Дурга, Кӧргем, Киськем, Сыръя гуртъёслэн эшъяськон ӝытсы

Кылем арын Сырьяе мыныса туж бадӟым куно луыса бертӥськеммы вал, туэ ини ми куноямы. Сырья гуртысь лыктэм куноосмы туж усто, быгатыса возьматӥзы кырӟан, эктон номеръёссэс. Кыӵе бен чебересь вал милям лыктэм куноосмы: вурем дэремъёссы синъёсты мальдытӥсь! Арлыдоосызгес чин вашкала дӥсенызы, камалиосын лыктӥзы. Мызганчизы бен, кубызчизы! Вань люкаськем калыклэсь мылкыдъёссэ ӝутӥз Плотников Николай. Николай паймытӥз кубызэн туж быгатыса шудэменыз, вашкала гуръёсты ваньзэ но сюлме пыӵамон шудӥз, со сьӧры кырӟатэк но ӧм чидалэ.

Яра али сыӵе данъяськымон азьветлӥсьсы вань — Леонид Дмитриевичсы. Сётэм кылзэ одно ик быдэстӥз: «Удмурт шыкысысь ваньбуръёс» книгазэ удмуртлыкез гажасьёслы вунонтэм кузьым карыса кельтӥз. Клубен кивалтон ужзэ но туж усто пӧрмытэ: пичиоссэ но, пересьёссэ но вырӟытэ, ваньзылэсь но мылкыдъёссэс ӝутэ.

Милям клубмы ӧвӧл ке но, Дурга клубысь кивалтӥсьёсмы, Николаен Фирдания, дась гинэ куноосты ӧтьыны, кунояны, шулдыръяськытыны.

Ми но асьмелэсь дасям кырӟанъёсмес, эктонъёсмес быдэстӥмы.

Ђытмы туж шулдыр ортчиз, гумыр ӵожелы вунонтэм кылиз. Азьпалан но мед кылдоз таӵе ӵошен-ӵошен пумиськонъёс ортчытъяны.

Вань кадь лыктэм куноослы бадӟым гажанмес вуттӥськом, юн тазалык, выль азинсконъёс сӥзиськом.

Дурга, Кӧргем, Киськем гурт калык

Куно пумитан

Ми тӥледыз куное

Туж шумпотыса ӧтим.

Гажаса-яратыса

Витьыса ини жадим.

Ойдо пуксе ӝӧк сьӧры,

Сиёмы но юомы,

Шудомы-серектомы ,

Мылкыдъёсмес ӝутомы.

Уӵы выллем гуръёсты

Ӵошен-ӵошен кырӟалом.

Шулдыр кырӟан гуръёсын

Сюлэмъёсыз буйгатом.

Нош собере эктомы,

Бубыли кадь поръялом.

Кырӟаса но эктыса

Егит дырмес малпалом.

Тӥ ми доры лыктоды,

Ми тӥ доры мыномы.

Ӵошен-ӵошен ветлыса

Улонэз шулдыртомы.

П. В. Поликарпова