Ёросамы удмурт кыллы но лулчеберетлы сӥзем нуналъёс ортчозы

Та сярысь Балтась ёросысь удмуртъёслэн «Кенеш» НКА-зылэн тӧроез Ольга Пчельникова ивортӥз.

— Шуркынмонэ но толсуре Россиысь вить улосвылъёсын удмурт кыллы но лулчеберетлы сӥзем нуналъёс ортчозы шуыса «Удмурт Кенеш» огазеяськонлэн Пичи кенешезлэн пумиськоназ Удмуртиысь йӧскалык политикая министр Эдуард Петров вераз, — шуэ Ольга Мироновна.

Кызьы тодӥськом, 10-тӥ шуркынмонэ Ижкарысь Калыкъёслэн эшъяськон юртазы «Удмурт Кенеш» огазеяськонлэн Пичи кенешезлэн пумиськонэз ортчиз. Ужрадэ Балтась ёросысь удмуртъёслэн «Кенеш» НКА-зылэн тӧроез Ольга Пчельникова но пыриськиз.

Пумиськонын Вань удмуртъёслэсь XV-тӥ азьвыл чакламтэ (внеочередной) ӧтёссэс ортчытон, огазеяськонлэн уставаз воштонъёс но ватсанъёс пыртон, этнокультурной дышетонэз азинтонъя концепция сярысь юанъёсты эскерем сяна, палэнын улӥсь удмуртъёс дорын удмурт кыллэсь но лулчеберетлэсь нуналъёссэ радъян сярысь но вераськиллям.

— Сыӵе ужрадъёс Пермь шаерын, Марий Элын, Киров улосвылын, Татарстанын но Башкортостанын радъяськозы шуыса ивортӥзы Пичи кенешлэн пумиськоназ. Куд-ог улосъёсын соос ортчизы но ини. Пумиськонъёсты «Удмурт Кенеш» огазеяськон, Йӧскалык политикая министерство, Калыкъёслэн эшъяськон юртсы, Камсьӧр удмуртъёслэн центрзы но удмурт егитъёслэн «Шунды» дэменлыксы радъяло. Одӥгез сыӵе ужрад луоз асьме ёросамы но, ортчоз со 30-тӥ шуркынмонэ Покчи Лӧзя шоръёзо школаын но Лулчеберетъя юртын, — ивортэ Ольга Мироновна.

Фото: О. Пчельникова