Лимонны ничек үрчетергә?

Лимонны күптән үстерәм, агачы картайды. Чыбыкчадан тамырландырып, яшәртергә телим, тик никтер килеп чыкмый.

Сорауга танылган бакчачы Франс ХӘЛИЛОВ җавап бирә.

— Лимонны чыбыкчадан апрельдән июньгә кадәр тамырландырырга була. Моның өчен ана үсемлекнең берьеллык ботагыннан 8-12 см озынлыктагы чыбыкча кисеп алырга кирәк. Аскы кисемен бөре астыннан ук кыйгачлап, өскесен — өске бөре өстеннән туры итеп кисәргә кирәк. Чыбыкчада 3-5 яфрак булырга тиеш. Аскы яфрагын өзәләр, черемәсен өчен, аскы кисеменә төелгән күмер сибәләр.

Лимон чыбыкчасы юылган елга комында яхшы тамырлана, суда тамырландырырга тырышмагыз. Чыбыкчаларны 2 см комга батырып утыртырга кирәк. Температура +22...+25 оС, дымлылык югары булырга тиеш. Әгәр чыбыкчалар күп булмаса, өстенә банка капларга мөмкин. Кипмәсеннәр өчен, иртә-кич яфракларына пульверизатордан су бөркеп торыгыз.

1,5 айдан тамырланган чыбыкчаны 10-12 см диаметрлы чүлмәккә күчерәләр. Туфрак катнашмасы 5 өлеш кәсле туфрак, 2 өлеш черемә, 2 өлеш яфраклы урман туфрагы, 1 өлеш елга комы кушып әзерләнә.

Чыганак

фото