Дун-чылкыт Валентинлэн нуналыз: кытын но кызьы сое пусъё

Та праздникез тужгес яратӥсьёс витё, малы ке шуоно соос нош огпол ог-огзылы яратон мылкыдъёссэс возьматыны быгато: кузьымъёсын, ӟеч кылъёсын, ужъёсын… Озьы ик та праздник школьникъёслэн тужгес яратоно праздниксы но луэ. Та нуналэ соос эшъёссылы, дышетӥсьёссылы валентинкаос — сюлэм формаен лэсьтэм открыткаос — кузьмало.

Праздниклэн историез сярысь трос малпанъёс вань. Нош тужгес но зэмлыкоез Римысь Клавдий императорен герӟаськемын. 3-тӥ даурын со пуктэт (указ) юнматэм, кудӥз вань воргоронъёсты кузпалъяськыны уг лэзьы вылэм. Соос, пе, ожмаськыны кулэ, нош семья люкетэ гинэ. Валентин нимо егит священник яратӥсьёсты лушкемен черкын венчам. Император, та сярысь тодыса, Валентинэз виыны косэм. Со вылэм 14-тӥ тулыспалэ. Эскеронъёсъя, 496-тӥ арын Римский папа со нуналэз дун чылкыт Валентинлэн нуналэныз ялэм.

Праздник сярысь тунсыко фактъёс

Валентинлэн нуналыз гинэ ӧвӧл… 14 тулыспалэ дун-чылкыт Валентинлэсь нуналзэ гинэ ӧвӧл, мукет праздникъёсты но пусъё, кылсярысь, YouTube каналлэсь, компьютерщикъёслэсь нуналзэс. Финляндиын та нуналэ воксё кышномуртъёслэсь нуналзэс пусъё, нош Германиын — лул тазалыклэсь нуналзэ.

Тужгес аспӧртэмлыко валентинка. Сыӵе валентинка Китайысь Чэнду городысь пешеходной переходын кылдэм. Озьы городлэн кивалтэтэз 14 миллион улӥсьёсызлы яратэмзэ возьматэм.

Валентинкаос — кыкетӥ интыын. Дуннеын тужгес трос Ымусьтонлы открыткаос басьто вылэм, кыкетӥ интыын — валентинкаос (арлы быдэ сое 1 миллиард мында басьтыло). Басьясьёслэн 85%-эз кышномуртъёс луо.

Сяськаос сярысь но вунэтоно ӧвӧл. Тайваньын дун-чылкыт Валентинлэн нуналаз кышномуртъёслы кузьмано керттэтъёсын сяськаос чётной лыдпусэн луыны кулэ вылэм. Со сяна, со одно ик роза сяськаос луо. 1 розаез праздникен ӟечкыласа кузьмало, 2 розаез — прощение курон понна, 12 роза воргоронлэсь кузпалъяськыны мылкыд каремзэ возьматэ, 36 — яратонзэ шарая, нош 100 розаен кышномуртъёсты бызьыны ӧтё.

Саудовской Аравиын но Иранын праздникез уг пусъё. Та странаосын праздникез пусъем понна штраф сётӥськыны но быгатэ вылэм. 14 тулыспалэ магазинъёсын небыт шудон гондыръёсты но уг вузало вылэм — ӵапак та шудон праздниклэн тодметэныз лыдъяське.

Воргоронъёслэн праздниксы. Япониын дун-чылкыт Валентинлэн нуналаз воргоронъёслы кузьымъёс сётъяло, соослы саклык висъяло. Нош кышномуртъёслы — ӵапак одӥг толэзьскын — 14 южтолэзе.

Егитъёс праздникез пусъё-а?

Арысь аре 14-тӥ тулыспалэ тросэз егитъёс ог-огзылы валентинкаос, пичи кузьымъёс дасяло. Дун-чылкыт Валентинлэн но Яратӥсьёслэн нуналзы школаын дышетскисьёс пӧлын тужгес пусйиське шуыса гожтӥськем вал ини. Нош будыса, кин ке со сярысь воксё вунэтэ, мукетыз шуныт ӟечкылан кылъёс вера, куинетӥосыз дышем сямъя яратон сярысь кылбуръёсын валентинкаос ог-огзылы кузьмало. Шор арлыдъемъёс понна та нунал нокыӵе уг поты. Нош Германиын, кылсярысь, 14-тӥ тулыспал висисьёслэн нуналэнызы (день психически больных) лыдъяське. Пусъё-а меда ёросысьтымы егитъёс Яратӥсьёслэсь нуналзэс? Та юанлы ответ шедьтон понна, кӧня ке тодмоосыным вераськи.

Андрей, 22 арес: 14-тӥ тулыспал — календарьысь огшоры нунал. Мон вунэтӥ но вал ни, кин ке соку Яратӥсьёслэсь нуналзэс пусъе шуыса. Школаын дышетскыку гинэ тунсыко вал со. Нылъёс ке валентинкаос ӧй кузьмасалзы, та праздник сярысь малпась но ӧй луысал.

Ирина, 16 арес: Мон понна 14-тӥ февраль — праздник. Малпасько, ваньзы нылъёс мон кадь ик малпало, дыр, шуыса. Сое нимысьтыз ум но пусйиське ке но, тодӥськом, со — Яратӥсьёслэн нуналзы шуыса, ог-огмес ӟечкыласьком, валентинкаос дасяськом.

Татьяна, 27 арес: Кин кызьы, дыр, но мон котьку пусйисько Яратӥсьёслэсь нуналзэс. Мон понна со сыӵе ик праздник, кызьы Выль ар яке 8-тӥ южтолэзь.

Сергей, 28 арес: Яратӥсьёслэн нуналзы — мон понна праздник, уг но пусйиськы ке но сое. Шумпотӥсько сыӵе паръёс понна но вожъяськисько, кудъёсыз та нуналэз ог-огзылы выжыкыллы пӧрмытыны тыршо.

Эшъёслэн нуналзы

Тодӥськоды-а тӥ, та праздник Эшъёслэн нуналзы но нимаське шуыса? Кылсярысь, Эстониын но Финляндиын.

Финнъёс, эстонъёс понна эшъёслэн нуналзы — со эшъёс, яратӥсьёс, матысьёс, тодмотэм адямиос вискын кусыпъёс шоры мукет синмын учкон. Малы дун-чылкыт Валентинлэн нуналыз Эшъёслэн нуналзылы пӧрмиз? Тужгес валтӥсь мугез таӵе, дыр, — та нуналэ ог-огзэс яратӥсьёс гинэ уг шулдыръясько, котькин но быгатэ эшъёссэс ӟечкыланы но соослы саклык висъяны, пичи ке но, кузьым кузьманы. Та нуналэ ог-огзылы валентинкаос, горд сяськаос, шоколад, шудонъёс кузьмало.

Ӵемысь магазинъёсын дун кулэстонъёс, мукет акциос радъясько.

Ку, туннэ ке ӧвӧл, матысь адямиостылы «мон тонэ яратӥсько» шуыса вералоды? Сыӵе кылъёс вераны дӥсьтӥды ке, дуннеын улон но, оло, лякытгес но каньылгес луоз?