Аслэсьтыз кузь улон сюрессэ со сӥзиз вуоно поколениез визьноданлы

Нылпи дыре наставниклэсь ужзэ ӵемысь асьмелэн матысь адямиосмы быдэсто. Нырысь ик, анай-атайёсмы, нылпи садысь визьнодасьёсмы, школаысь дышетӥсьёсмы… Визь-кенеш сётон кулэ котьку но котькинлы. Со астэ шедьтыны, улонын шонер сюрес бырйыны но со сюрес вылысь кожытэк мыныны юрттэ. Наставник сётэ кенеш, мылкыда, тырмытэ кужымен но пыкет луэ.

Мынам личность луыса юнман сюрес вылам визь-кенеш сётӥсьёсы трос луизы. Котькудзылэсь мон аслым улонам кулэ луись уно гинэ сямъёсты басьтӥ. Соослэсь кенешъёссэс но верамъёссэс мон нуллӥсько сюлэмам, со кылъёслэсь зэмлыко луэмзэс ялан но ялан валасько. Сокем соос визьбуроесь…

Нош мар бен со сыӵе визьбуро луон (мудрость)? Валэкто Д.С. Лихачёв академиклэн кылъёсыныз: «Визьбуро луон — со визь но соин ӵош лякыт сям» («Мудрость — это ум, соединённый с добротой»). Визь но ӟеч сям. Соос котьку артысь мыныны кулэ, озьы ведь? Та сямъёсты нуллӥсь муртъёс — мынам наставникъёсы, мынам дышетӥсьёсы. Милям черкогуртамы, асьме ёросамы соосты уноез тодо… Соос уга одӥг гинэ поколениысь адямиосты визьнодамтэ. Со мынам нырысетӥ дышетӥсе — Чакмина Елена Васильевна, ӟуч кылъя но литературая дышетӥсь — Семовская Галина Николаевна, математикая дышетӥсь но школалэн директорез — Трофимов Василий Фёдорович, «Калыкъёслэн эшъяськонзы» музейлэн директорез — Галиев Гарифзян Галиевич…

2023 арын 29 южтолэзе Гарифзян Галиевичлы 96 арес тырмысал… Аслэсьтыз кузь улон сюрессэ со сӥзиз вуоно поколениез визьноданлы. Куке 1986 арын мон пыри дышетскыны нырысетӥ классэ, со Ципья шоръёзо школалэн директорез луыса ужа вал. Тодам на солэн интеллигентной тусбуйыз, строгой учкемез. Нош берло, куке мон школаын ини ӟуч кылъя но литературая дышетӥсь но классэн кивалтӥсь луыса ужай, улон монэ соин матынгес тодматӥз.

Г.Г. Галиевлэн кивалтэмез улсын дышетскисеным ӵош ми «История моего села» исследовательской уж гожтӥмы но Малмыж городын улоскуспо научно-практической конференциын умой выступить каримы. Озьы ик мыным но мынам дышетскисьёсылы шуд усиз 2020 арын Гарифзян Галиевич доры куное вуылыны. Со милемыз туж шуныт пумитаз. Милемлы паймымон потӥз, ас дораз ке но вал, дышетскисьёс доры со югыт дэремен но пиджакен потӥз. Залын сылыса, соос азьын визь-кенеш кылъёсын выступить кариз: «Умой дышетскыны кулэ!.. Визьнодан — валтӥсез. Тодон-валан но валтӥсь луэ, но визьнодантэк тодон-валан номырлы уг яра... Астэ ачид визьнодан — валтӥсез!..»

Али, директорлэн визьнодан ласянь воштӥсез луыса ужакум, пумиськон дыръя сётылэм кенешъёссэ мон уже кутыны тыршисько. Та интыужын кыкетӥ арзэ тыршыса, мон валасько, макем кылкутымон уж со — тыныд оскем адямиосты визьноданы. Со сюресэз, кудӥзъя мон туннэ вамышъясько, мыным ас кылъёсыныз но ӟеч ужъёсыныз кужмысь карытэк гинэ, палэнысен выллем возьматэм но соя монэ валтэм мурт азьын, озьы ик дышетскисьёсы азьын ас ужпумме мон табере рос-прос валасько.

95 аресэз тырмон арын педагог, благотворитель, Быдӟым Отечественной ожысь ветеран, «Калыкъёслэн эшъяськонзы» музеез кылдытӥсь Гарифзян Галиевич ас коньдонэныз дышетонысь но лулчеберетысь егит ужасьёсты данъясь фонд радъяз, дышетон, лулчеберет удысъёсын шӧдскымон люкетсэс пыртэм, Балтась муниципал ёросысь нылпиосты но егит муртъёсты нравственной, духовной, патриотической визьноданэ асьсэлэсь нимысьтыз бадӟым люкетсэс пыртэм ужасьёсты пусъён понна. Со премиез басьтэм нырысетӥ мурт луэменым мон данъяськисько. Быдӟым педагоглэн но бадӟым букваен верам наставниклэн киысьтыз таӵе данъетэз басьтон — со вылӥ шуд! Но таин ӵош мон валай, та вормон мон азе трос куронъёсты но пуктэ шуыса. Ӵапак соку мон соин лулпуш ласянь матын луэмме но шӧдӥ, со дыре ик ас ужелы но вордскем шаерелы яратонме но, нош озьыен, ас ужме вордскем шаерелэн дано гражданинэз луымон азьланьтыны мылкыдме но! Малпасько, ӵапак таӵе валанъёсты ик тыршиз, дыр, кылдытыны «ас дырызлэн героез» — Галиев Гарифзян Галиевич.

Тау Тӥледлы дунъянтэм ужъёсты но улонысь урокъёсты понна, Гарифзян Галиевич!

Нина Давлекова,

Ципья шоръёзо школаысь визьнодан ужъёсъя директорлэн воштӥсез