27-тӥ толсуре спасательёслэн нуналзы пусйиське

27-тӥ толсуре спасательёс ӧнер праздниксэс пусъёзы, туэез праздниксы юбилейной но луэ — сое пусйыны кутскем дырысен 30 ар ортчем ини. Праздниксы азьын ТР-ысь Саба ёросысь тылпу кысон отрядлэн Ципьяысь нимаз постаз куное ветлӥ.

Та пост ужаны кутскем 2009-тӥ арлэн 1-тӥ январьысеныз. Озьыен, организация егит али: 1-тӥ январе солы 12 ар тырмоз. Азьвыл со Казаньысь отрядлэн составаз луэм, собере сое Саба отрядэ пыртӥллям. Та сярысь мыным мадизы постлэн кивалтӥсез Дмитрий Щербаков но отделенилэн командирез Эдуард Перемечев. Нялтас вераса, соос, монэ пумитаса, трос тунсыкозэ веразы ужан интызы сярысь но, ӵош ужасьёссы сярысь но, ужан радзы сярысь но. Шӧдске: воргоронъёс ужзэс валаса, кулэезъя быдэсто. Соослэн вераменызы тодӥ, Саба ёросысь отрядэ 15 пост пыре шуыса но (Кукмор, Саба, Балтась, Мамадыш, Тюлячи, Атня ёросъёсысь постъёс). Али ужано юртсы но 2009-тӥ арозь луымтэ вылэм — луэм больницалэн гаражез гинэ, нош мукет люкетсэ пристрой карыса выльысен ӝутӥллям.

Ципьяысь нимаз постын 11 адями тырше

Ципьяысь нимаз пост дас сизьым гуртъёсты обслуживать каре (Пор-Кутеш, Карек-Серма, Тагашур, Арбор, Ципья, Вуж Ципья, Сизнер, Вукогурт, Сырья, Янгурчи, Куремьял, Улисьял, Дурга, Кургем, Кускем, Пижмара, Тархан).

— 2020-тӥ арын кык выездмы луэм, 2019-тӥ арын нош — сизьым, — журналэзлэсь бамъёссэ берыкъяса вера Эдуард Николаевич. 

Штатын дас одӥг адями лыдъяське: вить водитель, ньыль пожарной, отделенилэн командирез, отделенилэн кивалтӥсез. Балансазы кык пожарной машиназы вань. Одӥгез соос пӧлысь — резервной. Но со шоры учкытэк, котькудӥз машина котькуд минутэ выездэ потыны дась. «Ми котькуд тылпу потон учыре потӥськом, балтасьёс но лыкто. Котькуд тылпулэн рангез вань, — ужан радзы сярысь валэктэ Эдуард Перемечев. — 1-тӥ ранген тылпу ке, кытын ке жаг ӝуаз ке, ми гинэ потӥськомы. 1-БИС ранген тылпу луиз ке, одно ик ципьяос но, балтасьёс но пото. Одӥгез машина милям, одӥгез соослэн. Кыкетӥ ранген луиз ке, ми ини кык машинаен потӥськомы, балтасьёс но кык машинаен вуо. Та секыт учыръёсы луэ ини. Кыкез но машина котьку боевой дасьлыкын. Котьку машинаын вуэз но вань».

Машина нуллӥсьёссы татын  вить кузя вылэм шуыса гожтӥ ини. Бензинэн ужась машинаен кык водитель ветлэ, дизельной машиналэн куинь водителез.

— Котькуд нуналэ сменае пото пожарной но водитель. Нуназе татын луэ витетӥез водитель но мон, — вера кивалтӥсь Дмитрий Николаевич. — Нырысь ик трос адямиос татын ужазы ини. Нырысь ик 11 ар ӵоже кивалтӥсь луыса Мингазов Радик Махмутович ужаз. Мон тани туэ март толэзьысен та должностьын ужаны кутски.

Дмитрий Щербаков — егит кивалтӥсь, Эдуард Перемечев — солэн бур но паллян киез

Дмитрий Ципьяысь постын арлэсь ӧжытгес ужа али, но ужаз ассэ юн возе. Ӧнерезъя со физкультурая дышетӥсь. Татын ужаны кутскыны секытгес вал, пе, но со дышытозяз гинэ озьы луэм. Тужгес секытэз со понна луэм кагаз ужъёслы, документация ласянь ужъёслы дышыны, адямиосын огъя кыл шедьтыны, пе, котьку быгатӥсько вал.

— Самой секытэз вал документ ужъёслы дышыны но нырысетӥ тылпу кысон учыре потэм бере документ гожтыны, кызьы но мар кароно пыр-поч валаса вуттымтэ бере. Мон ужаны кутскем дырысен кык тылпу луиз ини. Нырысетӥез учыр Комзавод гуртын вал. Отын жуг-жаг ӝуаны кутскиз. Тылпу потон интые ми Эдуардэн одно ик мыныны кулэ. Тылпу потон учыр кылдыку дорамы луиськомы ке, асьме машинаосынымы мынӥськомы. Нуназе ке — пожарной машинаен. Татын милям ньыль смена. Котькуд сменалэн ас ужез вань, соос со понна кылкуто. Лыкто, учко, — вера кивалтӥсь. — Огъя вераса, куспамы кыл шедьтыса ужаны тыршиськомы. Эдуард мыным ваньмыз ласянь юрттэ.

Эдуардлэн тодӥсь но опытэн ужась луэмез соку ик шӧдскиз: мае гинэ эн юа, котькуд юанлы секундаз ответсэ сётыны дась. Ужзэ пыр-поч быдэсъясь воргоронлэн ваньмыз аслаз интыяз: учёт нуоно журналъёсыз но, тетрадьёсыз но, пӧртэм кагазъёсыз но. Дмитрийлэн бур киез но, паллян киез но со шуыса верай ке, уг янгыша, дыр. Эдуард Николаевич татын 2012-тӥ арысен март толэзьысен ужа вылэм ини. Нырысь со пожарной луэм (ньыль арлэсь кемагес), табере — отделенилэн командирез.