Ермолаев Иван Васильевич

Туэ Вормон нуналлы 78 ар тырме. Историлэн бамъёсаз со арысь аре кыдёкегес выже. Со кышкытлыкез адӟем адямиос лыдъямон ӧжыт но ӧжыт кылё. Ожысь ветеранъёслэн, тылысь ветеранъёслэн радъёссы арысь аре кулэсмо. Атайтэк будэм ож дырысь нылпиослэн, соку гинэ вордскем пиналъёслэн сюлэмъёсазы али но бурмымтэ, пыраклы кылем яра со. Зэм, кӧня нылкышноос палкышно кылизы, кӧня нылпиос атайтэк будӥзы, кӧня нылпиос вордӥськытэк кылизы?!

Россиысь одӥгез но семья та секыт адӟонлэсь палэнэ ӧз кыльы, дыр. Арлы быдэ, Вормон нунал вуыку, матысь адямиосылэсь кылӥсько та Вормон нуналэз вайись ӵыжы-выжыосы сярысь.

Одӥгез соос пӧлысь Ермолаев Иван Васильевич — мынам атаелэн ӵужатаез. Вордӥськемын со 1897 арын, Сизнер гуртын. Войнае пыриськоно луэм арлыдо вакытаз ини. Соин ик, вылды, сое полевой кухняе сиён нуллӥсь карыса тодмояллям. Но жаляса верано, 10 коньывуонэ 1943 арын, мина улэ шедьыса, улонэн люкиськоно луэ.

Берпум гожтэтаз, «ми кадь арлыдоослы ӝоген шумпотон ивор вуоз — доре лэзёзы» шуыса, пе, гожтэм. Но, кылдымтэ бертыны... Кӧня синвузэ кисьтӥзы, луоз, пересь ӵужанаймы, атайтэк кылем нылпиосыз?! Тае малпаса, йырам соку ик чилектэм кадь тодам лыктӥзы Н.Байтеряковлэн кылбур чуръёсыз:
«Сандык пыдсын ӵужектэмын
Секыт ивор — тӧдьы конверт.
Курыт малпан каръяськемын:
Уз ву, уз ву! Ноку уз берт!»

Пересь ӵужанаеным но озьы ик луиз, дыр. Мар мында нылкышноос ож вакытэ палкышно кылизы. Озьы ке но, нокин оз ӝожтӥськы, ӧз сётӥське соос лек тушмонлы. Берпум ымтыренызы нылпиоссэс сюдыса, кайгу-куректонзэс ужен вормыса, юрттӥзы солдаткаос асьме ожгарчиосмылы. Со дыре вань калык одӥг осконэн улӥз: вордскем шаерез тушмон ки улысь мозмытоно. ("Азьлане", Ольга Плотникова)

#МойГеройМояСемья
#МинемГеройМинемГаилә
#Бесмертныйполк