Вуоно пумиськытозь!

— Ужрадэ асьме ёросысь пиналъёс но пыриськизы. Ципья шоръёзо школаысь Григорьева Кристина кылбур вераз, Ӟаны нылпи садысь Камаев Антон но Покчи Лӧзя школаысь Агеев Денис кырӟазы. Озьы ик чебер кырӟаны быгатэмзэс возьматӥзы Покчи Лӧзя школаысь «Жингрес куараос» ансамбльысь нылъёс но. Нош Ципья школаысь 3-тӥ классын дышетскись нылъёс задор эктонэнызы учкисьёсты шумпоттӥзы. Казаньын Калыкъёслэн эшъяськон юртазы выступить кароно нылпиосмылэн лыдзы уногес луыны кулэ вал но, жаляса верано, висьыны усеменызы куд-огъёсыз пыриськыны ӧз быгатэ, — ивортӥз Балтась ёросысь удмуртъёслэн «Кенеш» НКА-зылэн тӧроез Ольга Мироновна Пчельникова.

Гала-концертэ пыриськем пиналъёсты Татарстанысь удмуртъёслэн НКА-зы синпель кузьымъёсын но Татарстан Элькунысь естественной историяя музее экскурсиен шумпоттэм.

Таиз «Мудорвай» конкурс юбилейной луэменыз тодэ кылёз. Тодӥськоды на ке, нырысетӥзэ та вожвылъяськон ортчем вал 2016-тӥ арын. Со дырысен вить ар но ортчем ини. Со вить ар куспын кӧня нылпи та конкурс пыр потӥз. Вить ар трос дыр ӧвӧл ке но, со оскон сётэ ӟеч малпанэн кылдытэм вожвылъяськон сяме пыроз но кузь гумыро луоз шуыса.