Дышетӥсьмес ум вунэтӥське

Смаиль но Турья гуртъёс вискысь возь вылтӥ пичи сюрес ку лёгемын вылэм меда? Оло, сое аслэсьтыз педагогической ужан сюрессэ 1976 арын Смаильысь шоръёзо школаын азинтэм физкультурая дышетӥсь, уноез понна мастер луись Юрий Алексеевич Шишкин лёгем, луоз. Кызьы шуылӥзы со дыре дышетскем нылпиос, Шишкин агай. Талы дышетӥсь ӧз ӝожтӥськы. Огшоры, адямиез жалясь сямо, удмурт, ӟуч, бигер кылын умой вераськись, сэзь мурт — со нылпиослэн зэмос эшсы вал.

Сӥзьыметӥ арзэ радысь Смаиль шоръёзо школаысь хоккей площадкаын «ТАССР-ысь физической визьноданъя тужгес устоез дышетӥсь» нимен пусйиськем Шишкин Юрий Алексеевичлы сӥзем хоккей турнир ортчиз. Туэ со Юрий Алексеевичлэн вордскем нуналаз — 4 тулыспалэ — радъяськиз. Али солы 70 арес тырмысал ини.

Куинь гуртъёслэн азьло дыръёсы кылдэм эшъяськонзы шудон дыръя но адӟиськиз. Ура, Смаиль, Шишинер гуртъёсысь школаын дышетскисьёс асьсэос командаос кылдытӥллям. «Смаиль» обществолэн юрттэменыз пичи аресэн хоккеистъёслы форма но басьтӥллям. Тренерзылэсь, Смаильысь Газимов Инсаф Рашитовичлэсь, тыршемзэ егит хоккеистъёслэн шудэмзы возьматэ. Тунсыко, Юрий Алексеевичлэн но дышетскисезлэн Инсаф Рашитовичлэн вордскем нуналъёссы но одӥг нуналэ тупало.

Шудон Шишинер гуртысь командалэн вормонэныз йылпумъяськиз, 2-тӥ интыын — Ура гурт, 3-тӥ интыын — Смаиль гуртысь команда.

Та турнирлы коньдонэн юрттэт «Зифа» командалэн ветеран составаз шудӥсь нимаз ужбергатӥсь Фанис Василович Ахмадиев сётӥз. Дышетскисьёслэн командаоссылы медальёсын ӵош ческыт салам но сётӥзы. «Тужгес умоез шудӥсь», «Тужгес умоез вратарь», «Тужгес умоез нападающей» нимъёсын пусъемъёслы со коньдонкузьымъёс но дасям. Хоккеен шудӥсьёс шутэтскон дыръя нылпиослы шудонъёс радъяськизы. Соослы нимаз ужбергатӥсь, Шишинерысь Ильнур Закиев, кузьымъёс дасям. Юрий Алексеевичлэн кузпалэз Светлана, нылпиосыз Игорь но Ольга озьы ик кузьымъёссэс сётъязы. Школа столовойын, пӧсь чаен но ческыт табанен куноятыса, школаын но нылпи садын ужасьёс котькинэ шуныт пумитазы.

Ёросын хоккей командаос пӧлын ялан вормисе потӥсь «Зифа» командалэн тыршись, дӥсьтӥсь азьланьтӥсьёсыз будо. Вуоно поколениос но асьсэлэсь дышетӥсьсэс медаз вунэтэ вылэм.

Туспуктэмъёс: Смаиль шоръёзо школалэн архивез