Хезмәт

Вунэтыны уг луы со минутъёсты...

Кылем арняе Ципьяысь Тарасов Павел Гаврилович 50 аресъем юбилейзэ пусйиз. Газетамы сое ӟечкыласа ӵыжы-выжыосыз ӟечкылан лэзиллям вал.

Сыӵе дыръя тунсыко потэ, кин меда та адями, кытын меда со улэ, тодӥсько меда мон сое шуыса... Павел Гавриловичез туж ик умой тодӥсько шуэме уг луы, одӥг гуртын ке но улӥськомы. Нош тодыны кулэ ик сыӵе адямиосты — Пашагай Афган ожез ортчем адями вылэм. Соин ик со сярысь гожтэме потӥз — 15 феврале афганецъёслэн нуналзы вал ук. 16 феврале нош Пашагай 50 аресъем юбилейзэ пусйиз, со сяна 23 февраль но матэктэ. Тани соку ик кӧня муг шедиз Пашаген матысенгес тодматскыны.

Пашагаез афганецъёслэн нуналэныз но, юбилееныз но ӟечкыласа, юанъёсме сётъяны кутски Афган ож сярысь — ку но кытысен Пашагай отчы сюрем, кыӵе мылкыдъёсын мыныны тупам солы отчы.

Юанме сётӥ гинэ но, телефон пыр шӧдӥ кадь, кызьы монэным пальпотыса вераськись Пашагайлэн соку ик мылкыдыз усиз. Кӧня ке дыр шыпыт улыса, Пашагай синву пыр вераны кутскиз:

— Пуш тыриз... Вераськеме но уг луы лэся ни... Туж секыт мыным та сярысь вераськыны...

Ини кыӵе гинэ адямиен вераськеме, кыӵе гинэ учыре шедеме ӧй вал та дырозь, но таӵеезлы дась луиськымтэ. Мар вераны ёрмыса, Пашагай азьын асме умойтэм шӧдыса, вераськонмес мукет темае выжтоно кари.

— Бен, — шуисько, — толон туж шулдыр юбилейдэс ортчытӥллямды шуыса кылӥ. Трос машина, пе, люкаськем тӥ доры, Пашагай, — верасько, ӧжыт ке но Пашагайлэсь мылкыдзэ ӝутон понна.

— Ой, туж умой, туж шулдыр ортчиз юбилее. Тамаша. Сырьяос но, сизнеръёс но лыктӥзы. Адямиез бен мамында вал... Кык мызган вань вал — одӥгез кырӟан, нош мукетыз эктон понна. Мирон Колягайдэ тодӥськод-а, вот ӵапак со вал мызганчимы. Изумительно шудэ со мызганэн, — вераз Пашагай. — Ма, азьло ачим но шудӥсько вал. Армие кошкыку, ачим урам кузя мызганэн шудыса мынӥ.

— Армия сярысь ке верано, туала дыре трос сыӵе пиос, кудъёсыз армилэсь пегӟо, служить карыны кышкало... Юанме сётыса но ӧй вутты, Пашагай, мынэсьтым ма сярысь юаны малпаськемме валаса, вераз:

— Служить карыны одно ик кулэ. Одно ик. Со ведь котькуд пиосмуртлэн улонэзлэн элементарной люкетэз. Армиын тон улонэз адӟиськод, валаны кутскиськод. Армия егит пиослы зэмос воргорон луыны юрттэ, — шуиз Пашагай. — Ачим сярысь ке верано, армие 1986 арын служить карыны кошки. Таджикистанэ учебной пунктэ лэзизы, 1987 арын нош, ачим заявление гожтыса, Афганистанэ мынӥсько шуи. Мон кадь, ас мылкыдзыя мынӥсьёс вань вал, соосын огазе служить каримы. Али тани кемалась ӧвӧл ӵош служить карем эшме шедьтӥ, Алькеевской ёросысь. Сураськыны кутскем лэся ни со... Мыныса бертыны кулэ со доры кызьы ке но.., — ачиз выльысь Афган сярысь вераны кутскиз Пашагай.

— Туж секыт вал-а служить карыны, кыӵе мылкыдын мынӥды Афганэ? — табере ини кышкаса, эскериськыса гинэ юан сётӥсько.

— Капчи ӧй вал... Сомында кышкыт, сюлме пыраклы кылем учыръёс вань. Ваньзэ вераса но уд быдты. Трос пӧртэм ужъёсты ужаны тупаз — заставае электричество сётӥсько вал, ву качать карисько вал. Голбечмы вал милям. Ог времае отысь кулэм комакез поттӥмы, со вуэз но юиськеммы. Собере отчы хлорка куямы... Та учыр бере ву машинаен нуллыны кутскимы. Сюрес вылын ик бомбардировка бере кулыса кыллись адямиос, отын ик валъёс... Быдэсаксэ вераны но уг луы... Но мон ноку но Афганэ аслам мылкыдыя служить карыны мынэме сярысь ӧй жаля. Али но шумпотӥсько. Мынам улонам ваньмыз умой пӧрмиз, — шуиз пиосмурт.

— Афганын валче служить карем эшъёсыныды люкиськыны но секыт вал, дыр.., — шокчыса верасько.

— Ас дӥньысеным кадь потыса кошки мон отысь. Сюлмы бӧрдыса. Али но вунэтыны уг луы  со минутъёсты. Вӧтам али но пыро Афганын служить каремъёсы, отысь эшъёсы, отын луэм учыръёс.... Ноку но уз вуны со, — веранзэ йылпумъяз Пашагай.

Пашагайлэн «Вунэтыны уг луы со минутъёсты» шуэм кылъёсыз сюлмам кылизы. Минутъёсты гинэ ӧвӧл, одӥг секундэз но вунэтымон ӧвӧл, дыр, со ожлэн.

Афганысь бертэм бераз со комбайнэн но, ПМК-ын но ужаз, нош али «Труд» колхозын КамАЗ-эн тырше. Семьяез, нылпиосыз, кузпалыз солэн улоназ яратоно адямиосыз но юн пыкетэз луэ. Пичи Егор внукез но вань ини Пашагайлэн, со сярысь туж шумпотыса вераз воргорон.

Пашагай, тӥледыз нош ик сюлмысен афганецъёслэн нуналэнызы, озьы ик юбилееныды но праздникен — Атаймузъемез утисьёслэн нуналэнызы ӟечкыласько. Тау тӥледлы, монэным синву пыр ке но, секытэн ке но вераськемды понна.

 

Реклама
Нравится
Поделиться:
Реклама
Комментарии (0)
Осталось символов: