Эрико но эриктэм басьтэм сьӧлыкъёс

Котькуд анай сямен ик, «шудо но кузь гумыро лу, пие» шуыса басьтӥз, дыр, кияз мынам Надежда песяе бордысьтыз люкиськем нуныказэ. Но та песяйме одӥг пол но ӧз кылды мыным адӟыны, «мусо песяе» шуыса вазьыны.

Секыт аръёсы вордӥськем бере, шуг секытъёсты трос тупам, луоз, адӟыны, вормыны, егит дырыз но ӝог ортчем, луоз, атаймылэн.

1933 арын семья кылдытыса, Коля пизэс но Люба нылзэс будэтон дыре, странаямы чузъяське витьымтэ секыт но шимес ивор. 1941 ар. Жугиськон потэм. Атае сельсоветын ужам, оло, соин но сое 23 июне ик оже басьто. Анае Фёкла со вакытэ куинетӥзэ пиналзэ витем: сентябрь толэзе, Нюра апае, жугиськон дуннелэсь секыт омырзэ шокчыса, анаймылы куаразэ сётэ. Сиыны, гур эстыны, дӥсьлы ёрмон, кӧня шуг-секытъёслы чидам, луоз, 26 аресъем анаймы, Вормонлы оскыса будэтӥз, луоз, нылпизэ, витиз яратоно кузпалзэ...

Гуртысьтымы трос воргоронъёс ож лудын батырлыко ожмаськиллям, странамес утьыны тыршиллям. Кинлы шуд усем вордӥськем гуртазы берытскыны, кинъёс ке но пыраклы ож лудэ кылиллям, нош кинлы ке но шуд усем пал пыдын берытскыны. Вераме потэ пичи дырысьтым бускельёсы сярысь но. Атаен пиос Филиппов Илья но Николай, Антонов Иван но Шишкин Владимир сярысь. Нош Шишкин Яков, атаелэн выныз, сӧл-таза бертыса, 5 нылпилы улыны шуд кузьма, войналэн бервылыз, луоз, секыт висьыса, 52 аресэн берпумзэ шокче.

Война бере секыт аръёсы Турья калык каб шуккыса семьязэ сюдэм. Пу пыд вылазы лумбыт ужам беразы, ӝытазе вис карыса, бускельёс огазе пумиськозы вал. Шимес, каргам ожлэсь шуг-секытсэ тодазы вайизы, луоз. Нош соослы, мынам атаелы кадь ик, одӥг пол но вормон праздникъёсы, трибуна вӧзы султыса, батырлыко, вормонлы оскыса ожмаськемзы сярысь калыклы вераны ӧз кылды. Табере Филипповъёслэн юрт-нэгыззы но ӧвӧл ини. Оло, соин но сыӵеос вуныса мыно. Нош ке асьмеос шуиськомы: «Нокин медаз вуны, номыр медаз вуны!» Дырзылэсь вазь кулэмен сэрен соос вуныса мыно. Атаймылэн войнаысь ваем трос наградаосыз, грамотаосыз, орденэз но медальёсыз. Ми котьку буре вайыса улӥськомы, сюлэммы данъяське, нош бам кузя шуныт синкыли ваське.

1943 арын атаймы секыт сӧсырмем, госпитальын эмъяськемез бере сое выльысь оже ысто. Со луэ химик но сапёр. 10-тӥ октябре 1945-тӥ арын, 2-тӥ группаысь инвалид луыса, яратоно семьяяз улэпкын берытскыны шуд усе атайлы. Бератаз колхозамы азинлыко тырше, берпуметӥ нуналозь коммунистъёс радын Соин но анае, инмарлы оскыса, лушкемен вӧсяськылӥз, Малмыжысь черке ветлыса, атаелэсь басьтэм сьӧлыкъёссэ кабыл карыны куриз, дыр, милемлы но инмарез бадӟым карыса улыны валэктӥз. Ӝожомон дыраз черсонзэ кутыса, каллен гинэ кырӟаса бугор бинёз вал. Одно ик тодаз вайыса вералляз: «Чиль-сьӧд йырсиен атайдэс оже келяй но юг-тӧдь йырсиен пумитай». Ожын кыдаса, эрико но эриктэм басьтэм сьӧлыкъёсын, улонлэсь но кулонлэсь кадырзэ валаса бертэм, луоз, атаймы. Оло, соин но ож бере эшшо 9 кузя нылпилы лул-шуд кузьмало. Мон самой покчиез, 12-тӥ нылпи луыса, атаелы 50 аресэзлы кузьым луыса, та дуннее лыктӥськем. Таин валче соосты «Материнская слава» орденэн наградить каро. Озьыен, гуртамы самой эшто семья луиськеммы. 10 нылпилы тодон-валан сётӥллям. Со дырысен улон азьлань мынэ, улонмы капчия. Трос-а, ӧжыт-а 75 ар. Ма быдӟа гумыр ук та! Ортчем сюрес сьӧре кыле, ми но табере пересьмиськомы, жаляса верано, туннэ нуналлы 7 кузя гинэ кылимы ни. Атаймылэн самой бадӟым внукезлы 60 арес, нош самой пичи правнучкаезлы 6 толэзь. Милемлы улон кузьмамзы понна тау карыса улӥськомы, выль выжыосмы пушъё, улонмы азинтӥське.

Войналэн-а, улонлэн секытэз-а кадырылы луонлэсь чеберзэ, шӧмзэ валатэк вазь кошкизы ми пӧлысь. Атаелы 63, анаелы 67 арес вал. Кӧня сюлэм шунытсы, яратонзы но визь-кенешъёссы музъем пушкы согиськизы... Соослэсь туж мӧзмыса, пыкетсылы кулэяськыса ортчизы аръёсы. Арлы быдэ семык празднике вордэм пиналъёсты, тӥледыз бадӟым карыса, Комиысь, Москва, Курган, Тюмень городысен бертыса шайгудэс сяськаосын чеберто, шумпотон но куректон, мӧзмон мылкыдъёссэс тӥледлы вераны дырто. «Ми тӥледыз ум вунэтэ, ӟеч кӧлэ!» шуыса, йыбыртыса кошкыло.

Нылды Римма Кокрова

Турья гурт