«Жаляса верано, дунне вылысь тужгес но коррумпированноез судья – со асьмелэн возьытлыкмы…»

Тросэз малпа, со кыл али гинэ асьме улонэ вуиз шуыса. Нош ӧжыт малпаськид ке, валаны луэ со югдурлэсь вашкала дыре ик асьме улонамы пыӵамзэ.

Историкъёслэн верамзыя, асьмеос коррупциен ӵош сизьым сю арлэсь тросгес улӥськом ини. Котькин вера та югдур туж кышкыт, сое улонысь палэнтыны кулэ шуыса, нош малы ке но нокин номыр но уг кары со кылэз (ужез) выжытэм быдтон но вунэтон вылысь.

Нош мар со коррупция? Та юанлы пӧртэм валэктонъёсты лыдӟыса, тазьы шуыны луэ: коррупция – со законлы пумит султыса, уксёен яке мукет амалэн (кузьмаськонэн) ас кулэяськонэз быдэстон.

Котькытын та кыл сярысь верасько ке но, тросэз уг но валало солэсь асьмелы изъянтэмзэ. Соос малпало, лэся, коррупция асьмелэсь улонмес капчиятэ шуыса. Нош озьы-а со? Ӧвӧл. Асьмеос ӵем гинэ кылӥськомы яке адӟиськомы туж тунсыко но со ик дыре сюлэмез вӧсь карись  учыръёсты: кылсярысь, али гинэ дышетсконзэс йылпумъям студентъёслэсь тодымтэзэс но быгатымтэзэс. Мазэс, кыӵе быгатонлыксэс эскеро но учко меда соослэсь уже интыяськыкузы ужсётӥсьёссы? Соос пӧлын тросэз коньдонэн ужкагаз басьтыса, нимызлы гинэ ужасьёс ук?!

Малы со озьы луэмын? Малы асьмелэн туж трос ас ужзэс тодӥсь но гажась специалистъёс (ӧнерчиос) ужтэк пуко яке вылӥ дышетскон ужъюртын дышетскемын ӧвӧл? Малы визьмо адямиосын озьы луэмын? Татын но дырын-дырын «коррупция» кыл потэ кадь. Шонерзэ вераса, узыр анай-атайёс ваньзэ коньдонэн но кузьымен гинэ басьто. Сыӵе адямиос азьланез сярысь уг ик малпасько, кызьы ужалозы дунэн басьтэм «дипломантъёс» калыкез дышетон, сюрес вылын транспортэз ветлытон, вылӥ кивалтон но мукет валтӥсь ужъёсын?! Туж кышкыт ук?!

  Кызьы тодӥськом ини, ваньмыз пӧлысь эмчилэн ӧнерез одӥгез вашкалаез но гажаноез. Азьло дырысен дунъязы но гажазы соосты. Котькыӵе кивалтӥсь луиз ке но адями, висьыны усиз ке, эмчиослы вазиськоно луэ.

Жаляса верано, туэ троссэ соосты гажамон ӧвӧл. Ас ужзэ яратӥсь, калыкез жалясь, солэн улонэз понна сюлмаськись, котькыӵе дыре эмъяны дась луэм  эмчиос чиньыен лыдъямон. Арысь аре соос пӧлын аляло тодӥсьтэм яке валась, но со ик дыре коньдон кыскась эмчиос. Огласянь ке учконо, малы эмчиос калыклэсь коньдонзэ кыскано луо? Мынам чакламея, татын кунлэн но янгышез бадӟым: дыраз висъям коньдонзэс уг тыро. Туэ уката но… Covid-19 висёнэн сэрен кӧня уж соос вылэ усиз, нош уждунзы ичи?! Ужед тыр улон ӧз ке сёты, кинлэн ужамез потоз?!

 Жаляса верано луиськомы, адями ачиз ик янгыш котькыӵе вылӥ верам ужъёсын, малы ке шуоно тодмо тодосчилэн В.Чайкалэн верамезъя, адямилэн возьытэз самой валтӥсь коррумпированной судья. Та судья гинэ асьмелэсь малпанмес, пушдуннемес воштыны быгатэ.

Возьытлык. Тӥни ма бордын коррупцилэн инъетэз. Возьытлык гинэ быгатэ коньдон сётон-кузьмаськон ужез дугдытыны, умойтэм малпанъёслэсь палэнскыны. Та сям семьяын вордӥське, анай-атаен пыӵатӥське но улонэн кыда.

Возьыттэм адями уг учкы ас сямъёсыз, выросъёсыз шоры, со уг но малпаськы мукет адямиос но азьпал улонэз сярысь. Сыӵе адями вала ке но шонертэм уж лэсьтэмзэ,  коньдон сое гочатэ, сук сямез соин кивалтыны кутске.

Возьытлык – со арбери ӧвӧл, сое уг луы киысен кие сётыны, сое уг луы адӟыны, нош шӧдыны луэ. Соин ик котькинлы малпаськыны кулэ вуоноез сярысь. Адямиос, сюлмаське вуоно улонмы сярысь, пыӵатэ пиналъёстылы та сямез, дышетэ улонысь шӧдыны но висъяны уродзэ но ӟечсэ. Мон оскисько: та сямъёс юрттозы асьмелы «коррупция» кылэз вунэтыны, азьланяз ӟеч улон лэсьтыны.

Калыкын юнме уг верало: «Ортчемзэ тодытэк, уг луы азьланьзэ тодыны». Табере тодӥськомы ини коррупцилэсь пӧрмемзэ, солэсь улонмылы кышкыт луэмзэ. Ваньмы ӵошен  асьмеос бадӟым кужым, кудӥз котьмае ворме но быгатэ! Соин ик, ойдолэ ӵошен луоме, огкылысь уломе но ӟеч сямъёсты пыӵатон бордын ужаломе!!!

Полина Плотникова,

Покчи Лӧзя шоръёзо школаысь 9-тӥ классын дышетскись