Выль вормонъёслы стимул

Одӥгез сыӵе ужрад тани ньылетӥ арзэ ини Набережной Челныын ортче. Татарстанысь финн-угор калыкъёслэн «Мы ветви древа одного» фестивальзы со. Та фестивальлэн мур пуштросъем нимыз но ачиз сярысь ваньзэ вера, тодэ вайытэ финн-угор калыкъёслэн одӥг вашкала выжыысь луэмзы сярысь.

Ужрадэ котьку сямен пыриськизы удмурт, пор но мордва коллективъёс. Озьы ик туэ фестивалез шулдыртӥзы Мордовиысь, Марий Элысь кун ансамбльёс но асьмелэн яратоно «Айкаймы». Шумпотымон эшшо соиз, куинетӥ арзэ ини Татарстанысь финн-угор калыкъёслэн калык творчествоя фестивалязы асьме ёросысь Покчи Лӧзя культура юртысь фольклор коллектив но пыриське.

«Челныысь Калыкъёслэн эшъяськон юртсылэн ӧтеменыз ми куинь пол ветлӥмы ини та фестивале. Азьло аръёсы кадь ик, туэ но милемыз туж шуныт пумитазы. Рос-прос, быгатыса, сюлме кельшымон карыса радъямын вал фестиваль. Мон малпасько, таӵе ужрадъёслэн кулэлыксы туж бадӟым. Соос арлы быдэ выль но выль коллективъёсын тодматскыны, опытэн вошъяськыны луонлык сёто. Коллективмылы азинскыны, будыны юртто, выль перспективаос кылдыто. Тани таяз радэ но «Вуюись» ансамбльмылэсь выступленизэ фестивалез радъясьёс вылӥ дунъязы — лауреатлэн дипломеныз пусйизы. Нош та ас черодаз эшшо выль вормонъёслы стимул луэ ук», — шумпотэмзэ ватытэк вера Покчи Лӧзя культура юртысь «Вуюись» фольклор ансамбльлэн кивалтӥсез Галина Петрова. «Учырен пайдаяськыса, артистъёсылы но туж бадӟым тау каремме верасько. Мон аслам эшлыко коллективеным туж данъяськисько но оскисько, ми азьланяз но учкисьёсмес шулдыртомы, капчи мылкыд соослы кузьмаломы шуыса», — ватсаз Галина Денисовна.

Озьы медло! Азьланяз но азинсконъёс сюресчи мед луозы тӥледлы, «вуюисьёс».

Фото: Галина Петрова.