Вуж Кушкетысь Мария Карабаева 90 аресъем юбилейзэ пусйиз

Юбилярез дано лыдпусэныз социальной дурбасьтонъя отделлэн кивалтӥсез Алсу Гатиятуллина, Балтась районлэн главаезлэн воштӥсез Наиль Сабирзянов ӟечкылазы, РФ-лэн Президентэзлэсь ӟечкылан открытказэ, район главалэсь Таукарон гожтэтсэ вуттӥзы, трос кузьымъёс но вайизы. «Яна тормыш» обществолэн кивалтӥсез Сайфетдинов Магсум Равилевич, Янгул гурт поселениысь представитель но юбилярез ӟечкыланы лыктӥзы. Тазалык но шудбуро улон сӥзьыса, Наиль Нургаязович Мария Сергеевналы вазиськыса вераз:

— Милям вань сыӵе умой традицимы: котькуд юбилярлы ми тазалык сяна, вуоно юбилеяз но пумиськыны мед кылдоз шуыса сӥзиськомы. Тӥледлы но со ик кылъёсты вераме потэ. Асьмелы нош ик тазьы пумиськыны мед кылдоз.

Нош Мария Сергеевна, лыктэм куноослы но соослэн ӟечкыланъёссылы шумпотӥз ке но, укмыстон вить, сю аресозь улыны уз луы ни шуыса ответ сётӥз. «Тэльмырыса улӥсько ни, висисько. Кема улӥ ук ини...», — шуиз со.

Мария Сергеевна укмыстон ар талэсь азьло Вуж Кушкет гуртын вордскем. Куанер но трос нылпиё семьяын будэм Мариялы пичи дырысеныз трос уж адӟыны тупам. Озьы ке но, вордскем гуртаз сизьым классэ йылпумъямез бере, Малмыже сад-бакча возисьлы дышетскыны мыныны быгатэ ик. Но дышетсконзэ йылпумъяны солы уг кылды — секыт улон сое вордскем гуртаз берыктэ.

— Дышетскыса ӧй быдты. Ньыль пиос но мон огнам ныл вал анай-атайлэн. Соин мыным трос секыт уж йӧтӥз, пичиысен нюлэскын пушнер, веник люкаса ветлӥ, соин ик бертыны но тупаз Малмыжысь. Анайлы юрттытэк ӧз луы. Улон сыӵе вал — мар карод..., — валэктэ Мария Сергеевна.

Кӧня ке ар ӵоже Мария валэн культо нуллэ, отысен фермае ужаны выже — ыжъёсты сюдэ. Амбарын но ужам Мария Сергеевна. Ужам аръёссэ тодаз вайыса, со шуэ: «Ваньзэ ужай, мар бригадир косэ вал, пал кыл но вератэк. Улон туж секыт вал, вераса быдтонтэм, кынмем картофка сиыса будӥмы, соиз но я луэ, я уг. Жугиськон быдмем бере Шемордан пала нюлэс кораны ветлэмме тодӥсько. Сыӵе пайми отысь юртъёсты адӟыса... Бадӟымесь, чебересь юртъёс вал со. Нош асьмелэн... Огъя вераса, асьмеос начаргес улӥськеммы».

Гумырыз ӵоже «Яна тормыш» обществоын ужаса (Мария Сергеевна ужам аръёсы «

Коммунар» колхоз нимаськем), 55 аресэн нылкышно дано шутэтсконэ потэ. Жаляса верано, Мария апайлы ас семьязэ кылдытыны шуд усьымтэ. Туннэ нуналэ со Елизар вынызлэн семьяеныз улэ. Татын арлыдо нылкышноез гажало но туж умой утё.

— Картлы ӧй кошкы, нылпиосы но ӧвӧл. Но монэ вынлэн семьяяз туж ярато но туж умой учко. Аресэд тырмем бере, юрттэттэк нокызьы уг луы вылэм...  Яра али Света (вынызлэн кенэз — Н.Ж.) вань, со туж уте монэ. Ачиз пуньыен сюдэ, аслэсьтыз анайзэ кадь учке, шудо мед луоз вань лэсьтэм ӟечлыкез понна..., — пушкыз тырыса вера Мария Сергеевна.

Юрттэттэк Мария Сергеевналэн берло дыре, зэмзэ но, уг луы ни. Тазалыкез лябӟемен, синмыз туж начар адӟе вылэм, вордскем нуналэзлы ваем кузьымъёссэ но, сяська керттэтсэ но адӟемез ӧз луы. Озьы ке но, шумпотон мылкыдъёссэ ватытэк, ёросысь вуэм кивалтэтлы но, вордскем нуналаз вуэм матысь ӵыжы-выжыосызлы но пумтэм тау каронъёссэ вуттӥз. Мыным но таукарон кылъёссэ вераз. Арлыдо адямилы ӧжыт саклык висъяса вераськид гинэ ке но, со бадӟым шумпотон луэ вылэм.