Хезмәт

Дышетӥсьлэн тодэ ваёнъёсыз

Турцева Любовь Ивановналэн гожъямъёсысьтыз

Семьяез сярысь
Мынам атае, Иван Леонтьевич Плотников, Бадӟым Лӧзя гуртын вордскемын, крестьян-колхозник. Куд-ог ужъёсын вырылӥз: тӥр ужъёсты тодӥз, Шошма шур дурысь, Бадӟым Лӧзялэн 2 люкетаз интыяськем ву вукоын изӥсь луыса ужаз. Чорыгась но луиз, быгатыса кутылӥз чорыгъёсты. Туж каньыл, юисьтэм вал. Со инфаркт луыса кулӥз.
Анае, Елизавета Степановна Агеева (картэзъя Плотникова) вордӥськиз Белоруссиысь Гродненской губерниысь Новосёлки черкогуртын 1888-тӥ арын.
1914 арын кутскиз Нырысетӥ Дунневыл ож. Соосты быдэс гуртэнызы Россие эвакуировать кариллям. Сюрес вылын ик анаелэн анаез кулэм, кытчы ке но сюрес дуре ик ватыса кельтӥллям сое. Озьы ик сюрес вылын дыръязы кензы но кулэм, али гинэ вордскем нунызэ анайтэк кельтыса. Со пичи ныллы Сусанна ним сётӥллям. Будэмез бере со нылъёсыныз Брест городын улӥз, 80 аресэн кулӥз.
Анаелэн семьяез, атайзы но кык агаез, Андрей но Василий, Бадӟым Лӧзяе вуо. Татын соос семья кылдыто.

Покчи Лӧзя гуртлэн кылдэмез сярысь куд-ог малпанъёс
Тодмо ӧвӧл кытысен, но нырысетӥез Покчи Лӧзяе лыктэм мурт Турцев фамилиен Сергей нимо воргорон луэм. Со Тычкинын (Карадуван но Покчи Лӧзя вискын) дуриськон куала (кузница) лэсьтэм. Отын али но ошмес вань, соин интызэ шедьтыны луэ.
Дуриськись ас ужезлэн зэмос усточиез луэм: валъёсты дурем, пӧртэм уробоос лэсьтэм, питыранъёсы шипъёс но мукет. Со доры кыдёкысен но адямиос лыктылӥллям. Юалозы вылэм: «Кытчы мынӥськод?» «Сергейга барам!» шуо, пе, вал. Татысен ик гуртлэн Сергеевка нимыз но кылдэм.
Пересьёслэн верамзыя, Турцев Сергейлэн кык пиез вордскем, Иван но Егор. Пересьёс тодазы возё, Иван Сергеевичлэн кушамат нимыз «Ванёк» луэм. Со 100 арозь шуымон улэм. Пурысьтам, тӧдьы-тӧдьы тушен луэм.
Нош Егор Сергеевичлэн кушамат нимыз «Турец» луэм. Со Турциен 1877-1878 аръёсы луэм ожмаськонэ пыриськем. Ожысь быдэсак военной обмундированиен бертэм, сьӧраз ваем сабля, энер (седло), урыс (плётка), пыӵал. Пусъемын вал Георгиевской крестэн. Бертӥз со полячка кышноеныз.
Гурт бадӟым луымтэ, со ӟуч гурт вылэм. Но аръёс ортчыса, гуртэ удмуртъёс вуиллям. Соос выль урам кылдытӥллям — Починок. Удмуртъёс пӧлын крашине пырымтэос но луиллям , соосты огъя шайвылэ ватыны лэзиллямтэ, соос понна выль шай усьтӥллям, сое Шайдоры шуыса нималлям. Али со инты лесничество сьӧрын луэ. Удмуртъёс пӧлысь нырысетӥ лыктэмъёс Никифоровъёс, Лазаревъёс, Медведевъёс луизы. Соку сюресъёс гуртын изэн вӧлдэмын ӧй вал, зоръёс дыръя сыӵе нӧд луылэм — бадӟым ву пукемъёсты валэн ортчымон ик луымтэ. Оло, татысен ик Лызи (лужи) ним но кылдӥз, дыр. Мукет малпанъя Лызи ним польской Лодзя городлэн нимыз бордысь кылдэмын, кытысь Егор Турцевлэн кышноез вал.
Туала нылпи садлэн интыяз волость вал (али сельсоветлэн аналогез), со гуртъёсын кивалтӥз. Собере со юртын школа вал.

Ӟуч кылъя дышетӥсьёс сярысь
Дышетӥсьёс сярысь книгае пырымтэ дышетӥсьёслэн нимынызы гожтӥсько. Вераме потэ, ӟуч кылэз бигер школаын дышетэм дышетӥсьёс сярысь, мон но соос пӧлы пырисько.
1941-тӥ арын, ож кутскон аре, Арчаысь педучилищее дышетскыны пыримы. Со арын ик педучилищеез «Урняк» совхозэ выжтӥзы. Арчаысь педучилищеын пленэ басьтэм немецъёслы военной госпиталь лэсьтӥзы.
Общежитимес гурен эстоно вал. Студентъёс асьсэос нюлэскы пу понна ветлӥзы, вандӥзы, пильылӥзы но гур эстӥзы. Суткалы милемлы 500 грамм нянь сётылӥзы. Улыны но дышетскыны туж секыт вал. Толалтэзэ дышетскимы, нош гужем колхозэ ужаны потылӥмы. Нырысетӥ гужемзэ Тюлячиын луимы, турын люкамы. Кыкетӥ гужемзэ Тетюшиын урожай калтонын ужамы.
Вормонэз училищеын пумитамы. Училищеез йылпумъяммы бере куд-ог дышетӥсьёс Балтасьын РОНО-е келямын вал. Отын милемыз бигер школаосъя ӟуч кылэз дышетыны люкизы. (Со аръёсы ӟуч кылэз ӧз тодэ).
Мон Янгулысь школае шеди, Бурбашысь, Соснаысь школаосын ужай. Ваньзэ бигер школаосын мон 14 ар ужай...
Семьяен герӟаськем мугъёсын монэ Покчи Лӧзя школае выжтӥзы. Татын мон 27 ар ужай. Огъя ужан стаже 41 ар луиз. Покчи Лӧзя школаын мон покчи классъёсты дышетӥ. Урокъёс бере дышетскисьёсын пужым ӵыжин, кызьпу бычы, озьы ик макулатура но металлолом

люкамы.
1945 ар луиз калык хозяйствоез ӝутон ар. Ми дышетӥмы но шаермылы юрттӥмы. Вань дышетӥсьёс агитаторъёс но луизы. Агитаторъёс ужазы бусыосын, комбайнёръёс дорын, фермаосын. Пыриськимы пунэмъёсты люканы, быръён кампаниос дыръя гуртъёсын лекциос лыдӟимы. Вань дышетӥсьёс, кудъёсыз ож бере секыт аръёсы ужазы, ужысь ветеранъёс луо, тыршемзы понна медальёсын пусъемын. Школаын ужан дыръя ми озьы ик колхозын но ужамы. Пенсие потыкумы милемлы колхозын ужаммы сярысь справка но сётӥзы, 12 аресысен ужан стажамы но пыртӥзы. Ваньмыз та книгае пырытэк кылемын. Бигер школаосын ӟуч кылэз дышетӥсьёс сярысь но книгаын одӥг кыл но верамын ӧвӧл. Тани бигер школаосын ужам дышетӥсьёслэн нимъёссы:
Плотникова (Турцева) Любовь Ивановна (Янгулово, Бурбаш, Сосна), Наумова Ольга Андреевна (Чапшар, Покчи Лӧзя), Мухина Таисия Александровна (Чапшар, Карадуван), Солдатикова Елизавета (Чапшар), Двоеглазова Мария (Салаусь), Тучкова Татьяна Михайловна (У. Кня), Медведева Валентина Ивановна (Хасаншаих, Покчи Лӧзя), Ложкин Иван Григорьевич (Бурбаш, Покчи Лӧзя), Болтушина (Бурбаш, Покчи Лӧзя), Бурлакова Екатерина Аркадьевна (Салаусь, Покчи Лӧзя), Ишмулкина (Кириллова) Антонида Васильевна (Балтась), Плотникова Анна Тихоновна (Балтась), Медведева Елизавета Андреевна (Балтась). Ваньзы соос Быдӟым Отечественной ожысь ужысь ветеранъёс луо, медальёсын пусъемын.
2010 ар Дышетӥсьлэн арез луиз. Со арын мон доры телевидениысь лыктыса, ожысь но дышетон ужысь ветеранэз кадь видеое уськытӥзы но «Россия» телеканалын («Татарстан») возьматӥзы.

Реклама
Нравится
Поделиться:
Реклама
Комментарии (0)
Осталось символов: