20-тӥ шуркынмонэ Ципья гуртысь лулчеберетъя юртын Леонид Дмитриевич Сапожниковлэн «Удмурт шыкысысь ваньбуръёс» бичетэныз тодматскон ужрад ортчиз
Та пумиськонэ вуизы вордскем шаерзылэн историеныз но сям-йылолъёсыныз тунсыкъяськись адямиос, лулчеберет но дышетон удысъёсын ужасьёс. Ужрадэ озьы ик пыриськизы ёросысь исполнительной комитетлэн кивалтӥсез Айдар Хайрутдинов, солэн кивоштӥсез Ильгам Гайнутдинов, Балтась ёросысь удмуртъёслэн «Кенеш» НКА-зылэн тӧроез Ольга Пчельникова, ёросысь лулчеберетъя ёзэтлэн кивалтӥсез Ильназ Петров, Балтась ёросысь валтӥсь библиотекалэн директорез Резида Зарипова но мукетъёс.
Нош валтӥсь куноос луизы Кукмор ёросысь Лельвиж гуртысь, Малмыж ёросысь Пор-Китяк но Порез гуртъёсысь, Мари-Турек ёросысь Ӟаны Починка гуртысь но асьме ёросысь Сырья гуртысь вуэм фольклор ансамбльёс но самодеятельной коллективъёс. Соослэн выступлениоссылы луыса презентация йӧскалык лулчеберетлэн зэмос праздникезлы пӧрмиз.
Пумиськонын куноос книгалы инъет луись рос-прос эскерон уж сярысь тодӥзы. Л. Д. Сапожниковлэн ужез огазеяз туж узыр материалэз — калык кырӟанъёсты, аспӧртэмлыко эктонъёсты но шошма удмуртъёслэсь сяме пырем шудонъёссэс.
Презентация шуныт но эшлыко атмосфераын ортчиз. Лыктэмъёс та книгалэсь туж бадӟым кулэлыксэ пусйизы но авторлы сюлмысь тау каризы удмурт калыклэсь тодэ ваёнъёссэ но сям-йылолъёссэ утёнэ пыриськемез понна.
Нет комментариев