200 аръем история

Лулысь-сюлмысь басьтӥськиз со выжы нюжаосты эскерон, выжы писпузылэсь выль вайёссэ утчан борды.

— Лариса Михайловна, кытысен, ма бордысен кутскиз ӵыжы-выжы кусыпъёсын тунсыкъяськонды?

— Ваньмыз кутскиз ог 12 ар талэсь азьло, 2010-тӥ аръёсысен. Выжымес эскерыны мылкыд кылдӥз, эшшо ке ми номыр соку ӧм тодэ асьме ӵужатаймы сярысь, кудӥз, кызьы берло тодмо луиз, концлагерьын кулэм. Конечно, туж потэ вал ваньзэ тодэм. Кутскиз юалляськонъёс бордысен. Анайлэсь юалляськи: кызьы, ку, ма но малы? Эшшо вал на ӵужанайлэн тодэ ваёнъёсыз, со вералляз аслаз улэмез сярысь. Ӵужанай бадӟым семьяын улэм. Соос куинь кен одӥг коркан улӥллям. Со вера вал, ваньзы тупаса, эшлыко улӥзы шуыса. 7 нылпиоссы но 3 кенъёс ноку но куспазы ӧз, пе, керетэ. Син азяды пуктэ ай сыӵе суредэз али дыре…

— Выжы писпуэз кылдытонын, ӵыжы-выжыослэн тодэ ваёнъёссы сяна, бадӟым юрттэт сёто архив сведениос. Малпасько, тӥ но архив сюресэз ортчиды, дыр…

— Озьы, ветлӥмы ми Кремльысь йӧскалык архиве. Отын немецъёслэн сётэм архивзы вал. Со архивысен тодмо луиз: милям ӵужатаймы, зэмзэ но, пленэ шедем но кулэм отын тифен висьыса, туж егитэн кулэм, солы соку ваньзэ-ӧвӧлзэ 35 арес гинэ луэм...

Ӵужатай бордысен нюжаос вуттӥзы солэн агай-вынъёсыз, атаез доры, атаез бордысен песятаез дорозь но мукет ӵыжы-выжыосыз дорозь. Тӥни озьы ми сизьым, кытын ке тямыс поколенилэсь выжы писпузэ люкамы. Кин ке понна со ӧжыт, дыр, кинлы ке трос потоз. Но котьма ке но со — 200 аръем история.

— Вожвылъяськонын тӥ дышетӥсьёслэсь династизэс возьматӥды, озьыен, выжыяды дышетӥсьёс трос…

— Озьы. Родословноез люкаса, ӵыжы-выжыосылэсь вордскем аръёссэс но профессиоссэс, озьы ик кузпалъёссэс-нылпиоссэс гожтӥ. Собере мынам сузьет кылдӥз: Николай Егорович — дышетӥсь, дьякон; солэн Сергей пиез — дышетӥсь, солэн кузпалэз — дышетӥсь, мынам ӵужатае — дышетӥсь… Озьы милям «вайамы» ваньмыз дышетӥсьёс луыса потӥзы. Дышетӥсьёслэн династизы 7-тӥ поколениен лыдъяське, мынам Настя нылы 7-тӥ поколение луэ.

Эшшо одӥг «вайысь» потӥллям бухгалтеръёс, мукетысьтыз — кивалтӥсьёс: нимаз ужбергатӥсьёс, огазеяськонъёслэн кивалтӥсьёссы…

— Утчалляськон ужын шуг-секытъёстэк но ӧз луы, дыр…

— Нырысетӥез но валтӥсез шуг-секыт тани ма бордын вал: Покчи Лӧзяысь черклэн архивез ӝуам, соин нокыӵе сведениос ӧвӧл. Таин сэрен ум быгатӥське али ми люканы вань кулэ информациез, архивын кӧня ке пол луимы ке но ини.

Мазэ веранэз, родословноез люкан — тунсыко уж, но со трос кужымез, тыршемез но дырез кулэ каре, нош дырен шуг-секыт кылдэ ик, со ноку но уг тырмы.

— Озьы ке но дыр шедьтӥллямды, шӧдскымон бадӟым уж быдэстыны но кужымды тырмем.

— Уж та ӧрын али трос. Но мон туннэ нуналлы быгатӥ ини ӵыжы-выжы кусыпъёсын герӟаны Удмурт Лӧзяез. Отын быдэс гурт ӵыжы-выжыос луыса пото. Со «вайёс» пумен Ӟуч Лӧзя гуртэ выжо. Асьме «вайёсынымы» ми Покчи Лӧзя гуртэ, Ушмае  но вуимы. Озьы ик кудо-туклячи кусыпъёсъя ми тодмо удмурт гожъяськисен Григорий Медведевен но эшшо одӥг тодмо аспалэнымы, «Айкай» театрлэн кивалтӥсеныз Пётр Даниловен но ӵыжы-выжы нюжаосты шедьтӥмы. Озьыен, малпано ке, быдэс поколенилэсь родословнойзэ кылдытыны но герӟаны луэ.

— Нош «Эхо веков в истории семьи – Тарихта без эзлебез» фестиваль-конкурсэ пыриськемды сярысь ма верасалды?

— Конкурс — со понна ик со конкурс. Ваньмыз капчиен ӧз сётскы. Люканы кулэ ӵыжы-выжыосты, ваньзэ радъяны. Ми вань гурт поселениен дасяськимы шуыны луоз. Мынам вань бускельёсы юрттӥзы. Кин ма кариз: кин пыжиськиз, кин кубиста сылалтӥз, кин холодец пӧсьтӥз. Угось милемлы кулэ вал возьматыны удмурт ӝӧкез. Мыло-кыдо юрттӥз Покчи Лӧзя шоръёзо школа. Школалэн коллективез ӝог гинэ ваньзэ люказ, музей но, адӟытон экспонатъёсты но. Покчи Лӧзя нылпи сад туж юрттӥз. Озьы ик таукаремме вуттӥсько Вылын Ушма нылпи садлы, колхозлы, ёросысь исполнительной комитетлы, лулчеберетъя ёзэтлы, нимаз ик кивалтӥсезлы Ильназ Ильич Петровлы, Балтасьысь Лулчеберетъя центрын ужасьёслы но. Юрттӥз Гаврилова Нина Михайловна, милям пересь ӵыжы-выжымы. Нина апай али ваньзэ тодэ. Тупаз Удмуртиысь, Можгаысь но Ижкарысь, ӵыжы-выжыослы вазиськыны, Москваен но Германиен кусып тупатӥмы. Кинэн ке но азьло кусып возимы, кинэ ке но воксё уг тодӥськы вал. Соосын но вераськимы. Нокин но юрттыны пумит ӧз луы, ваньзы юрттӥзы. Тау ваньзылы, кин юрттӥз.

Конкурсын выжыысьтымы егитъёсты но, арлыдоосты но возьматэм потӥз. Диапазонмы вал 4 аресысен 82 аресозь. Сцена вылэ потэмъёс пӧлын тужгес арлыдоез — мынам атае — кубызчиослэн пӧртэм конкуръёсазы пыриськись, Ижкарын тужгес умой калык кубызчиен лыдъям Михаил Ефимович.

Йылпумъяса вераме потэ, та выллем конкурсъёсы пыриськон — туж кулэ но пайдаё уж, со юрттэ вуныны кутскем ӵыжы-выжыосты тодэ вайыны, выльёссэ тодыны. Конкурслы дасяськыкумы, бадӟым уж быдэстӥмы, династимылэн кылдэмез сярысь юалляськыса, вань ӵыжы-выжыосынымы кусып тупатӥмы. Та но выжы нюжаосты юнматыны юрттэ. Нылпиосмы туж мыло-кыдо пыриськизы, соослы но туж тунсыко вал тодыны пересь песянай-песятайёссы сярысь. Мон малпасько, туж кулэ аслэсьтыд выжыдэ тодыны но ӵыжы-выжы нюжаосты утьыны, юнматыны.

— Азьпаллы малпанъёсты…

— Потэ книга гожтэм, со книгаын ӵыжы-выжы кусыпъёсты пыраклы кельтон понна. Вуж туспуктэмъёсты люкасько. Малпанъёс али вань. Эшшо но эшшо родословноен ужаны. Оло, куке но мон сое ваньзэ лэсьто, тужгес кулэез — ужпум но быгатонлык медло.

Зэм, ужпум но быгатонлык — ваньмылы!

P.S.: Балтасьын ортчем вожвылъяськонэ Кукмор ёросысь удмурт семья но пыриськиз. Соос но асьсэ шулдыр мылкыдынызы, сям-йылолъёсынызы учкисьёсты паймытыны быгатӥзы.