Героймы вордскем палъёсаз бертӥз! (+фото)

9 куартолэзе Олег Николаевич Исаевлэн вордскем гуртаз — Вуж Кушкетын — сӥё-дано ужрад ортчиз. Кышкасьтэм но батырлыко пимылэсь, зэмос патриотлэсь данзэ пырак азелы вунонтэм карон понна нимысьтыз бюст усьтӥзы.

Таӵе аспӧртэмлыко синпелет та дырозь Балтасьысь «Батыръёслэн Аллеяязы» гинэ вал, нош табере ёросысь кивалтэтлэн тыршемезлы но кичӧлтэмезлы луыса Героймылэн 3D выллем моделез вордскем гуртсэ но чебертоз. Та туж кулэ луэ будӥсь поколение но гуртысь калык понна.

Исаев Олег Николаевич — огшоры гинэ пичи удмурт гуртын вордскем воргорон.

Солэн улоназ ӧй вал узыресь ӵыжы-выжыосыз но герӟетъёсыз, со ӧз висъяськы эшъёсыз но огъёзъёсыз пӧлын, котьку умоезлы но ӟечезлы кыстӥськиз. Солы дышетыны тыршиз котырысь адямиоссэ но. Соин но валамон, дыр, малы со покчи классъёсын дышетӥсь луон ӧнер басьтӥз. Аслэсьтыз сюрессэ но пичи вамышъёсын со ачиз лёгиз, тыршиз анай-атаез но матысьёсыз понна. Паймымон кадь, кызьы солэн йыраз но мугораз сыӵе яркыт гомаз ас шаерзэ яратон но гажан мылкыдъёс.

1996 арын 5-тӥ куартолэзе Олег Николаевич понна берпуметӥ ожгар ужпум лэсьтон нунал луиз... Тушмонлы шӧдскымон изъян лэсьтыса, солэн синъёсыз пыраклы кыниськизы, ӟырдыт сюлмыз йыгаськемысь дугдӥз. Улонэз векчи улвай сямен чигиз... Секыт ивор, секыт югдур, кудӥз одӥг семья понна гинэ ӧвӧл, быдэс ёросмы, элькунмы понна бадӟым ыштонэн берытскиз. Ортчиз ни 28 ар, но со шимес даур куараос али но чузъясько кадь асьме пӧлын... Туэ со аслэсьтыз 60 аресъем юбилейзэ но ортчытысал.

Солэсь вань ортчем ожгар сюрессэ гожтыны но вераны мултэс луоз. Ёросысь котькуд адями тодэ: со котькуд пичи гуртысь пияшлэн улонэныз улӥз, ас льӧль малпанъёссэ улонэ выжтыны тыршиз. Школа, дышетскон, колледж, арми радъёс, училище, синмаськон, кузпалъяськон, нылпи вордскон, яратоно уж удыс быръён — дунне вылысь трос гинэ адямилэн огкадь сюресэз. Но... Олег Николаевичлэн быръем удысэз аспӧртэмлыко но кышкыт — военной лётчик. Со котькуд нунал кышкытлыкен, кулонэн но эскеронэн пумиськылӥз.

Инбам сое ачиз бырйиз. Кызьы тылобурдо вылӥе лобӟыса аслыз шоканы омыр басьтэ, озьы Героймы но ассэ инмын кышкыттэм интыын адӟиз. Ачиз сярысь малпаськытэк, эшъёссэ но тушмон тыл улысь поттылӥз. «Герой луыса уг вордӥсько, улыса герой луо», — таӵе веранэз котькудды кылӥды, луоз. Но кыӵе мур солэн пуштросэз! Огшоры адями, кудӥз озьы ик улӥз Инмарен сётэм улонзэ, яратӥз, сюлмаськиз, ужаз, но шӧдтэк шорысь чагыр инмысен сьӧд музъеме ваське... Но лулыз ӝутске инбаме, кытын со аслыз буйгатскон шедьтылӥз улыкуз но.
Ужрад но калык понна вӧсьлыко луись нуналэ рдъяськиз. Туэ 9 куартолэзь шуныт куазен ӧз нуныя. Ӵукна ик я зоро, я тӧло, я лымыё инкуазь шуг-секытъёс кылдытӥз радъясьёс понна. Татын но Геройлэн кужмыз юрттӥз, дыр — ваньзэ дыраз вуттыны луиз. Шуг-секытъёс кылдытӥсь инкуазь но та нуналэ чигназ — Герой нош ик вормисе потӥз!

Табере кирпичен ӝутэм инъет вылын сылэ дано лётчикмылэн кыдёке учкись бюстэз, оло, али но, кытысь ке палэнысь тушмонъёсты учкыса, со калыксэ утьыны тырше. Лултэм скульптура огдырлы луло луиз кадь: солэн ӝожмыт, со дыре ик чурыт учкемез котькуд адямилэн сюлмаз пӧртэм мылкыдъёс пыӵатэ. Табере со ас гуртэзлэсь азинскемзэ адӟе, нош гуртоосыз понна юнлыклэн символэз луэ.

Сӥё-дано ужрадэ люкаськизы гуртоос, О.Н. Исаев нимо Ӟаны шоръёзо школаысь дышетскисьёс но дышетӥсьёс, Геройлэн ӵыжы-выжыосыз, ёросысь кивалтэт но вань мылкыд карем адямиос. Туж удалтӥз Геройлэн Киров улосвылысь матысьёсызлы но, ӵукналы пуктэм ужрадэз выжтоно луиз, соин Светлана сузэрез но лыктыны быгатӥз.

Бюстлэн авторез но аспалчимы — Фаниль Валиуллин. Солэн юн тыршемез синпелет шоры учкыса ик адӟиське: вань кадь чыры-пыры люкетъёсыз висъямын, учкемез но, вань кисыриосыз но улэп адямиез кадь возьмато.

— Жаляса вераны гинэ луэ, та уж борды кутскыны беромыса веразы, соин дыраз вуттыны туж секыт луиз, кык сутка мында изьытэк потоно луиз. Оштолэзьлэн пумаз гинэ ӵыжы-выжыосыныз герӟаськыса, тупамон туспуктэмзэ бырйыса, уж борды кутски. Огшоры адямилы валамон ӧвӧл, дыр. Таӵе ужъёс 3D моделен лэсьтӥсько, туспуктэмъёс та понна уг тупало. Соин Олег Николаевичлэсь бюстсэ лэсьтон понна ӵыжы-выжыосызлэсь модельёссэ уже кутоно луиз. Озьы ке но, шумпотӥсько, нуналаз, беромыса ке но, вуттыны луиз. Интыез но туж тупась луиз, — мылкыдъёссэ вераз скульптор.

Бадӟым тау шуыны кулэ сыӵе адямиослы, кудъёсыз дырзэс жалятэк, тыршо та уж бордын. Пӧртэм туспуктэмъёсты огазеяса, учкемзэ но, ымныр туссэ но тупась карыны туж трос дыр кулэ. Фаниль азьын пуктэм ужпумъёс быдэстэмын вал, малпасько.

— Зэмзэ но туж бадӟым нунал, туж кулэ луись ужрад ортче туннэ. Олег Николаевич ёрос понна гинэ ӧвӧл, быдэс республика, быдэс Россия понна бадӟым пример луэ, кызьы ожгарчи аслэсьтыз ужпумзэ быдэстыны кулэ. Зэмзэ вераса, Олег Николаевич выль Россилэн нырысетӥ Геройёсыз пӧлысь одӥгез луэ. Со вакытэ туж кышкыт но историез воштӥсь югдуръёс луизы, сыӵе адямиос луыса ик, туннэ асьмеос та музъем вылын кык пыд йылын сылӥськом. Тани туннэ но шаермылэсь суверенитетсэ утись ожгарчиос нимысьтыз ожгар операцие пырисько, асьмелэсь сайкыт инбаммес но каньыл вӧтъёсмес утё. Азьпал поколениосмы но сыӵе ик кышкасьтэм мед луысалзы, — таӵе кылъёсын люкаськемъёслы вазиськиз ТР-ысь Кун Кенешысь депутат, Балтась ёрослэн кураторез Камиль Нугаев.

Бюстэз усьтыны луонлык сётӥськиз Балтась ёрослэн главаезлы — Рамиль Нутфуллинлы, лыктэм кунолы — Камиль Нугаевлы но Геройлэн анай-атаезлы — Николай Степановичлы но Вера Петровналы. Та вакытэ пушкын мар ке чигиз кадь: тӧдьы басма пушкысь аспалмылэн бюстэз султӥз. Героймы бертӥз гуртаз! Солэн нимез, подвигез но ӟеч ужъёсыз весяклы кылёзы историямы, будӥсь нылпиос но егитъёс понна син азязы котьку батырлыко пример мед пуксёз. Со шоры учкыса, валамон луэ: таӵе адямиос кылдытӥзы туннэ нуналэз, кытын асьмеос уӵылэсь чирдэмзэ кылӥськом, тӧллэсь пельтэмзэ шӧдӥськом но шундылэн пиштэмезлы синмаськиськом.

Геройёсмы котьку асьме пӧлын улозы! Соослэсь дано подвигъёссэс, тыршемъёссэс вунэтытэк, юнме карытэк, тынӥсь но шудбуро улон кылдытоно. Оло, азьпалан но, та бюст шоры учкыса, калык пӧлын вӧлмоз патриотизм но ас шаердэ яратон мылкыдъёс. Героймы табере гуртаз, озьыен, оскон кылдэ: азьпалан улонмы радъяськоз но шаерез котыртӥсь сьӧд пилемъёс сайкиськозы!