Балтась ёросын «Мудорвай» вожвылъяськон ортчиз (фото)

Удмурт лулчеберетэз вӧлмытон но солэн аспӧртэмлыкъёсыныз тодматон понна нимысьтыз «Мудорвай» вожвылъяськон радъямын. 

Арысен аре пыриськисьёсыз тросгес но тросгес луо. Туж шумпотымон! Туэ но «Мудорвай» вожвылъяськонлэн быръён этапез 3 зонаын ортчиз: 24 коньывуонэ конкурс ортчиз Ӟаны лулчеберетъя юртын, татчы пыриськизы Ӟаны шоръёзо школаысь пиналъёс, 25 коньывуонэ — Ципьяысь лулчеберетъя юртын, татчы пыриськизы Ципья шоръёзо школаысь дышетскисьёс, Ципья нылпи садысь пиналъёс но Сырья нылпи сад-школаысь дышетскисьёс. 26 коньывуонэ (октябре), берпуметӥ нуналаз, Покчи Лӧзя лулчеберетъя юртын ортчем вожвылъяськонэ Покчи Лӧзя гуртысь, Балтась каргуртысь но Балтась лулчеберетъя юртысь коллективъёс пыриськизы. Сыӵе ик быръён этапъёс ортчозы на Агрыз, Бавлы, Кукмор, Мамадыш, Менделеевск ёросъёсын. 

Коллективъёс понна арысен аре паймытӥсь амалъёс утчано луэ, малы ке шуоно арысен аре вожвылъяськонлэн куронъёсыз чурытгес но чурытгес луо. Озьы ке но, пиналъёс шумпотыса удмурт кырӟанъёсты но эктонъёсты быдэстӥзы, котькудӥзлэн рос-прос дасяськемез адӟиськиз. 

Пыртэм воштӥськонъёс но палэнэ ӧз кыле. Нимысьтыз театральной сценкаос но пуктэмын вал. Нылпиослэн сюлмысь уж борды басьтӥськемзы юн шӧдиське. Сценкаослэн пуштроссы но егит артистъёслэн шудэмзэ учкисьёс понна ӝутскем мылкыдъёс кельтӥзы!