Гужем вуоз (+фоторепортаж)

Зэмзэ но, дыраз но, мултэс но луэм кезьытъёсын паймытэм инкуазь ас ужзэ одно быдэстэ. Тани шунды, ас шунытсэ сётыса, музъемысь ю тысьёсты, нуналлы быдэ ӧвӧл, минутлы быдэ будэтыса ӝутыны кутскиз. Узьымъёсты кужмоятон но вуоно урожайлэн удалтэмезлы инъет понон понна быдэсъяськись технологической ужрадъёсты ортчытыны тужгес но тупась дыр. Но малы ке но тросаз хозяйствоосын та ужъёсын уг дырто, бусыосты, тужгес но ӝутскем узьымъёсынзэ, усыян шоры салкым учко. Та ласянь Масхут Гарипов хозяйствоосысь агрономъёслы пыкылонъёссэ вераз. Интыысь ӧнерчиос малы ке но малпало, кизён йылпумъяськыса, бусы ужъёс но быризы шуыса, ялан «вылӥысен» косэмез витё. Толалтэ кӧня ке пол ортчытэм дышетсконъёсысь басьтэм тодон-валанъёссэс интыосазы кулэезъя мед кутысалзы шуыса вераз со. Районысь 1-тӥ июньлы ю тысь кизем 8300 гектар площадьёсын усыян ортчытэмын. Та ужлы «Арбор», «Труд», «Бурбаш», « Маяк» хозяйствоосын гинэ кулэезъя саклык висъяллям. Тол юосты куаръёс пыр подкормить карон но бере кыле. Та ужрадъёсты кулэен лыдъяло «Татарстан», «Яна тормыш», «Сурнай», «Бурнак» но «Дуслык» хозяйствоосын гинэ. Жагтурынъёслэсь но пӧртэм нымы-кибыослэсь химической обработкаез но вунэтоно ӧвӧл, кык-куинь нунал шуныт улӥз ке, жагтурынъёс но, нымы-кибыос но соку ик потозы, шуиз Масхут Гарипов.

Юосты будэтонэн ӵош хозяйствоосын пудо сиёнэз дасян понна али кылкутымон дыр. Таин сэрен гурт хозяйствоя но сиён-юонъя управление бадӟым конкурс ялэм. Тодмостэм комиссия турын кизён, берыктон но люкан понна кутӥськись агрегатъёсты, пудо сиён возён гуослэсь дась луэмзэс учкиз ни. Кылсярысь, «Яна тормыш» та ласянь умойгес дасяськем. Кема аръёс ӵоже хозяйствоысь валтӥсь инженерлэсь ужзэ быдэсъям , али дыре председатель луыса ужась Магсумзян Сайфетдинов та удыслэсь зэмзэ но кылкутымон луэмзэ умой вала, соин но ремонт лэсьтон но кулэ луись запас ёзъёсты басьтон ласянь татын могӟетъёссы ӧвӧл.

- Вань техникалы механизаторъёсмы кулэ луись ремонт каризы, пудо сиён дасян борды туннэ ик кутскыны быгатӥськом ини, - шуэ валтӥсь инженер Радик Мардян. Кизёнын тыршем, комбайнэн, машинаен ужам, котькуд техникаез вить чиньызэ кадь тодӥсь валтӥсь ӧнерчи понна туж кылкутымон дыр кутске.

- Вань механизаторъёсмы но ушъямонэсь, «Магдон» маркаё кизён агрегатэн ужась Ильшат Назиповез, «Полесьеен» ужась Газимзян Исмагиловез нимысьтыз пусйытэк уг луы. Туэ но соослы но мукет механизаторъёсмылы осконмы бадӟым , - вераз валтӥсь инженер. Котькуд хозяйствоын кивалтӥсь, ӧнерчи, механизатор ужасьёс ужпумъёссэс кылкутымон быдэсъяса, вормонъёссы но шумпотымонэсь мед луозы.