Юрий Александрович Шерстов – «Дуслык» обществолэн адӟем карымон комбайнёрез

Казаньын вордскем, Челябинскын будэм пияшлэн сюлмыз котьку гуртэ кыскем, соин Юрий 18 аресэз тырмытозь ик анаезлэн вордскем палъёсаз – Ӟаны гуртэ улыны бертэм. Арлы быдэ гужем каникулъёсы татчы вуылэмысьтыз, татын эшъёсыз но луиллям. Татчы интыяськемез сярысь со огпол но жалямтэ – гурт улон сюлмызъя луэм ик. «Дуслык» обществоын но Юрий Александрович кема аръёс ӵоже ужа ини. Нялтас вераса, со ужаны кутскыку, колхоз «Дружба» шуыса нимаськем. Кыӵе гинэ ужъёсты быдэстоно уг луы солы татын: со луэ слесарь но, гаражын но ужаны вутске (Тюнтер гуртын интыяськемын луэм). Армиын служить карыса бертэмез бере (1988-1990-тӥ аръёсы Азербайджанын атаймузъемез азьын дано ужпумзэ быдэстэ), выльысь колхозэ – соку ини со «Искра» шуыса нимаське – ужаны бертэ. Пӧртэм ужъёсты быдэсъясь луыса тырше, машина нуллыны право басьтон понна дышетске. Дас кык ар ӵоже Кутэш фермаын оператор луыса но ужа али. Калыкын огшоры гинэ уг верало ини, ужась адями котьмае ужаны быгатэ шуыса. Та кылъёс Юрий агайлы туж тупало – со угось колхозын кыӵе ужъёс вань, ваньзэ но ужаса вутске. Бератаз комбайнэ но ужаны пуксе.

- Мынам туж быгатыса ужась, опытэн комбайнёр агае вань вал – Иван Владимиров. Жаляса верано, туннэ нуналэ со кулэмын ини. Ӵапак солэн кулэмез бере колхозлэн председателез агайлэн комбайнэныз мыным ужаны ӵектӥз. Мон пумит ӧй луы. Озьыен, агайлэн ужам «Нива» комбайнэз мынам луиз. Соин куать сезон ужаны вутски, - тодаз вае комбайнэ пуксем дыръёссэ Юрий Александрович.

«Нива» комбайн бере механизаторлы колхозлэн со дыре кивалтӥсез Рамиль Гильмуллин выль техникаез но оске – «Полесье» комбайнэз. Тани та комбайнэн туннэ нуналэ но ужа Юрий агай, туэ дасэтӥ сезонэз луэм ини. «Шофёрлы право басьтэме бере, «Искраын» одӥг ар ӵоже водитель луыса но ужаськем вал, соин техникаен ужан но мон понна тодмотэм уж ӧй вал. Ма, техникаез но котьку матын кари. Соин, дыр, комбайнэн ужаны мыным тужгес кельшиз. Мукет сямен ке луысал, сомында аръёс ӵоже комбайнэн ужаны ӧй быгатысал, дыр. Та уж мыным кельше но, капчигес кадь но потэ», - валэктэ механизатор.

Юрий Александрович но, Алексей Александрович кадь ик, та конкурсын куинетӥ арзэ вормисьёслэн радъёсазы луэ вылэм ини. Востэм воргоронлэн ассэ туж ик ушъямез ӧз поты ке но, пиосыныз данъяськыса, вераз: «Пие Алексей ӧз ке ужасал, ӧз ке юрттысал, мон ӧй быгатысал вормисьёс пӧлын луыны. Со туж бадӟым юрттэт возьматэ мыным». Зэмзэ но, Юрий агаен ӵош ини укмысэтӥ сезонзэ радысь покчи пиез Алексей но комбайнёрлэн юрттӥсез луыса ужа вылэм. Ижевскын дышетскись пияш атаезлы аслаз мылкыдыз луэмен юрттыны кутскем школаын дышетскон дырысеныз ик. Бадӟым пиез Андрей но Юрий агайлэн юрттӥсез луыса ужам ас дыраз. «Пиослэн асьсэлэн ужамзы потэмысь, монэным ӵош ужаны кутскизы, соосты нокин ӧз косы, ӧз куры. Покчиезлэн али но ужаны мылкыдыз туж кужмо», - шумпотэмзэ ватытэк вера Юрий Александрович. Сыӵе усто но оскымон юрттӥсьёсыз луэм бере, паймонэз но ӧвӧл ини, механизатор арлы быдэ умой показательёсы вутске шуыса. Бен, пӧртэм дыръёссы луо механизаторъёслэн но – куддыръя техника подводить каре – но со шоры учкытэк, воргоронъёс шуг-секытъёслы сётскытэк уэаны дышемын.

Туннэ нуналэ Юрий Александрович комбайнэн гинэ сезон ужъёсты ӧвӧл, МТЗ-82 тракторен но ужа - сеялкаен кизён ужъёсы пыриське, толалтэзэ пудо но сюдэ. Нокыӵе ужлэсь палэнэ уг кыльы, уг но кышка. Кышноез Светлана кузпалэзлэсь атайзэ, Александр Александровичез, уте, пиосыз ужало.

Али комбайнёръёс огез но басьтоно премизэс кытчы кутыны уг тодо, вылэм. «Мед гинэ сётозы, поныны интыез шедёз» шуизы. Споръяськыны уг луы. Ӟеч, кулэ ужъя, заслужить карыса басьтэм коньдонды тӥледлы азьпалан но азинлыко ужаны стимул мед луоз!