризировать карон вылысь радъямын вал

Балтасьысь клубъёслэн огъям сӧзнэтсы Ципья гуртысь Лулчеберетъя юртын «Вордскем пал крезьгуръёс» («Родные мотивы») шуыса нимаськись ёрос масштабен удмурт лулчеберетлы сӥзем конкурсэз радъяз шуыса гожтӥськеммы вал ини. Конкурс удмурт калык лулчеберетэз утён, вӧлмытон но популяризировать карон вылысь радъямын вал.

15-тӥ толсуре конкурслэн гала-концертэз ортчиз. Отчы жюриен быръем ансамбльёс но гуртъёсысь самодеятельной артистъёс пыриськизы. Со сяна, гала-концертэ куноос луыса вуизы Мари-Турек ёросысь Карлыган гуртысь «Ӟардон» но Кукмор ёросысь Нырья гуртысь «Сактон» фольклор ансамбльёс но. Концертъёслэсь кылдэм мылкыдъёсынымы тӥледын но вошъяськеммы потэ. 

Концертъёслэн кыкез но (зональной этапез но, гала-концертэз но) вылӥ уровеньын ортчиз шуыса пусйыны кулэ. Артистъёс рос-прос дасяськиллям, пӧртэм тунсыко кырӟанъёс но эктонъёс дасяллям вал. Нырысь ик пусъеме потэ Вукогуртысь «Меленка» ансамблез. Ужрадысь ужрадэ, концертысь концертэ учкисьёсты чебересь номеръёсынызы, выль артистъёсынызы шумпотто соос. Ушъямон! «Сырья зоутъёс» ӵемысь сцена вылын вашкала зоутъёсты быдэстэменызы паймыто. Ансамбльысь самодеятельной артистъёслэсь выступленизэс Николай Плотниковлэн кубызэн шудэмез аспӧртэмлыко каре, выль шӧм пыртэ. Та кык коллективъёс но улэп крезьгур улсын выступать каременызы шумпоттӥзы. Ӟаныысь «Шулдыр ӝыт» ансамбльысь коллективлы учкисьёс кичабонъёссэс ӧз жалялэ. Соос но калыкез кырӟанэнызы но эктонэнызы шумпоттӥзы. Асьсэос чебересь, ымныръёсысьтызы пальпотон ӧз быры. «Марӟан» ансамбльысь (Вуж Турья гурт) чебер кышномуртъёс но умой дасяськыса лыктӥллям вал. Коллективысь арлыдо кышномуртъёс но, егитъёс но быгатыса кырӟало. Сценаын асьсэды бадӟым опытэн артистъёс кадь возё. Покчи Лӧзя гуртлэн «Вуюись» ансамбльысьтыз артистъёс тунсыко эктонэнызы калыкез шулдыртӥзы. Татчы, Ципьяысь «Зангари» ансамбле кадь ик, мукет калыкъёсысь мылкыд карисьёс но пырисько. Удмурт эктонъёсты но быдэсто, удмурт сямен кырӟаны но усто соос. Вуж Кушкетысь «Чибориё» ансамбль эктон но кырӟан дасям вал. Шӧдске, коллектив выльдӥське но татын егит артистъёслэн лыдзы будэ шуыса. Та шумпоттэ. Но егитъёсын радэ коллективын азьло дырысен ветлӥсьёсыз но вань. Карек-Сермаос но туж шумпоттӥзы. «Ингур» коллективазы пыриськись егитъёс эктонзэс кузьмазы, со сяна, агаен-вынъёс Игорь но Яков Игнатьевъёс кырӟанъёссэс быдэстӥзы, егит мызганчи Иванов Алексей но мызганэн гуръёссэ быдэстӥз. Учкисьёслы туж кельшиз. Егитъёс пӧлысь пусйыны луэ Балтасьысь «Мылкыд» триоез но. Куинь нылъёс чебер удмурт кылын кырӟанэз быдэстӥзы. Асьсэ понна кырӟась артистъёс пӧлын вань вал сценаын кема аръёс ӵоже выступать карисьёс но (Покчи Лӧзяысь Любовь Конькина, Рамзия Васильева, Ципьяысь Лариса Тарасова, Евгения Михайлова, Николай Фёдоров, Вуж Кушкетысь Юлия Щербакова, Бадзым Лӧзя II люкетысь Виталий Фёдоров, Балтасьысь Рустам Хасанов но Альмира Филиппова, Юрий Кунаев озьы ик егит, но асьсэды сцена вылын ини утем артистъёс но (Карек-Сермаысь Игорь но Яков Игнатьевъёс, Алексей Иванов, Ӟаныысь Дина Михайлова, Роман Павлов, Вукогуртысь Римма Кузнецова, Ципьяысь Антон Никитин). Шумпотымон, ваньзы соос — егитъёсыз но, арлыдоосыз но —  сцена вылын асьсэды быгатыса но усто возьматӥзы.

Вылӥын верам коллективъёс, самодеятельной артистъёс ваньзы фестивальлэн гала-концертаз ӧз шеде ке но, котькудӥз выступление учкисьлэн сюлмаз ас интызэ шедьтӥз, дыр, шуыса малпаськом. Покчи Лӧзя Лулчеберетъя юртын ортчем гала-концертэз асьме ёросысь самодеятельной артистъёс сяна, бускель Кукмор но Мари-Турек ёросысь вуэм куноосмы но — «Ӟардон» но «Сактон» ансамбльёс — чебертӥзы, аспӧртэмлыко мылкыд ватсазы. Ужрадын соосты Таукарон гожтэтъёсын шумпоттӥзы. Нош асьме ёросысь коллективъёс но кырӟасьёс I-тӥ, II-тӥ но III-тӥ степенё лауреатъёслэн дипломъёсынызы но коньдонкузьымен пусйиськизы.