Балтасе «Айкай» вуылӥз (фоторепортаж)

Шумпотымон, «Айкай» арлы быдэ сямен ас концертъёсыныз Удмуртилэн палэназ улӥсь удмуртъёсты шумпоттыны тырше. Тани туэ но соос асьме доры вуылӥзы, Ципья но Дурга гуртъёсын, Балтась каргуртын концертъёссы ортчизы. Вераны кулэ, котьку сямен соос зал тыр калыкен, кужмо кичабонъёс улсын туж шулдыр ортчизы. Ма, озьытэк шат? «Айкай» — со ачиз праздник ук! Яркыт буёлъёсын ворекъясь дӥсьёссы, жингрес куараоссы но бубылиос выллем капчи эктэмзы нокинэ но мылкыдтэм уг кельто. «Айкаез» учкыса-учкыса, кылзыса-кылзыса ӵыдыны уг луы, со котькуд калыкысь адямилэн сюлмаз сюрес шедьтэ. Та ласянь туж шонер кылъёс вераз Балтась Лулчеберетъя юртын ортчем концертсы бере ёросысь исполнительной комитетлэн кивалтӥсезлэн воштӥсез Ильгам Гайнутдинов.

— Ваньмы асьмеос тодӥськом: туннэ нуналлы тужгес актуальноез луэ калыкъёс куспын, осконъёс куспын эшъяськон. Туннэ асьме дорын удмурт лулчеберетлэн элитаез. Дуннеын но ӧвӧл, дыр, «Айкай» театрлы аналог. Ми данъяськиськом, яратӥськом но гажаськом «Айкаез». <…> Лулчеберетэз валан понна одно ик кылэз тодоно ӧвӧл, лулчеберетэз сюлмын валаны кулэ. Мон котьку верасько: синтэм мурт адӟысал, дыр, кылӥсьтэмез кылысал, дыр, «Айкайлэсь» концертсэ. <…> Туж бадӟым тау тӥледлы! Малы ке шуоно та эктонъёсты, йылолъёсты, вань калык лулчеберетэз, кудзэ тӥ утиськоды, тӥ калыклы, вуоно поколенилы сётӥськоды, — шуиз со, «Айкай» театрлы вазиськыса.

«Айкай» театрлэн кивалтӥсез Пётр Павлович Данилов но ас черодаз артистъёслэн но аслаз нимыныз учкисьёслы но ёрос кивалтэтлы тау каремзэ вераз.

— Шумпотӥсько, туннэ зал тыр калык люкаськиз шуыса. Ӟеч мылкыдды понна туж бадӟым тау! <…> Та пумиськонъёс бадӟым пайда вайыны кулэ тӥледлы но, милемлы но. Ми оскиськом, аръёс ортчыса, будӥсь поколение, калык кырӟанъёсты но эктонъёсты яратыса, оло, милям коллективамы вуоз шуыса, — мылкыдъёссэ вуттӥз аспалмы.

Фото: Наталья Жукова