31 толсуре Сала Кушкет гуртын Выль ар шулдыръяськон ортчиз

Жаляса верано, азьвыл аръёсы кадь спонсоръёссы туэ шедьымтэзы. Но Сала Кушкет гуртын улӥсьёс, ас кужыменызы коньдон люкаса, та праздник ужрадэз ортчытыны быгатӥллям. Со сяна, юрттэм на «Дуслык» общество но (кивалтӥсез Николай Колоколов).

— Зэмзэ ке верано, та шулдыръяськонэз туэ мон ачим радъяны тырши, — шуэ Сала Кушкетысь Людмила Тихонова. — Ини кӧня ке ар ӵоже йӧ вылын ортчытӥськомы праздникмес, малы ке шуоно нылпиос конькиен нискыланы ярато.

Людмилалэн верамезъя, туэ празднике туж ик трос калык люкаськымтэ. Нош ужез радъясь умой дасяськем (вераны кулэ, Людмилалы та ласянь юрттӥлям Марина Тарасова но Екатерина Петрова). Лотерея но шудытӥллям, кузьымъёс но трос дасяллям. Уйин, Выль ар вуэм бере, дискотекае но люкаськиллям. Шулдыръяськонын луиллям Тол Бабаен Лымы ныл но (Андрей но Елена Михайловъёс), пӧртмаськыса ветлӥсьёс но. Шумпотымон, нылпиос понна но нимысьтыз шудонъёс луиллям. Ђытэз шулдыртӥллям гуртысь мызганчиос — Виктор Камаев но Сергей Степанов. Таяз учыре урамын табанен чай юымтэзы ке но, ужрадзы гуртоослы но люкаськем калыклы туж кельшем. «Табаньзэ Йӧвылэпотон дыръя пыжомы ни», — оскытӥз Людмила Тихонова.

P.S. Сала Кушкет гуртын котькуд ужрадъёсты радъяны но ортчытыны юрттӥсь Людмила Тихоновалы вань гуртоосыз сюлмысь тау каро. Та сярысь ивортӥзы Сала Кушкетысь Анжелика Прокопьева, Елена Григорьева но Галина Пашкеева. Озьы ик сала кушкетъёс тау каризы ужрадэз шулдыртэм Тол бабаен Лымы ныллы, ваньзылы ужрадэз радъясьёслы но празднике вуэм адямиослы.