Ӟеч кидыслэн тысез но ӟеч

Зэмзэ но, синмаськымон чебер инкуазь сэреге интыяськем та ошмес. Котыр писпу, интыез сайкыт, чылкыт. Нош ошмеслэн жильыртэмез ке шуод! Уй но нунал кылзыны луысал, дыр, дун ошмеслэсь кырӟамзэ. Солэн чингылиё куараез гырлы кадь жингыртэ, буйгатэ кӧтӝожез, улыны мылкыд но кужым сётэ. Тӥни макем бадӟым ошмеслэн кужымез. Веранэ Вылын Ушма гуртысь ошмес сярысь. Туж шумпоттэ, туала дыре но та инкуазь узырлыклэсь кулэлыксэ, дунъетсэ валаны быгатӥсь ӟеч сюлэмо адямиос пӧламы вань шуыса. Зинаида Гришкина но Добромысловъёслэн семьязы ӵапак сыӵеос пӧлысь. Соос Вылын Ушма гуртысь ошмеслы выль улон кузьмазы шуыны кулэ. Зина апай, сётэм кылзэ быдэстыса, атаезлэсь малпанзэ улонэ пыӵатыса (газетмылэн 37-тӥ номераз ивортӥськеммы вал со сярысь), ошмесэз выльдыны коньдонэн юрттӥз. Ошмесэз коркаё каронэ бадӟым люкетсэ пыртӥз Зинаида Ивановналэн выныз Юрий Добромыслов. Вань ки кужымез кулэ карись лэсьтӥськон ужъёсты со быдэстӥз. Озьы ик гуртысь пиосмуртъёс но юрттӥзы. Пусйыны кулэ на Покчи Лӧзя гурт поселенилэн главаезлэсь Сергей Анатольевич Мухинлэсь но тыршемзэ. Солэн сюлмаськеменыз эшшо одӥг спонсор шедиз - Илдар Мухаметханович Султанов. Со ошмес корка выж вӧлдон понна пиломатериал висъяз.

- Матысь дыре ошмеслэсь тусьсэ но воштыны малпаськом,- шуиз Зинаида Ивановна, быдэстэм но быдэстоно ужъёс сярысь вераса.

- Узьмаг та, зэмос узьмаг! - шуиз Наталья апай Ишмурзина, ошмес котырысь интыез дунъяса.

- Инмар тазалык мед сётоз тӥледлы, Зина, таӵе ӟеч уж лэсьтэмды понна - ватсаз на кышномурт.

Нимыз но ошмеслэн узьмаглы тупась - «Дун-чылкыт Натальялэн ошмесэз». Соин валче черкысь нимысьтыз Дун-чылкыт Натальялэсь оброссэ но ваиллям.

Зэм но, ӟеч кидыслэн тысез но ӟеч. Ӟеч сямъёс вылын будэм нылпиос асьсэос но ӟечлыклэсь дунъетсэ валало, мукетъёслы но адӟем карымон луо.

Р.S. Ошмесэз радъямзы понна Зинаида Гришкиналы, Добромысловъёслэн семьязылы но юрттӥсьёссылы Вылын Ушма гурт калык но тау каре.

2016 ар Татарстанын вуосты утён арен ялэмын. Котькуд гуртлэн аслаз яратоно ошмесэз, шурез вань. Милям Вылын Ушма гуртамы но вань чылкыт вуо, шулдыр инкуазь сэреге интыяськем Иван-ошмесмы. «Иван» ним ачим гинэ гожтӥ. Малпасько, таин соглаш луоз вань гурт калык. Та ошмес котыре Иван Добромысловлэн юртэз интыяськемын. Гужем но толалтэ соос кузпалэныз Марфа апаен та дуно ошмесэз котьку утялтыса, чылкыт возизы. Жаляса верано, Иван агай та улонысь вазь кошкиз (вылаз усем сюез небыт мед луоз). Но ошмес куштэмын ӧвӧл. Иван агайлэн нылыз, «Азьлане» газетлэн редакцияз ужась Зинаида Гришкина туэ 2016 арын та ошмеслы выль корка (калайлэсь со) лэсьтыны коньдон висъяз. Тодмантэм чебер луиз ошмес. Иван-ошмес шуыны но луэ. Нылыз атаезлэсь йылолзэ азьланьтэ. Та ӟеч ужез атайзэ тодэ вайытоз, сӥлы кароз. Та ужын Зиналы юрттӥзы Юра выныз но гуртысь пиосмуртъёс. Вань гурт калыклэн нимыныз гажано Марфа апайлы, Гришкина Зинаидалы, Добромыслов Юрийлы но соослы юрттӥсьёслы сюлмысь тау каремме вуттӥсько! Соослы юн тазалык, шуд, кузь гумыр сӥзисько. Ӟечез асьсэлы но ӟечен мед берытскоз. Нош ошмес соосты чылкыт вуэныз секталоз. Гурт калык но, та ошмесысь ву басьтыкуз, мисьтаськыны ветлыкуз, тау карыса гинэ кошкоз.

Огпол Ошмеслэн чырткем Шапыкез

Мусо анаезлэсь тазьы куриськиз:

«Лэзь тон, дуно анае, дунне адӟыны,

Паськыт шуръёсысь эшъёс бырйыны!»

Ошмес нош лэзиз чырткем нылашсэ,

Дунне адӟемез кыдатоз мылкыдзэ.

Бызе Шапык, кырӟаса жильыртэ,

Паськыт шуръёсыз адӟыны со дыртэ.

Вуиз ни со Шушмое

Ма меда вите сое?

Пыриз ву пыдсы -

Паймиз чорыглы.

Ширтӥз азьлане

Берытскиз, позырскиз

Сюре вал чипей ыме!

Шапык ӝог мозмытскиз!

У-у-Ух!!!

Тани ву пыдсысь адӟиз жуг-жагез.

Кинъёс ву пыдсы сое вуттӥллям?

Кыӵе адями ваем та жагез?

Кызьы киосыз куштыны ӝутскиллям?

Мӧзмыт кариськиз чырткем Шапык

Таӵе учыр ӧз шумпотты чик.

«Кошко, утчало на чылкыт интыос,

Кытчы вуымтэ адями киос»

Кема со пожамтэ шуръёсты

…з шедьты дуннеысь соосты.

Бӧрдӥз, куректӥз

Инме со ӝутскиз.

Эшъёс шедьтыса

Пилемлы берытскиз.

Бертӥз зорлы пӧрмыса,

Вордскем палъёсаз мӧзмыса.

Вань адӟемзэ со мадиз Ошмеслы

Сюлэм висёнзэ жильдӥз анаезлы.

- Адямиос! Тӥледлы вазиськисько

Вань шапыкъёсын ӵош мон курисько!

Чылкыт возе ошмесъёсты, шуръёсты!

Эн пожалэ соосты!

Юоно вуос ӧжыт Музъемын.

Котькуд ошместы мед луоз чотын.

Тӥ бордын гинэ милям улонмы,

…д ке утелэ ваньмы куасьмомы!

Котькуд калык понна дуно

Ошмес, кудӥз чылкыт вуо.

Туж кемалась Ушма дорысь нюк пыдэсын

Вордскиз чылкыт синмо ошмес.

Трос бадьпуос ошмес котырын,

Мушъёс гужгето чылкыт омырын.

Куартолэзе уӵыед чирдылэ,

Мусо крезьгурез сюлэмме бугыртэ

Сюрс дун шапыкъёс жальыртыса

Кошко гурт калыкез шумпоттыса.

Гужем татын пиналъёс пыласько,

†ӧж, ӟазегъёс но отчы итӥсько.

Чылкыт ошмеслы йыбыртто пудоос!

Дун вуэныз пыласько бурдоос!

Котькуд лулос вуэзлы шумпотэ,

Дуно ошмеслы котькудӥз тау каре!

Чебер сяськаос котырзэ шулдырто,

Сьӧд пилемъёс лыктыса гудырто.

Ошмес нош зорлы шумпотэ,

Синзэ зор вуэн пылатэ.

Зор вуэн огазе ӧръяськиз.

Ошмесмы Ушминка шурлы пӧрмиз.

…з лу вормыны бызиз азьлане,

Дун вузэ вуттӥз Шушмое.

Ошмес син вуоссэ келяса,

Выль шапыкъёссэ пумита.

Улэ но шока, буса дун ошмес

Люкта дун вуэн калыкмес.

Ушма калыке, чылкыт ошместэ

Тон эн вунэты, утьы сое!

Тулыс но гужем, сӥзьыл, толалтэ

Ческыт вузэ - со котьку вае.