Башкир «Ошмеслэн» гумырыз кузь мед луоз

«Удмурт калыклэсь, удмурт кыллэсь ӝутскон но азинскон сюрессэс син азе пуктыны уг луы удмурт кылын печатласькись изданиостэк. Шумпотыса но данъяськыса вераны быгатӥськом: Удмурт Элькунын печатласькись „Удмурт дунне“, „Ӟечбур“, „Кенеш“, „Инвожо“, „Вордскем кыл“, „Кизили“, „Иднакар“ газетъёсын но журналъёсын, ёрос изданиосын ӵош кылмес утёнэ но азинтонэ асьсэлэсь бадӟым люкетсэс пырто на Башкортостанысь „Ошмес“, Татарстанысь „Азьлане“ газетъёс но». Таӵе кылъёсын йылпумъяськем вал мон кылем арын Удмуртиысь Йӧскалык печатьлэн нуналэзлы сӥзем статьяме. Нош туннэ, та темаез азьланьтыса, мынам потэ та кылъёсын статьяме кутскеме но Башкир шаерын «Ошмес» нимын потӥсь удмурт газетэн тӥледыз матысьгес тодматэме. 

Татарстан но Башкортостан республикаосын 2001-тӥ арозь удмурт кылын огвыллемгес газетъёс печатласькиллям. Асьме Балтась ёросын — «Азьлане», нош Башкортостанысь Татышлы ёросын «Азьлань» нимын газет потэм. Паймымон, но редакциослэн адресъёссы гинэ но огкадь луэм: Ленин урам, 91-тӥ юрт.

«Ошмес» газет — Башкортостанысь удмуртъёслэн экономической, социальной, общественно-политической азинсконъёсынызы, лулчеберетэнызы, историенызы, сям-йылолъёсынызы, ужъёсынызы тодматӥсь газет. Валтӥсь редакторез — Нигаматуллина Ольга Борисовна.
— Ольга Борисовна, кызьы, ма бордысен ваньмыз кутскиз? Ку кылдӥз газетты? Кин сылӥз солэн кутсконаз? 
— Башкортостанысь удмуртъёслэн анай кылынызы газетсы 1999-тӥ арысен потэ. Сое лыдӟисьёс кие вуттон понна трос тыршоно, пӧртэм ӧсъёсы йыгаськоно луиз. Озьы ке но со дыре Башкортостанысь удмуртъёслэн национально-культурной центренызы кивалтӥсь Р. Б. Галямшин но удмурт огазеяськонлэн Кенешезлэн ёзчиосыз вань шуг-секытъёсты вормизы — газетлы сюрес усьтӥзы. Туннэ нуналэ Башкортостанын куать пӧртэм кылъёсын газет-журналъёс пото. Соос пӧлысь одӥгез гинэ удмурт кылын. 
«Ошмес» газетлы редакторе дано журналистэз, писателез, шаерчиез Андрей Васильевич Гильмаевез юнматӥзы. Кивалтэт тодӥз: Андрей Васильевич кема аръёс ӵоже Татышлы ёросын удмурт кылын потӥсь «Азьлань» газетын ужаз бере, выль ныпъетсэ вормоз. 
— Озьыен, «Ошмес» Башкир удмуртъёслэн валтӥсь газетсылы пӧрмиз. Кыӵе вал солэн азинскон сюресэз? 
— Озьы, Андрей Васильевич Гильмаев кивалтэтлэсь осконзэ быдэстӥз, газет вакчи дыр куспын республикаысь пӧртэм ёросъёсын улӥсьёсты огазеяз. Та вакытэ Башкортостанысь котькуд ёросысь удмуртъёс аспонназы уло вал угось. Газетлэн тиражез но будӥз: нырысь со 900 экземлярен печатласькиз, собере 1200 экземплярен, 1800 экземплярен... Нырысетӥ аръёсы одӥг липет улын удмурт кылын потӥсь кык газетъёсты дасязы. Берло ёрос газет ӟуч кылын потыны кутскиз. Нош «Ошмес» аслэсьтыз ӧрзэ 24 ар ӵоже ни азинтэ. Та дыр куспын редакцилэн улоназ трос воштӥськонъёс луэмын ке но, газетчиослэн котькуд нуналзы лыдӟись сярысь малпанэн тырмемын.
— Туала улон — туала куронъёс. Та зэмлыклэсь нокытчы уд пегӟы. Тупатсконо, выльдӥськоно, азинсконо. Тӥ улонэн ӵош вамышъяськоды, газеттылэн электрон версиез но вань, интернет вотэсъёсын но тӥледыз лыдӟо. Та сярысь но вералэ вал.
— Газетмы сярысь мургес ке верано, со лыдӟисьёс кие арняяз одӥг пол вуэ. Нырысетӥ но ньылетӥ бамъёсыз — тусо. 
Туннэ «Ошмес» газетэз лыдӟисьёс пӧлын тросгес 40 ареслэсь бадӟымъёс. Егитъёс вотэс баммес но сайтэз быръё. Отын, газет бамъёсын сямен ик, республикалэн экономической, социальной, общественно-политической азинсконъёсыныз, удмурт калыклэн культураеныз, историеныз, сям-йылолъёсыныз тодматӥськом. Газетэ ӟуч, башкир, бигер кылъёсын гожъяны быгатӥськом ке но (2016-тӥ арысен сыӵе луонлык сётэмын), ми бырйиськом удмуртсэ — сюлэмлы матынзэ. 
Туннэ нуналэ газетмылы республикалэн пӧртэм ёросъёсаз но городъёсаз улӥсьёс Россиысь почта, редакция яке дорысьтызы потытэк интернет пыр гожтӥськыны быгато. Нош палэнысь удмуртъёс сое туала технологиосъя лыдӟыны быгатозы: Свердловск улосвылысь, Ижевскысь лыдӟисьёсмы, кылсярысь, солэсь электрон версизэ басьто но сое шумпотыса лыдӟо. 
— Тужгес лыдӟиськись ёросты?
— Башкортостанысь лыдӟисьёсмы сярысь ке верано, газетлы тросгес гожтӥсько Янаул, Калтасы, Татышлы ёросъёсын.
— Тиражды сярысь но тодэм потэ вал. Ведь нокин понна секрет ӧвӧл, улонамы интернет паськыт вӧлмемен печатной изданиосты лыдӟисьёслэн лыдзы пумен кулэсме. Тӥляд та ласянь кызьы?
— Газетлэн тиражез 869 экземпляр. Зэм, лыдпус бадӟым ӧвӧл. Нош Башкортостанысь удмуртъёслэсь лыдзэс учконо ке (берлось лыдъян-чотанъя республикаын 17 сюрс удмуртъёс уло), шумпотоно, анай кылынызы лыдӟисьёс вань на шуыса.
— Коллективды, ужъюлтошъёсты сярысь но кӧня ке кыл. Трос кузя-а тӥ тыршиськоды удмурт газет поттон бордын?
— Туннэ нуналэ «Ошмес» газетэз дасян бордын вить адями тырше: валтӥсь редактор, кылкутӥсь секретарь, корреспондент, фотокорреспондент но версткая инженер. Соос ик сайтмес, вотэс бамъёсмес нуо. Туала вакытэ Башкортостанысь газет-журналъёс солы бадӟым саклык висъяло. 
— Анай кылын потӥсь изданиос калыклэсь асваланзэ ӝутонын, калык лулчеберетэз но вордскем кылъёсты утёнын но азинтонын нимысьтыз инты басьто шуыса соглаш луоды, дыр. Нош кыӵе югдурын тӥляд туннэ удмурт кылэз дышетон? Вань-а газетады удмурт кылын печатласькись пиналъёс? 
— Башкортостанын удмурт кылэз дышетонлы котьку бадӟым саклык висъяськиз, туала вакытэ но югдур воштӥськемын ӧвӧл. Озьы ке но нылпи садэ ветлӥсь пиналъёс, школаын дышетскисьёс куспазы ӟучен тросгес верасько. Таӵе югдурез тупатон вылысь, Татышлы ёросын полилингвальной гимназия усьтыны чакламын. Со Выль Татышлы гуртэ интыяськемын луоз. Оскиськом, полилингвальной школаын дышетскисьёс пӧлын газетлэн юнкоръёсыз но луозы шуыса. Али редакциямы тросгес ужъёссэс келяло Янаул ёросысь Вуж Вараш школаысь пиналъёс. Соос школазы, инкуазь, дышетӥсьсы но трос мукетыз сярысь гожто. Таӵе гожтэтъёслы шумпотоно, уго пиналъёс бордын — газетлэн вуоноез.
Вераны кулэ, удмурт пиналъёсын ужанлы ик чакламын «Ошмес» газетлэн кубокез понна волейболъя ӵошатскон но. Сыӵе вожвылъяськонэз ми арлы быдэ Башкортостанысь но Пермь шаерысь удмурт школаосын дышетскись пиналъёс пӧлын радъяськом. 
— Тау, Ольга Борисовна, вераськемды понна. «Ошмес» газеттылэн гумырыз кузь, выжыосыз юн но мур мед луозы, удмурт калыкез сяськаяськись пушъетъёсыныз кема аръёс ӵоже шум мед поттоз! Учырен пайдаяськыса, удмурт кылэз, лулчеберетэз, удмуртлыкез утён но азинтон понна тыршем вань ужъюлтошъёсме Йӧскалык печатьлэн нуналэныз ӟечкыласько! Сӥзисько азинсконъёс, выль малпанъёс но тунсыко статьяос. Гожъяськон удысын тыршон мылкыдмы медаз сӥя, лэчыт перомы ноку но медаз ныжомы, лыдӟисьёсмы трос мед луозы.
13 толшоре Россиысь печатьлэсь нуналзэ пусйиськом. Со сяна, «Азьлане» газет 19 куартолэзе Татарстанысь печатьлэсь нуналзэ пусъе, нош Башкортостанысь «Ошмес» газет одно ик сӥлы каре на, луоз, Башкортостанысь печатьлэсь нуналзэ, кудӥз пусйиське 14-тӥ инвожое. Но малы ке но Удмуртиысь Йӧскалык печатьлэн нуналэз сюлэмлы матынгес луэ, вань удмурт газетъёсты но журналъёсты огазеямысь, вылды.
Тодады вайытӥськом, Йӧскалык печатьлэсь нуналзэ Удмурт Элькунысь Кун Кенеш юнматӥз 2020-тӥ арын шуркынмон толэзе, «Удмурт Элькунлэн праздник но дано нуналъёсыз сярысь» катэз кутыса. Йӧскалык печатьлэн нуналэзлы 4-тӥ тулыспал — «Войнаысь ивор» нырысетӥ йӧскалык периодической изданилэн потыны кутскон нуналэз — быръемын вал. 
Татарстан но Башкортостан республикаосын 2001-тӥ арозь удмурт кылын огвыллемгес газетъёс печатласькиллям. Асьме Балтась ёросын — «Азьлане», нош Башкортостанысь Татышлы ёросын «Азьлань» нимын газет потэм. Паймымон, но редакциослэн адресъёссы гинэ но огкадь луэм: Ленин урам, 91-тӥ юрт.