Балтач балалары лагерь белән саубуллашты (+фото)

Быел "Романтик" базасында  палаткалы лагерь эшләде. Дүрт смена дәвамында, 6 июльдән 5 августка кадәр, 150 бала ял итте. Балалар өчен 17 палаткадан торган шәһәрчек, душ кабиналары һәм биотуалетлар оештырылды. Биш тапкыр ашату Балтач мәктәбе һәм гимназиясе пешекчеләре тарафыннан башкарылды. Лагерь программасы балаларның яшь үзенчәлекләрен һәм смена профилен исәпкә алып төзелгән һәм үз эченә гражданлык-патриотик, экологик-туристик, спорт-сәламәтләндерү модульләрен алган. Сменалар дәвамында мәктәптән тыш эшләр үзәге педагоглары тарафыннан мастер-класслар, "Факел" яшүсмерләр клубы хезмәткәрләре тарафыннан спорт чаралары, үзәк китапханә хезмәткәрләре, ПДН һәм КДН хезмәткәрләре белән әңгәмәләр үткәрелде, квест-уеннарны социаль яклау хезмәткәрләре үткәрде. Һәр смена ачык һәм бай эчтәлекле узды, балалар бик күп уңай тәэсирләр алды.