Улонтӥ — мызганэн шудыса

Алексей Николаевич, бадӟым опытэн мызганчи, та кылъёсты огшоры, тодытэк уг вера: со кема аръёс ӵоже мызганэн шудэменыз ас гурт калыксэ, кушкетъёсыз гинэ ӧвӧл — быдэс ёросэз шумпоттэ, шулдыртэ, паймытэ. Кушкетын Алёша агайтэк нокыӵе ужрад уг ортчы — гуртлэн нуналыз-а со, Йӧвылэпотон яке Ымусьтон выллем праздник-а. Бускель гуртъёсысь ужрадъёсын но со яратоно куно, ёрослэн палэназ но Алёша агайлэн нимыз вӧлмемын. Лыдъяса быдтонтэм трос ёрос, республика масштабен грамотаосыз (Южно-Сахалинск городысь гинэ но вань!) арлы быдэ тросгес но тросгес луо. Ма бордын мызганчи-самоучкалэн вутсконъёсызлэн секретэз? Та сярысь мызганчиен асэныз вераськимы.

— Алексей Николаевич, кӧня тӥледыз тодӥсько, тӥ котьку кияды мызганэн. Шумпотон вакытады но, сюлмаськон дыръёсады но та крезьгур инструмент вӧзады, лэся.

— Озьы ик вань. Мызганэн эшъяськонмы кемалась кутскиз, шонергес вераса школаын сизьыметӥ классын дышетскыкум. Туж бадӟым вал шудыны дышетскон мылкыды. Анае балалайкаен шудӥз, нош мыным мызган матын потэ вал. Тодӥсько на гуртысьтымы Геннадий Пчельниковлэн мызганэн шудэмезлы синмаськемме. Капчи, небыт шудылӥз со. Со шоры учкыса та крезьгур инструментлы кыстӥськыны кутски шуыны луэ. Геня агай, мызганэн тунсыкъяськемме адӟыса, монэ шудыны дышетыны кутскиз.  Ӧжытэн-ӧжытэн шудыны дышетски, озьы мызганчи-самоучка луи. Быдӟымгес будыса эшъёсынымы ӵош люкаськыку, весь мызганме сьӧрам нуллӥсько вал, малы ке шуоно юмшаны яратӥмы — эшъёсы курылӥзы. Али но ӵош будэм Апакова (Уськеева) Лена серекъяса вераны яратэ: «Яра али ми тонэ мызган кысканы дышетӥмы» шуыса.

— Мызганэн шудыны нимысьтыз дышетскемды ӧвӧл ке но, тӥ ёросын гинэ ӧвӧл, солэн палэназ но тодмо мызганчи луыны быгатӥды. Туннэ тӥледыз сюанъёсы, армиысь пумитан-келян ӝытъёсы, вордскем нуналъёсы, юбилейёсы шумпотыса ӧтьыло.

— Мон тазьы шуысал: котькыӵе инструментэн шудӥд ке но, сое нырысь ик шӧдыны быгатыны кулэ. Та дышетсконэн нокызьы уг герӟаськы. Вань адямиос, кудъёсыз мызганэн шудыны дышетско, но соослэн маиз ке но уг пӧрмы. Яке пӧрме ке но, шудэмзы адямиослэн сюлэмъёсазы уг пыӵа. Вань сыӵе мызганчиос но, кудъёсыз нимысьтыз тодон-валантэк озьы шудозы — пыраклы сюлмад кылёз. Мыным та ласянь удалтӥз шуысал: нокыӵе музыкальной тодон-валанэ луытэк, адямиослы кельшымон шудыны быгатӥсько. Соин, дыр, пӧртэм праздник ӝытъёсы монэ ӧтьыло. Куддыръя одӥг нуналэ кӧня ке ужрад но луэ, соку кинлы ке отказ сётыны тупа. Адямиос валало, югдуре пыро. Ачим мон ӵемгес ёросысь гуртъёсын ортчем ужрадъёсы пыриськисько, Кукмор ёросысь Лельвиж гуртэ но вуылэме вань.

— Тӥ республикаямы но, Удмуртиын но ортчись пӧртэм крезьгур конкурсъёсы ӵем пыриськиськоды ук. Южно-Сахалинскысь но грамотады вань. Со сярысь но вералэ вал.

— Тыршисько. Мыным конкурсъёсын асме утьыны, мукет мызганчиос шоры учкыны, соосын пумиськыса вераськыны, кенеш басьтыны но сётыны, асме соосын ӵошатыны тунсыко потэ. Одӥг интыын сылоно ӧвӧл — азьлань вамыштыны кулэ, мукет сямен азинскыны, будыны уг луы. Соин, зэмзэ но, республикаын но солэн палэназ ортчись пӧртэм конкурсъёсын, фестивальёсын мон ӵем луисько. Мазэ ватонэз, вормонъёсы но вутскисько. Анна Плотниковаен арлы быдэ радъяськись «Играй, гармонь!» конкурсаз кык пол ветлӥ ини, Можга ёросысь Сергей Крутихинлэн радъям конкурсаз вить пол мынӥ, кык пол ворми. Со сяна но мукет трос портэм ужрадъёсы пыриськыны тыршисько. Кылсярысь, «Чакара» фестивале, «Жингырты, удмурт кырӟан» конкурсэ. Котькуд мызганчи понна — али кемалась ӧвӧл шудыны кутскем ке но, та удысын бадӟым вормонъёсы вутскем ке но — таӵе ужрадъёсы пыриськон номаин воштонтэм опыт сётэ.

— Тӥ асьтэ вордскем гуртысьтыды, Вуж Кушкетысь, «Чибориё» ансамбльлэн воштонтэм мызганчиез луиськоды, ёросысь мукет коллективъёсын но пӧртэм ужрадъёсы пыриськиськоды шуыса тодӥсько. «Гырон быдтон» праздникын но тӥ ӵем куно. Мызганчиослэн парадазы но котьку тӥ вань.

— Озьы. Вуж Кушкетысь «Чибориё» ансамбльлэн гинэ мызганчиез ӧвӧл али мон, эшшо Вуж Турьяысь «Вуюись», Покчи Лӧзяысь «Вуюись» но Балтасьысь «Зангари» ансамбльёсын но ӵемысь пӧртэм ужрадъёсы мызганчи луыса ветлӥсько. Коллективъёс асьсэос ӧтё, мон пумит уг луиськы. Репетициосы но ветлӥськомы, выступать но карылӥськомы. Жаляса вераны кулэ, али мызганчиос котькуд гуртын ӧвӧл ини, соин бускель гуртъёсысь коллективъёслы быгатыкум юрттыны тыршисько. Мызган гурез нокыӵе гур воштыны уз быгаты ук. «Гырон быдтон» сярысь верано ке, зэмзэ но, кельтытэк тыршисько сыӵе праздникъёсты. Шумпотӥсько, калык ӧте, мызганэн шудэмме яратэ шуыса.

— Вутскыны туж секыт-а? Мызган тӥ понна хобби гинэ ук. Кема аръёс ӵоже гуртысьтыды парсь фермаын ужады, со ворсаськем бере Высокая Гораысь «Елмай» йӧл-вӧй комбинатын ужаны кутскиды. Сюрес но жадьытэ, дыр. Эшшо репетициосы ветлоно…

— Мызганэн шудон – со жадён ӧвӧл, шутэтскон! Мон физической ужлэсь шутэтскыку, мызганме киям кутыны яратӥсько. Вань уродэз вунэ, мылкыд ӝутске. Монэ мызганчи гинэ валаны быгатоз, дыр. Яке мукет кыӵе ке крезьгур инструментэн яратыса шудӥсь мурт. Ужъёс трос ке но (дорамы пудо но вордӥськомы), мызганэн шудыны дыр мон котьку шедьто.

— Репертуарады кыӵе кырӟанъёс тросгес?

— Удмурт калык кырӟанъёс, мукет сямен луыны но уг быгаты. Ачим но соосты матын карисько, калык но яратэ, соосты ӵемгес шудыны куре. Вань репертуарам апай, агай сямен эктон гуръёс, шулдыр но ӝож кырӟанъёс — огъя вераса, пӧртэм аудиторилы чаклам кырӟанъёс но гуръёс. Но шонерзэ веран понна пусйисько: тросгес шулдыр кырӟанъёсты быдэсъясько, калыкез шулдыртыны кулэ ук. Ӟучъёссэ но быдэстыны быгатӥсько, ӝӧксьӧр кырӟанъёс калыклы туж кельшо. Мон яратӥсько аслам дасям программаея выступать карыны, аслам аранжировкаосы но вань. Соосты Казаньын гожтытӥсько.

— Бадӟым вормонъёсы семьялэн, матысь адямиослэн юрттэтсытэк вутскыны уг луы, дыр.

— Шонер. Кышное Генриетта монэ вала, ваньмыз ласянь поддержать каре. Со котьку вӧзам: мон мызганэн шудӥсько, со кырӟа. Ӵошен но кырӟаськомы. Бадӟым тау солы валамез но матын луэмез понна. Антон пие куараме котьку кылзэ, репетициосы но, концертъёсы но — котькытчы ветлытэ. Дорысь ужъёсты но ужа. Покчи пие Захар но уг кыльы, юрттӥсь луыса будэ. Алёна нылы но Вадим эмеспие озьы ик котьку поддержать каро. Мария варманае но ваньмыз ласянь валась, юрттӥсь кышномурт. Огъя вераса, семьяен но матысь адямиосын мыным удалтӥз. Озьы ик таукарон кылъёсме вуттэме потэ гуртысьтымы клубен кивалтӥсьмылы Светлана Щербаковалы, Вуж Турьяысь клублэн заведующиезлы Ирина Исьмековалы, Покчи Лӧзя лулчеберетъя юртысь Галина Петровалы но Балтась лулчеберетъя центрысь Татьяна Ишмурзиналы. Одӥг ужрадлэсь но уг кельто, котьку ӧтё. Ог-огмылы юрттыса ужаны тыршиськомы. Бадӟым тау вань коллективъёслы, кудъёсыныз пӧртэм ужрадъёсы пыриськиськомы. Ог-огдэ валаса гинэ, юрттыса гинэ ӵош тупаса, вормонъёсы вутскыса улыны луэ.

— Алёша агай, ма бордын бен бадӟым вормонъёсы вутскемдылэн секретэз, вералоды-а?

— Нокыӵе секретэз ӧвӧл. Котькуд кырӟанме сюлэмме сётыса быдэстӥсько, сое адямиос адӟо, валало, шӧдо. Чиньыосыным гинэ ӧвӧл — вань мугореным шудӥсько. Дорам но ӵемысь мызганме кыскасько, выль кырӟанъёсты дышетскисько, аслэсьтым шудыны быгатэмме волятӥсько, вылезлы кыстӥськисько. Соин вормонъёсы но вутскисько, дыр. Оскисько, азьланяз но соос луозы шуыса.

— Мылкыдды ноку медаз кысы, туннэ кадь ик ӟырдыт мед луоз! Азинсконъёс тӥледлы, Алексей Николаевич!

Вераськиз Наталья Жукова