Вылын Ушма гуртысь школа-садэ ӧтчазы тылысь ветеранъёсты но ож дырысь нылпиосты (фото)

Куартолэзь. Инкуазь сайка, турын-куар вожектэ, кӧня тылобурдоос вуо асьме пала. Туэ тулыс вазь вуэменыз но паймытӥз. Ӵапак таӵе куазь но адямиосын ӵош шумпотэ, дыр, укмысэтӥ куартолэзе Быдӟым Атыкай ожын Вормонлы 78 ар тырмонэз пусйиськомы шуыса.

Котькытын, та нуналлы сӥзьыса, ожысь но тылысь ветеранъёсты, ож дырысь нылпиосты данъяса, ужрадъёс ортчо. Котьку сямен, милям Вылын Ушма гуртысь школа-садэ но ӧтчазы тылысь ветеранъёсты но ож дырысь нылпиосты. Жаляса вераны кулэ, гуртысьтымы ожысь ветеранъёс ваньзы кулэмын ини. Школа-садысь дышетӥсьёс, воспитательёс дышетскисьёсын ӵош туж тунсыко концерт дасяллям. Лыктэм куноосты нырысь директор, Галиева Земфира Талгатовна, ӟечкылаз. Концерт мыныку, гурт поселенилэн главаез Айдар Салимзянович но туж шуныт кыльёсын ӟечкылаз вань куноосты. Соос туэ укмыс кузя гинэ лыктӥзы ини. Кин висе, кинлэн ветлэмез уг лу ни. Лыктэм куноослы пиналъёс асьсэ киынызы лэсьтэм открыткаос кузьмазы. Вань лыктэмъёслы школа-садлэн коллективезлэн туж гажаса, матын куно каремез яраз. Дышетӥсьёслэн Ирина Васильевналэн но Ольга Николаевналэн, воспитательёслэн Оксана Васильевналэн но Елена Николаевналэн, поварлэн Любовь Николаевналэн, утялскисьлэн Зинаида Геннадьевналэн, директорлэн Земфира Талгатовналэн тыршемзы мур гажамон но таукарымон. Азьланяз но ужазы азинсконъёс, тазалык семьяосазы тынӥсьлык сӥзиськом соослы. Лыктэм куноосты узыр жӧк сьӧрын чаен куноязы, туж шуныт сӥзёнъёс веразы на.

Азьланяз но мед луозы таӵе пумиськонъёс. Мед ужалоз на гуртамы школа-сад. Нылпиоссы ӧжыт ке но, коллектив тырше пыриськыны котькыӵе ужрадъёсы. Пересь куноос но таӵе мылкыдын кошкизы. Ведь соослы таӵе пумиськон тужгес но дуно. Огазе люкаськонзы туж шер луэ, малы ке шуоно милям гуртамы клуб ӧвӧл. Ог-огзэс адӟыса вераськизы та нуналэ вань лыктэм куноос но гуртазы умой ӝутскем мылкыдын бертӥзы.

Екатерина Иванова,

Вылын Ушма гурт