Мынам нырысетӥ дышетӥсе

Нырысетӥ дышетӥсь! Солэн лэсьтэм ужъёсыз дунъяны луонтэм, со пиналлы тодон-валан гинэ уг сёты, сое со зэмос адями радэ пуктыны кутске, дышетэ эшъяськыны, ужаны, кылкутӥсь, чидась, ӟеч луыны. Нырысетӥ дышетӥсьлэн сётэм тодон-валанэныз адями быдэс гумыр пайдаяське. Сое со лыдӟыны, гожъяськыны, лыдъяны, малпаськыны, умойзэ но уродлэсь висъяны дышетылӥз ук! 

Мынам нырысетӥ дышетӥсе вал Евдокия Александровна Шестакова (ныл дырызъя Макарова), вордӥськемын 30 пӧсьтолэзе 1917 арын туала Балтач ёросысь Улын Ушма гуртын. Дас аресэн мискинь нылаш анайтэк кылем, сое атаез будэтэм. (Нялтас вераса, 30-тӥ аръёсы удмурт гуртъёсын тросэз Лӧзя пал нылъёс но пиос дышето. Тани милям гуртын гинэ но пӧртэм аръёсы со паласен лыктыса ужаллям Н. И. Медведева, И. Е. Макаров, А. Бегеев, А. П. Гринёв.).

1939-тӥ арын Евдокия Александровнаез, Арча педучилищеез йылпумъямез бере, Турья начальной школае дышетӥсь карыса тодмояло, Анна Кузьминична Медведеваен ӵош ужало, нош одӥг арскын Вукогурт школае директоре но дышетӥсе пукто. Карек-Серма школаын дышетӥсь луымтэен (дышетӥсьсэс войнае басьтӥллям, дыр), 1941-тӥ арын коньывуон толэзе егит дышетӥсез отчы директоре но дышетӥсе интыяло. Соку отын Карлыган палась Анисия Фадеевна Фадеева дышетэ. 

Жугиськон дыръя дышетон туж секыт луэ, атайёссы жугиськонэ кошко, сиён уг тырмы, дышетскон арбериос ӧвӧл. Татчы лыктыкуз школаын 62 дышетскись луэ. Дышетӥсьлы быдэ 31 дышетскись, кык класс ӵошен дышетске. 

Пиналъёсты школае кыскон секытэн сётске. Йӧн-йӧн дӥськут-пыдкутчанзы ӧвӧл. Вылаз ик Карек-Сермаын каб шуккон кужмо вал, нылпиоссэс доразы ужатыны тыршылӥзы, школае ветлытэмзы ӧз потылы. 

Война аръёсы сютэм, дӥськуттэм ветлӥсьёс но луиллям. Колхозысь пызь, картофка басьтыса, школаын нянь пыжылӥллям, шыд пӧзьтылӥллям. Пыжись-пӧрасез — Оляна апай Ефимова. 

Тетрадьёс интые кутылӥллям газет, вуж книга висъёсты. «Собере графильной доска, карандаш сётӥзы, ужаны умойгес луиз. Доскаос, партаос тӧдьы потӥзы, буёлъёс ӧй вал. Квартира кузё Алексей агай Шестаков, тӧдьы доскаез адӟыса, сьӧдэн буяса сётӥз, бур но сётӥз», — тодаз вайылыса, вералля вал Евдокия Александровна. 

Та секыт война дыръя, дышетсконэн уж огазе луэ, пиналъёс «Азьлань» колхозлы юрттылӥллям. Дышетӥсьёс агитатор ужез но кужмо нуиллям, танк, самолёт лэсьтыны уксё люканы тупам, нош ӝытъёсы амбарын кутсам юэз тӧлылӥллям, амбар кеносъёсы пыртылӥллям. Соку ведь воргорон ужъёсты быдэсак сямен нылкышноос но пиналъёс быдэсъяллязы. Калык хозяйствоез ӝутонъя заём вузан но дышетӥсьёс вылын луэм. Гужем дышетӥсьёслы отпуск но йӧтылымтэ. 

Жугиськон бере, 1946-тӥ арын, школае выль дышетӥсь лыктэ — Андреева Мария Яковлевна. Со Кургем гуртысь, дышетӥсьёслэн династиысьтызы. 1948-тӥ арын кык сменаен ужаны кутско. Электричество луымтэ, дышетон комната кӧня ке керосин лампаен югдытӥськем. 

1963-тӥ арын тӥни Дуня дышетӥсь (гуртын сое гажаса озьы шуо вал) милемыз нырысетӥ классэ басьтӥз. Секыт вал кык классэн, ог кызь пала дышетскисьёсын. Кызь пинал пӧлын котькыӵеез вань ук. Мон но сюлэмзэ сӧрылӥсько вал. Пичияк янгышай ке, куатаськисько вал. Дышетскыны мынытэк кыльылэме но вань, доре классэн лыктыло вал. Огпол толалтэ мынытэк кыли. Учкисько, гурдоен лыкто. Улын коркан каб шукко, мон койкаез ӧс борды кыски, пырод на мын! Улын корка пыризы, вылын корка тубыса, монэ «Васи», «Васи» карыса, мон небӟи, лэся, куатаськон тӧлӟиз. Арифметикаен ӵапак шуг тема ортчо вал — «Дас вамен ватсан но куштон» (7+8, 16-9). Собере ӧй ни куатаськы кадь. 

Нош одӥг учыр. Удмурт букварья выль «Х» букваез лыдӟиськом. Со бамын Тихон кыл вань. Та кылэз лыдӟи ке, дышетӥсьлэн вожез потоз шуыса, мон сое лыдӟытэк кельтӥ. Малы шуоды? Соослэн корка нимзы Тӥкон вал! Вот! 
Но школаез мон яратӥсько вал. Ӟаны школаез но. Пичи дыръям ик дышетӥсь луыны малпай. Нырысетӥ дышетӥселэн ужамез кельшем, дыр.

1966-тӥ арын выль кирпич юрт усьтӥськиз. Школаез вуттон кема кыстӥськиз, чидатэк «Чаян» журналэ но вуиз. Сое сельсовет сессиын эскеремзы бере, уж кужмояз. Эркын, югыт школа, одӥг сменаен дышетон. Нош кӧня кужымзэ понэ отчы Евдокия Александровна! 

Мыным ньылетӥ классын та школа юртын дышетскыны шуд усиз. Школае ӵукна вазь ик мынӥськом вал. Парта вылтӥ тэтчаса, бызьылыса ӧм ветлылэ. Евдокия Александровна азьло нуналаз диктант гожтыны текст сётылӥз. Соосты ми черодэн лыдӟылӥм, шуом, туннэ мон, ӵуказе Иван лыдӟоз. Малпасько, таӵе ужлэн пайдаез луэм, дыр. 

Трос вал пӧртэм предметъёсъя перфокартаос. Соосын но вырылӥм. Борддоре ошем СССР-лэн физической картаез но юнме ошиськыса ӧз улы, соя шуръёсты, городъёсты утчаса шудылӥм.

Та юртын школа 2011-тӥ арозь ужаз. Мыным но татын 32 ар ужаны шуд усиз. Кыӵе шумпотэ вал дышетӥсе, мон отын дышетӥсько шуыса! 
Евдокия Александровналэсь ужзэ правительство вылӥ дунъяз: «За доблестный труд в Великой Отечественной войне 1941-1945г. г.», «За трудовое отличие», «Ветеран труда» медальёсын.

«Корка лэсьтон дыръя, улӥяз нэгыз пукто, ми но начальной школаын нэгыз пуктӥсь дышетӥсьёс вал, дыр», — шуэмез тодам.

Евдокия Александровналэн трос дышетэм дышетскисьёсыз, соос, дышетсконзэс йылпумъяса, пӧртэм удысъёсын ужазы. Выль дышетскон ар кутскон азьын вераме потэ Евдокия Александровналэсь одӥг дышетскисьсэ — со Александр Степанович Васильев. Вазь анайтэк кыле, дышетскон дырыз ӵапак жугиськон дырлы тупа. Секыт ке но, тыршеменыз Александр вылӥ тодон-валанэн историен дышетӥсь луиз. Улӥз Удмуртиын, гуртэ берталлякуз, одно ик дышетӥсез доры ветлоз вал, дышетыкуз Евдокия Александровна солы анай сюлэмзэ сётэм. Озьы, нырысетӥ дышетӥсь — со кыкетӥ анай яке атай. 

Евдокия Александровна кузпалэныз Григорий агаен кык пи но кык ныл будэтӥзы. Людмила нылзы трос аръёс ӵоже Ушма кирпич заводын валтӥсь бухгалтер луыса ужаз. Покчи пизы Вячеслав семьяеныз анай-атай юртазы улэ. Соослэн Галя кузпалэныз куинь нылпизы, шумпотоно нылъёссы песяйзылэсь сюрессэ бырйизы. Ирина Вячеславовна Ӟаны шоръёзо школаын директорлэн дошкольной дышетонъя воштӥсез луыса ужа. Мария нылыз Казаньын вуриськисьлы дышетскиз. Кӧня ке ар Ципьялась бытовойын ужаз, собере Нижнекамскын ужзэ азинтӥз. Нош бадӟымез пизы Пётр улэ Кизнерын, со мушкан удысэн выриз, Кизнер ёросын муш вордонъя валтӥсь зоотехник вал.

Ӟечкыласько вань дышетӥсьёсты, пенсионер дышетӥсьёсты выль дышетскон арен! Ваньдылы тазалык!

Василий Никитин,

Карек-Серма

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.