Вань ӟечсэ сӥзисько

Тӥни 90 ар тырмем ни ёросамы удмурт сямен потӥсь «Азьлане» газетмылы но. Асьме понна со газет пичи пинал кадь матын но дуно. Чидатэк возьмаськод сое. Азьло коть арняяз куинь пол вуэ вал, нош табере тани — одӥг пол гинэ. Со газетэз поттон бордын котьку визьмо, сабыр, ас калыксэс, вордскем шаерзэс яратӥсь адямиос тыршизы но тыршо. Вае тодэ ваёмы ваньзэсты соосты, кинъёс сылӥзы газетмылэн кутскон но азинскон сюресаз; буре ваёмы югыт дуннеен люкиськыса пӧлысьтымы кошкем газетчиосты (визьмо агайёсты но апайёсты Инмар мед жалялоз). Нош али тыршись гажано апайёслы ваньзэ умойзэ гинэ сӥзёме. Шуныт, каньыл, шудбуро улон мед пиштоз соослы ваньзылы, пенсионеръёслы но озьы ик. Ӝутскем мылкыдын, бадӟым яратонэн мед тыршозы асьмелэсь яратоно «Азьлане» газетмес эшшо но тунсыкогес карыны. Эшшо 90 ар ӵоже мед кылдоз ай газетлы ёросамы улӥсь удмурт калыкез шумпоттыны. Ум люкиське ноку но. Сӥзёмы солы ӟеч но кузь улон сюрес. 

Кыл — со калыклэн усьтонэз.

Кыӵе семьяын вордскыса будэ пинал, долгез солэн — ас вордэм анаезлэсь кылзэ тодыны, вераськыны быгатыны. Паймод, та огыр-бугыр улон вакытэ Россиын улӥсь пичи калыкъёслэн нылпиоссэс дышетэмзы, вераськемзы уг поты ни (малы ке) асьсэ родной кылынызы, ӟучомемзы потэ, вылды...

Трос кулэ табере, удмурт дышетӥсьёслы мур гажан пыӵатон, ас вордскем кылэдлы, дышетскись нылпиослы. А жаль...
Котькинлы но ас вордэм анаез дуно но мусо. Озьы ас вордскем кылыд но матын но дуно. Сюлэмъя солэн кырӟанъёсыз, газетъёсыз — ма котьмаиз тыныд чебер, озьы ик калыкез но синмаськымон мусо но дуно.

Мынам удмурт калыке туж ужась но тыршись, сабырлы но визьмо, мукет калыкъёс сямен ик тырше со пӧртэм-пӧртэм удысын.

Муспотон агайёс но апайёс, пиналъёс, удмурт калыклэн выжыез! Кытын гинэ тӥ уд улӥське, уд ужаське — ваньдылы но сӥземе потэ умойзэ гинэ. Асьмеды но Инмар мед утёз-вордоз, мед улоз удмурт кыл. Уломы ог-огмес гажанэн, юрттыса, тупаса. Ӟеч сямо луыса, яркыт ужъёсын улонэз шулдыртыса уломы. Та бадӟым странаын мукет калыкъёсын эшлыко улыны мед кылдоз асьмелы кема-кема...
 

P.S.: Ӟеч улэ, гожъяське, жингрес удмурт кылмес утёнын тырше кема аръёс ӵоже. Мед чузъяськоз котьку асьме анай кылмы та шулдыр дуннеын! Тау тӥледлы! Эн жаде. 
 

Гожтӥз Нина Кумаева"

Редакцилэсь:
Тани таӵе шуныт но ӟеч кылъёсыныз милемыз, «Азьлане» газетын ужасьёсты, шумпоттӥз, эшшо но сюлмысь ужаны мылкыдмес ӝутӥз Тагашурысь Нина апай Кумаева. Кыӵе умой ёрос газетмылэн сыӵе оскымон эшъёсыз вань шуыса! Вераны кулэ, ӵапак сыӵе лыдӟисьёсмылы луыса ик «Азьлане» газет туннэ нуналэ но иворъёсты вӧлмытон дуннеын аслэсьтыз интызэ уг ышты, туала улонлы тупатскыса, азинскыны тырше. Оскиськом, азьланяз но огъя тыршеменымы удмурт газетмылэн улонэз уз кысы, печатной изданилэн кулэлыкез уз быры но, аслэсьтыз аспӧртэмлыксэ ыштытэк, со электронной изданиосын одӥг радын азинскоз шуыса.