Ымусьтон нуналэ Ципьяысь черкын

7-тӥ толшоре Ципьяысь Пресвятой Троицалэн черказ Ымусьтонлы сӥзем чебер ужрад ортчиз. Со радъяськиз воскресной школае ветлӥсь нылпиослэн но соослэн дышетӥсьёссылэн кужыменызы.

Котькуд оскись православной семьяын дано каро Иисус Христослэсь вордӥськон нуналзэ: 40 нунал ӵоже кыстӥськем визь йылпумъяськем бере, котькуд юртын ческыт сиёнъёс дасяло, куноосты пумитало, матысь адямиос ог-огзэс кузьымъёсын шумпотто. Асьме палан но та сям-йылол азьло дырысен возиське.

Арлы быдэ ёросамы Ымусьтон праздникез бадӟым карыса пусъё — черкъёсын праздник вӧсьёс ортчо, гуртъёсын калык понна концерт программаос дасясько. Но, жаляса вераны кулэ, пӧртэм мугъёсын сэрен, радъясьёслэн туэ сыӵе концертъёсты дасямзы ӧз луы. Ципьяысь нылпиос но концерт программаез азьвыл аръёсы кадь клубын возьматыны ӧз быгатэ — ужрадэз Ципьяысь Пресвятой Троицалэн черказ радъязы. Но со шоры учкытэк, концерт нылпиослы но, анай-атайёслы но, черке ветлӥсь прихожанъёслы но кельшиз. Нылпиос пуштросо сценка возьматӥзы, сюлме пыӵамон кылбуръёсты веразы, чебер кырӟанъёсынызы но шумпоттӥзы. Отец Владимир, люкаськем калыкез Ымусьтонэн ӟечкыласа, ваньзылы тазалык, шудбур сӥзиз но пусйиз, черклэн ӧсъёсыз праздник нуналэ гинэ ӧвӧл, котькин понна но котьку усьтэмын шуыса.

Вераны кулэ, концертэз туэ кызь нылпилэн пыриськеменыз гинэ но (тросэз соос пӧлысь черк бордын ужась воскресной школае ветло) тунсыко радъяны быгатӥзы. Та понна тол каникулъёсы, дыр шедьтыса, репетицие ветлэм нылпиослы, соослэн анай-атайёссылы, воскресной школаын ужась дышетӥсьёслы тау шуыны кулэ.

— Туэез ужрад черкын гинэ ортчиз ке но, малпаськомы, умой пӧрмиз, дыр, шуыса. Нылпиос репетициосы ветлӥзы, тыршыса дасяськизы сценкаез пуктыны, кылбуръёссэс но умой дышетскизы. Тросгес нылпиос пыриськысалзы ке, эшшо но умойгес, шулдыргес луысал. Оскиськомы, вуоно аре нылпиос тросгес луозы шуыса. Шумпотымон, ужрад черкын ортчыса но, адями ӧжыт ӧй вал, нылпиоссэс ваемзы но мылкыдэз ӝутэ. Туж шумпотымон вал нылпиослэсь дасям кылбуръёссэс кылзыны. Та чебер традицимы — Ымусьтон концертэз дасян но нылпиосты шумпоттон — азьвыл но мед азьланьтӥськысал, — шуизы воскресной школаысь дышетӥсьёс.

Арлы быдэ кадь ик, праздникез радъям нылпиосты ческыт кузьымъёсын но пусйизы. Чебер традицилы пӧрмиз Ымусьтон праздникез учкыны лыктэм нылпиосты ческыт кузьымъёсын шумпоттон но. Пусйыны кулэ, арлы быдэ сямен нылпиослы ческыт кузьымъёсты дасяны юртто черке ветлӥсь прихожанъёс, ачиз черк. Концерт программа йылпумъяськем бере, ужрадэ лыктэм котькуд нылпилы, кылбур вераны луонлык кылдытыса, кузьым сётӥзы. Нылпиос шумпотыса дышетскем кылбуръёссэс веразы, асьсэлэсь анай-атайёссэс выступлениосынызы шумпоттӥзы.

Нялтас вераса, туэ праздниклы дасямын вал 120 кузьым. Черкын ортчем ужрад бере кылем кузьымъёсты черке ветлӥсь, но висеменызы сэрен ужрадэ пыриськыны быгатымтэ Ципьяысь но мукет матысь гуртъёсысь нылпиослы сётъязы.