Гурласа вуизы но мылкыдме бурдъязы

Кемалась ӧвӧл кадь со дыр, куке мон соосты дышетӥ но классэн кивалтӥ. Нош со куспын 32 ар ортчем! Школаез йылпумъяса, ӧнер басьтӥллям, ваньзы ик семья кылдытыса, юртъер лэсьтыса, 2-3 нылпи будэтыны вуиллям. Та пумиськон чебер малпанъёс сяна, сюлмам шуныт, шумпотон, оскон, задор мылкыд пыӵатӥз. Малы ке шуоно та нылъёс но пиос туж капчи мылкыдо, улонлы шумпотыса, тыршыса ужало, шулдыръяськыны но быгато. Ма, веранэз ик ӧвӧл, ми доры но соос мызганэн вуизы. Кырӟамы, эктӥмы, бускельёсты но паймытыны вуимы! Соосты концертэн ми пала вуыны ик косӥзы! Кӧня ке час куспын ваньзэс тодэ вайимы: ӵош дышетскем пиналъёсмес но, гажано дышетӥсьёсмес но.

Куноосы кошкем бере туж мӧзмыт луиз, ортчем аръёс син азе пуксизы... Табере гожтэтъёс ум ни гожъяське, нош газет пыр тау карон кылъёсме гожтэм потэ тодмо но гажано адямиослы.

Куке но мон, егит нылаш, Ӟаны школае немец кылъя дышетӥсь луыса лыктӥ. Со дыр улонам трос югыт малпанъёс кельтӥз: ужын выльзэ тодон, калыкен но дышетӥсьёсын кусып кылдытон, анай-атайёсын тодматскон, нылпиослы тодон-валан сётон, концертэн но спектаклен гуртъёсы потан — ма, ваньзэ вераса но быдтонтэм. Ку меда ваньзэ вуимы? Ма кызьы уд вуы, милям сыӵе кивалтӥсьмы: визьмо, веськрес, вордскем гуртсэ яратӥсь, спортэн но лулчеберетэн тунсыкъяськись! Директор Иван Васильевич Ӟаны школаез но интыяз кельтыны быгатӥз, выль школа лэсьтонэ трос кужым понӥз, ачиз но ужъёссэ вуттыса ужаз, школаын ужасьёслы но куронъёсыз сыӵе ик луизы. Иван Дмитриевич, Вера Федотовна, Мария Семёновна, Дукерья апай милемлы, егит дыштӥсьёслы, анай-атай выллем луизы, огпол но секыт кыл вератэк ужаны юрттӥзы. Евгения Георгиевна мыным «наставник» карыса юнматэмын вал, бадӟым тау Тӥледлы, нырысетӥ вамыш лэсьтыкум туж юрттӥды. Чебер гожъям почеркты али но син азям. Тӥ кадь чебер гожъяськыны тырши ке но, нокызьы ӧй быгаты. Антонида Васильевна, ымнырад пальпотонэд, кельшымон дӥськутэд, валаса тупатэм класс бӧлемед уг вуны. Отын котьку нылпи куара, серекъян. Огъя тыршыса ужан бордын сюлмысь выриськоды вал. Ольга Васильевна вазь тулысысен бер сӥзьылозь велосипедэн ветлыса ужаз, соку асфальт сюресъёс но ӧй вал на. Небыт куараё, косэм ужез быдэстӥсь, огпол ке но кинлы ке кужмо куарадэс ӝутыны быгатӥды меда? Маргарита Фатыховна ас классэз понна юн сылӥсь, предметсэ тодӥсь, математикаысь задачаез ужаны быгатон сямен, улонысь но шуг-секытъёсты кышкатэк пырпотыны дышетӥз. Антонида Петровна, со жингрес куараед, шар-шар вераськемед пель сьӧрам. Нош концертъёсыз нуыны тон кадь быгатӥсез ӧй вал. Валентина Васильевна дӥськутэз мугоръя но вылтусъя тупатыны быгатӥсь, кытысь меда ушъян кылъёс шедьтылӥды, собере мон аслым ик чебер потӥсько вал. Галина Ивановна, Тӥ асьтэ яратоно пичиосты дорысь кошкыса но ӧд вуэ, анай курег сямен соос котыр бергалляды. Француз кылэз дышетскемдылы вожъяськисько вал мон соку. Рита, пӧзьтэм сиёнэд туж ческыт луэ вал: чумерен шыд, мильым, сылалтэм кубиста али но ымам кадь. Лида, тонэныд ми, егит дышетӥсьёс, эшъяськимы — вылтӥяськон сяммы огмылэн но ӧй вал.

Мария Петровна, Виктор Павлович, Алексей Михайлович! Асьмелэн соку паймымон егит дырмы вал, быгатӥмы ас дыраз ужаны, эктыны но кырӟаны, школаын кылдытэм «Вуюись» ансамблен телестудие но вуимы.

Ой, шудо егит дыр,

Пуксьы вал на вӧзам!

Ну монэ ас дорад,

Паймымон шаерад!

Кушкетысь нылъёсы но пиосы! Улонды мыным сётэм кузьымъёсты кадь чебер, ческыт, шуныт, небыт, пумтэм-йылтэм сяськаяськись мед луоз! Тӥ дышетскон дыръяды ик туж эшъяськыны быгатӥсь, ог-огдылы юрттӥсь но дурбасьтӥсь пиналъёс вал. Тӥледлы сыӵе сям Кушкет школаысь нырысетӥ дышетӥсьты пыӵатыны быгатэм, луоз. Соин но дан солы, нырысетӥ дышетӥсьтылы!

Нина Андреева