Азьлане: ортчем лёгетъёс, туннэ вамышъёс…

Отын политика но, калыклэн улэм-вылэмез, малпанъёсыз, мылкыдъёсыз, ортчем аръёслэн куараоссы... Гуртын социализм вакытэ ортчем нырысетӥ воштӥськонъёс, Быдӟым тылож но калык возёсэз ӝутон, комсомол лэсьтӥськонъёс, субботникъёс но демонстрациос, перестройка но секыт 90-тӥ аръёс... Та ваньмыз но ёрос газет бамъёсын ас интызэ шедьтӥз. Улонын ог-огзылы матын луисьтэм яке воксё пумит луись ӧръёс, удысъёс но газет бамын одӥг ужпумез быдэсто угось — калыклы ивор вутто.

Нош кызьы ваньмыз кутскиз. Берытскоме кыдёкысь 1933-тӥ аре. †апак со арын 20-тӥ толсуре ВКП(б)-лэн Балтась райокмез ёросын удмурт газет поттыны кутскон сярысь постановление кутэ. Озьы 1934-тӥ арны толшоре Балтась ёросысь типографиын «Азьлане» нимын удмурт газетлэн нырысетӥ номерез потэ. Солы редакторе тодмосто Николай Сергеевич Чакминэз, кылкутӥсь секретаре — Григорий Дмитриевич Халтуринэз. Жаляса верано луиськом, туннэ нуналэ но тодмо ӧвӧл, «Азьлане» газетлэн нырысетӥ номерезлэн потэм нуналэз. 1 толшорысен 12 толшорозь шуыса лыдъяське. Вылӥын верам та кык эшъёс газетэ селькоръёслэсь выступлениоссэс дасяло. Ачиз Николай Сергеевич отчы бадӟым статья гожтэ, кытыны пыр-поч валэктэ газет азьын сылӥсь ужпумъёсты. Со дырысь газет луэм 2 бамо, потылэм ньыль нуналлы одӥг пол. Ёрос газетмылэн историяз нимысьтыз инты басьтэ Ципья черкогурт. 20 ар ӵоже, 1938-тӥ арысен кутскыса 1958-тӥ арозь, «Азьлане» газет Ципья районысь Ципья черкогуртын потэ. Собере, Балтась но Ципья ёросъёсты огазеямзы бере, выльысь Балтасе берытске. 1958-1962 аръёсы Балтасьын потэ. 1962-тӥ арын нош ик районъёсты огазеяло, Балтасез пырто Арча ёросэ. Та вакытэ удмурт редакциез воксё быдто. Но Кукмор удмуртъёс куремен ог кык толэзьскын «Азьлане» выльысь ас лыдӟисьёсыз доры вуэ, но, жаляса верано, нимаз газет статуссэ ыштыса. Арчаын «Азьлане» дубляж, яке бигер газетлэн удмур кылэ берыктэм вариантэз луыса потыны кутске, нимзэ но воштэ. Озьы 1962-тӥ арысен 1965-тӥ арозь газет «Коммунизме» нимын потэ. Нош ини 1965-тӥ арын ёрос газет выльысь берытске Балтась посёлоке, азьвыл нимзэ но берыктэ — «Азьлане» луэ.

85 ар ӵоже «Азьлане» форматсэ но, быдӟалазэ но, потон радлыксэ но вошъяз. Вошъяськизы озьы ик нимыз но, полиграфиез но, статьяослэн тематиказы но. Мазэ веранэз, газетлэн тиражез но пӧртэм вал. 85 ар ӵоже та лыдпус 600-900 котыр возиськиз. Газет кылдэм аръёсы тираж 800 котыр возиськем. Луиллям дыръёс куке та лыдпус 300-400 экземпляре гинэ кылем, нош тужгес бадӟым показатель 1000 матэ.

85 ар куспын трос воштӥськонъёсты чидано луиз ке но, газет аслаз ужпумезлы оскымон кылиз. Интыысь кивалтэтэн но юн кусып возьыса ужа со. Али но ёрос газет районлэн улоназ бадӟым инты басьтэ, пӧртэм выльдӥськонъёсын тодматэ, кивалтӥсьёсын огъя кылэ вуыны юрттэ, калыклы объективной, актуальной информациез вуттон бордын мыло-кыдо ужа.

Туннэ нуналэ «Азьлане» потэж А-3 форматэн арняяз 1 пол. Тиражез туннэ нуналлы — 687 экземпляр.

«Хезмэт» газетлэн редакцияз ваньзэ 15 мурт ужа. Со пӧлысь 4-ез — «Азьлане» газетэз поттон бордын ужасьёс: валтӥсь редакторлэн дубляжъя воштӥсез Ольга Плотникова, кылысь кылэ берыктӥсь Екатерина Салтыкова, журналист Наталья Жукова но вёрсткая оператор Ольга Матвеева.

Газет туннэ но гожъя ёросысьтымы югдур, политика, культура, дышетон, гурт удыс, национальной ужпумъёс сярысь. Бадӟым саклык висъя Дормес гажан мылкыд пыӵатонлы, артэ улӥсь калыкъёсын тупаса улонлы, аслэсьтыд кылдэ но культурадэ утёнлы-азинтонлы.

Удмурт газетын ужасьёс ӟеч кусыпъёс возё бигер эшъёсынызы. «Азьлане» но «Хезмэт» котьку но валче вамышъязы, ужазы но азинскизы. Одӥг улонэн улӥзы, исторической сюрессэс но валче ортчизы, шуг-секытъёсты но валче вормизы. Озьыен, кык газетъёслэн кусыпъёссы туж юнэсь, тӥяны луонтэм. Бигер газетын потӥсь статьяос «Азьлане» газетлэсь бадӟым люкетсэ басьто.

Газет туала улонлэн куронъёсызъя улэ. 2008-тӥ арысен ёрос газетмы «Татмедиа» акционерной общество борды итӥське. Газетмы понна выль, туала луонлыкъёс усьтӥсько, материальной база но выльдӥське, дыр ортчемъя юнма. Валтӥсь выльдӥськонэн лыдъяны кулэ «Хезмэт» газетлэсь, со чотын «Азьлане» газетлэсь но, электрон вариантэн потыны кутскемзэ. 2011-тӥ арын толсуре ёрос газетлэн аслаз сайтэз кылдӥз но, вераны кулэ, улосчиосмы пӧлын арысь аре паськыт вӧлме. Данъяськыса вераны быгатӥськом, туннэ нуналэ «Азьлане» газетысь иворъёсын адямиос тодматскыны быгато Инстаграмын но Интернетысь пӧртэм социальной вотэсъёсын. Интернет-версие пыртэмын газетысь тужгес кулэ но тунсыко ужъёс.

Асьме «Азьлане» газетмес удмуртъёс пӧлын тодымтэез ӧвӧл, дыр. Угось Татарстанын со одӥг гинэ удмурт кылын печатласькись газет. Озьыен, Балтась удмуртъёс, таин сюлмысь данъяськыны быгато.

Газетлэн кулэлыкез сярысь 100 ар талэсь азьло В.И. Ленин выерам вал ини. Нимаз ик анай кылын потӥсь газет-журналъёслэн. Угось этнической изданиос калыклэсь асваланзэ ӝутонын, калык лулчеберетэз но вордскем кылъёсты утёнын но азинтонын нимысьтыз инты басьто.

Веранмес азьланьтыса, нош ик ортчем дауръёсы берытскиськом. Мазэ веранэз, 30-тӥ аръёсысь репрессиослэн тӧлъёссы ёрос газетэз но палэнтӥ уг ортчо. «Азьлане» газетлэн нырысетӥ редакторез но та «сӥлькоранэ» шеде. Николай Чакминэз Удмуртиысь писательёслы коньдонэн юрттэмез, соосын кусып воземез понна янгыше уськыто но 1938-тӥ арын вить арлы эриклэсь люко. Секыт висьыса со 1939-тӥ арын тюрьмаын ик кулэ. 20 ар мында дыр ортчыса Николай Чакмин шонере поттӥське. Но тупатыны луонтэм янгыш лэсьтэмын луэ ни, адямилэсь улонзэ берыктыны уг луы. Одӥгез сюлэмез шунтэ, кыӵе секыт дыръёс ӧз луэ ке но, — репресси аръёс-а со, шимес Быдӟым тылож вакыт-а — ёрос газетмы потэмысь ӧз дугды.

Нырысь-валысь удмурт газетлэн редакторъёсыз ӵем вошъясько. Николай Сергеевич Чакмин пытсэт сьӧры шедем бере, 1938-тӥ арын удмурт газетэн кивалтыны кутске, Пор-Кутеш гуртысь Агафья Фёдоровна Самсонова. 1940-тӥ арын сое воштэ Кускемысь ??? Григорий Дмитриевич Халтурин. 1941-тӥ арлэн пумысеныз 1942-тӥ арлэн сентябрь толэзёзяз ужа Пантилеймон Иванович Макаров. (Ушмаын вордскем, Турья гуртын улэм). 1942-1944-тӥ аръёсы «Азьлане» газетлэн кылкутӥсь редакторез луэ Т.В. Васильева. Жаляса верано, та кышномурт сярысь ми туж ӧжыт тодӥськом, Татарстан Республикамылэн Кун архиваз утиськем вуж газет подшивкаосын гинэ солэн фамилиез пумиське. Магсум Мухаметзяновлэн «Сорнай» книгаяз тазьы гожтэмын: «Нижнеушминская школа дала более 20-ти учителей удмуртской национальности... Васильева Т.В. — работала в д.Кургем, М.Лызи...» Малпан кылдэ, со Улын Ушмаысь луэм шуыса.

1945-тӥ арын сое выльысь воштэ Агафья Самсонова, кудӥз та интыужын тырше 1960-тӥ арозь. Зэм, 1958-1959-тӥ аръёсы сое Покчи Лӧзя гуртысь Иван Семёнович Кушаев воштылэ, кудӥз бератаз 1961-1963-тӥ аръёсы «Азьланеен» ачиз кивалтэ. Кема аръёс ӵоже, 1963-тӥ арысен 1980-тӥ арозь удмурт газетэн кивалтэ Гондыргуртысь Николай Григорьевич Борисов. Озьы ик улонэзлэсь тужгес бадӟым люкетсэ «Азьлане» газетлы сӥзиз Александр Михайлович Кунаев. 29 ар, 1980-тӥ арысен 2009-тӥ арозь, тыршиз со удмурт газетэз поттон бордын. 2009-тӥ арын сое воштӥз Галина Константиновна Васильева, кудӥз та ужез быдэсъяз 2013-тӥ арозь. Со дырысен туннэ нуналозь валтӥсь редакторлэн «Азьлане» газетъя кивоштӥсез луэ Ольга Юрьевна Плотникова.

Газетмылэн валтӥсь ваньбурез — со ветеранъёс, кыл усточиос, берыктон ужысь но газет печатлан удысысь усточиос. «Азьланеын» котьку но ас ужзылы сётскем адямиос ужаллям.

Редакция но типография кема аръёс ӵоже эшлыко одӥг бадӟым коллектив луыса тыршем. Гожъяськисьёс, кылысь кылэ берыктӥсьёс, текстъёсты бичасьёс, машинисткаос, печатницаос, корректоръёс... — соос ваньзы тупаса но ог-огзылы юрттыса, шумпотонъёссэс но, куректонъёссэс валче люкыса ужаллям, одӥг ужпумез быдэстӥллям — лыдӟисьёслы газет дасяллям.

Котькудӥз соос пӧлысь аслэсьтыз пытьызэ кельтӥз газетмылэн но ёросмылэн историяз, котькудӥзлэн соослэн вань со историын аслаз нокинлы тупасьтэм бамез. Тау соослы туж бадӟым!

Мур историен «Азьлане» газет потыны кутскем дырысеныз туннэ нуналозь кӧня ке поколениысь лыдӟисьёслэн кенешчизы но, матысь эшсы но луиз. Озьыен, газетлэн юбилеез — со редакциын ужасьёслэн но ветеранъёслэн праздниксы гинэ ӧвӧл, та сӥё-дано ужрад лыдӟисьёс понна но туж матын. Шумпотымон, тросэз лыдӟисьёсмы «Азьлане» газетэн кема аръёс ӵоже матысь кусып возьыса уло.

«Азьлане» газет сярысь веракумы котьку но маллпаськом но син азямы пуктӥськом асьмелэсь покчи дорпалмес, выжыосмес, вордскем шаермес, кытын асьмелы дунне усьтӥськиз, кытын асьмеос улыны, яратыны дышетскимы, кытын ас шудмес шедьтӥмы но ас шаермылэн зэмос адямиосыз луимы.

Кема ул, яратоно «Азьлане», туж кема,

Эн сётӥськы лек тӧлъёслы.

Сю аресозь но, солэсь но кема

Мед улод шумпоттыса ӟеч иворъёсын!

Дасяз Ольга Плотникова