Хезмәт

18 куартолэзь — Музейёслэн калыккуспо нуналзы

Музей но Гарифзян Галиевич — люконтэм

Музей — со выж, кудӥз ортчемзэ герӟа туннэ нуналэн. Со ӧвӧл кыӵе ке огшоры, арбериосты но артефактъёсты возён инты, со озьы ик шумпотон но умой мылкыд басьтыны, дырез каньыл ортчытыны но выль тодон-валан шедьтыны луонлык. Музейын нуналлы быдэ ужаса, вань со арбериослы но экспонатъёслы кызьы ке но дышиськод.

Нуналмысь ужъёс-бызьылонъёс котырысь ваньзэ ньыло но сурало. Но куке тон лыктӥськод музее нырысетӥзэ, соку ини воксё мукет мылкыдъёсты шӧдӥськод, котырысь арбериос шоры мукет синмын учкиськод. Музей — со пичи но паймымон дунне, аслаз ортчеменыз но вуоноеныз, ас шуг-секытъёсыныз но малпаськонъёсыныз. Татын мукет улонысь арбериос, татын омыр ик мукет. Уно пӧртэмез та кык «дуннеос» куспын. Ципья черкогурт шорын сылӥсь та марӟан, кудӥз нимаське музей, ӧте но кыске адямиосты бордаз. Ваньзэ учкем бере потӥськод татысь синмаськыса но паймыса, шумпотонэн тырмем мылкыдын но кыӵе ке но пуш вожанэн — кыӵе уно тодо татын асьме вашкалаосмылэн улонзы сярысь. Татын туж кулэ тодыны экспонатъёслэсь вань пуштроссэс, валаны, кызьы соос татчы шедизы. Кӧня бен кужым понэмын та уже, сыӵе бервылъёсы вуон понна. Оптимист адями луэм сяна, быгатоно на «ледокол» выллем кужмо ваньмыз пыр ортчыны. Сыӵе адямиос пӧлысь луэ асьмелэн музей кылдытӥсьмы но — солэн директорез Галиев Гарифзян Галиевич. Солэн тыршемезтэк но юн сямызтэк ӧй луысал али сыӵе паймымон «Калыкъёслэн эшъяськонзы» музей. Кыӵе уно отын арбериос но экспонатъёс, книгаос но документъёс, уно мукетыз, мар мылкыдтэм кельтытэк паймытэ лыктэм адямиосты. Милям директормы ачиз но, экспонатъёсыз выллем, уникальной, одӥг лыдэн экземпляр. Со нюръяське быдэс дуннеысь зэмлык понна, ассэ ачиз возьманы быгатӥсьтэм, капчи сӧриськись лулос дуннеез, кудӥз нимаське Музъем планетаен, утён понна. Нюръяське, адямиос ӟечгес мед луозы шуыса, ог-огенызы асьсэды умойгес мед возёзы , мед юрттозы лябъёслы, куанеръёслы но кынартэм муртъёслы шуыса. Тросгес луысалзы ке музъем вылын со кадь адямиос, дунне, оло, воштӥськысал, дыр, умой пала. Галиев вань сюлэмзэ сётэ ас калыкезлы, яратоно ужезлы. Котькуд адями уг быгаты 90 аресаз но сокем тыршыса ужаны общество понна, калык понна. Ӧй луысал ке солэн чурыт, пуктэм ужпуме вутскон сямыз, ӧй быгатысал со улонын басьтыны ваньзэ сое, мар вань солэн али. Ӧй луысал сыӵе музей. Вань улонэз ӵоже, шутэтсконъёстэк но больничнойёстэк, жадёнэз но секытэз шӧдытэк, Гарифзян Галиевич тырше кузьыли выллем. Куке солэсь юало: «Ӧд жадь на-а али?», со шуэ: «Йырсазьы ужатозь, Атаймузъем понна, калыклы ӟеч карон понна тыршо, куке йыры малпаськемысь дугдоз, соку ачим шутэтсконэ кошко». Тӥни сыӵе со, ужась но мыло-кыдо, милям визь-кенеш сётӥсьмы. Со ӵем вералля, кыл огшоры кулэтэм вераськонъёс понна сётымтэ шуыса, со сётэмын чебер вераськыны, пуштросэз пыр-поч валэктыны. Кыӵе быгатыса но чебер вуттэ со котькуд экспонатлэсь историзэ. Кыӵе быгатыса вераське со пӧртэм поколениысь адямиосын, егитъёсын визьнодан вераськонъёсты нуэ. Сӥ но дан солы, туж бадӟым тау вань лэсьтэм ужъёсыз понна.

Музей но Гарифзян Галиевич — люконтэм. Уг луы син азе пуктыны музеез кивалтӥсезтэк, наставникезтэк. Соос юн герӟаськемын ог-огенызы, ог-огзылы ватсэт луо, музей сярысь гожтыку, со сярысь гожтытэк кельтыны нокызьы уг луы. Музей — солэн тыршемез, солэн данъяськонэз, ӟеч ужез! Таланто, визьмо, пуктэм ужпумаз вутскись сямо, со кылдытӥз ас сэрегзэ, нырысь дыре — пичигес, но берло со ёросмес ортчыса но будӥз. Со кылдытӥз музейзэ Вормонлэн 20 ар тырмонэзлы, соин туэ асьмеос пусйиськом музейлэсь 55 арзэ но Быдӟым Вормонлэсь 75 арзэ. Музейлэн юбилей лыдпусэзлы но директормылы сӥзем потэ кӧня ке чуръёсты.

Вормонлэн 20 ар тырмонэзлы мар вал малпамын,

Ми чакламы быдэстыны.

Мыныса пичи вамышъёсын,

Тыршимы со ужпумъёсы вутскыны.

Арысь аре бичамы багажмес,

Уно люкаськиз — шумпотымон!

Музеймы паськытаз но будӥз,

Инты ӧжыт луиз милемлы сэргын...

... Сюлмысь мынам потэ сӥземе,

Ноку медаз вуны сюрес музее!

Егит поколение тодаз мед возёз,

Вуоноын умой ужъёс мед лэсьтоз!

Директормылэсь ужамзэ мон «витьлы» дунъясько, малы ке шуоно со али но аслэсьтыз тодэмъёссэ паськытатэ, киоссэ лэзьыса уг пукы. Со уно лыдӟиське, гожъя гожтэтъёс, кылзэ радио но учке телевизор, вуонолы планъёс малпа. Ӧй быгатысал ке Гарифзян Галиевич азьпал учкыса улыны, ӧй вутскысал, дыр, со сыӵе вормонъёсы. Асьмеос понна со «улэп легенда», «ветлӥсь энциклопедия». Мар ке но тунсыкъяськытӥз ке, яке валантэм луиз ке, ӵемысь ми солы вазиськиськомы. Со ваньзэ рос-прос валэктоз, пример вералоз, ноку нокинэ уг палэнты. Кыӵе гинэ юан эн сёты, солэн ваньмызлы вань валэктонэз. Милемыз но дышетэ: «Уг тодӥськы шуыса, ноку эн вералэ, юанлы одно ик ответ сётоно». Котьку астэ йӧно возьыны быгатоно. Гарифзян Галиевич — Быдӟым Отечественной ожысь ветеран, ужысь герой, асьме дырмылэн героез. Ас сюрес вылаз со вань шуг-секытъёсты вормиз. Ас тыршеменыз но пыр-поч ужаменыз со возьматӥз котырысь адямиослы, мар быгатэ лэсьтыны. Со дышымтэ сётскыны, со дышемын вормыны! Та сярысь верало ми дорысь дас куинь томен отзывъёсын книгаын кельтэм гожтэмъёс. Тани соос пӧлысь куд-огъёсыз:

...Жадёнэз тодӥсьтэм Гарифзян Галиевич. Пумтэм оскымон но таланто адямиос гинэ быгато огшоры тырттэм интыын сыӵе шедевръёс кылдытыны, кудъёсыз юртто тодыны но утьыны асьмелэсь историмес...

ТР-ысь калыкез дышетонъя министр, профессор В.Г. Гайфуллин.

... Гарифзян Галиевич! Тӥ Инмарлэн адямиез. Тӥляд нимысьтыз миссиды — калыклэсь тодэ ваёнъёссэ утьыны но ваньзылы шумпотон кузьманы, кин кылэ но адӟе тӥлесьтыд уждэс. Бадӟым тау Тӥледлы Быдӟым ужды понна: юн тазалык Тӥледлы но Тӥ понна данъяськон нылпиостылы, внукъёстылы но правнукъёстылы. Ми данъяськиськом сыӵе адямиосын. Тӥледын улэ Россия!!!

Казань, Зяблова З.Н., Царева А.И. РЦВР МО РТ, 15.10.2008 г., том 13.

... Гарифзян Галиевич выллем паймымон адямиос вань дыръя, уз куанермы Татария музъем но сяськаяськоз Россия, аслэсьтыз вормонъёссэ тодаз возьыса!

РФ-ысь Генеральной Прокурорлэн Нырысетӥ воштӥсез, Москваысь генерал-лейтенант, 28.06.2008 г.

Будӥсь поколение понна музей — туж кулэ но дуно инты. Уно информациез быгато соос татын шедьтыны. Ортчем улон сярысь, луэм событиос сярысь тодон-валанъёс, ваньмыз татын «тэркы вылын» выллем сётӥське. Кызьы шуо адямиос: «Сю пол кылытозь, одӥг пол адӟы». Музейын асьмеос ас синмынымы адӟыны быгатӥськом крестьян калыклэсь ужан тӥрлыксэ, кыӵе ӧнерен выриллям, мар кариллям. Валтӥсез, вань ужъёс быдэсъяськиллям киын, нокыӵе механизация со дыре луымтэ. Ваньзэ адями но вал кужымен лэсьтӥллям. Кызьы пӧртэм калыкысь адямиос ог-огзылэсь дӥсьёсынызы, улон интыенызы но улэменызы висъяськиллям. Макем уно пӧртэмлыкъёс луиллям узыръёс но куанеръёс куспын, маин соос висъяськиллям. Та музее лыктэмъёс трос тодыны быгатозы уно аръёс ӵоже татын люкаськем книгаосысь, кудъёсыз ӧвӧл гурт библиотекаын.

Кызьы вераз быдӟым ӟуч тодосчи Михаил Ломоносов ас научной ужаз: «Аслэсьтыз ортчемзэ тодӥсьтэм калыклэн ӧвӧл вуоноез». Асьмеос выжыосмес вунэтыны кулэ ӧвӧл, малы ке шуоно соос луо асьмелэн инъетмы. Котькуд адямилэн вань узыр историез, уно ӵыжы-выжыосыз но вашкалаосыз, кудъёсыз ваньзэ лэсьтӥзы, туала поколение сяськаяськись шаерын мед улоз шуыса. Оскисько, вуоно поколение та тодон-валанлэсь дунлыксэ валалоз шуыса, тодаз возёз но уз вунэты вордскем шаерезлэсь историзэ, йылэтоз сое ас тодон-валанъёсыныз но азьпаллы малпанъёсыныз муромытоз.

«Калыкъёслэн эшъяськонзы» музейын ужась Анфиса Ермохина

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: музей
Нравится
Поделиться:
Реклама
Комментарии (0)
Осталось символов: