«Гырон быдтон» гурласа ортчиз

Культура юртын, школаын но нылпи садын, гурт поселениын ужасьёс праздникез ортчытонлы мыло-кыдо но кулэезъя дасяськиллям: «Гырон быдтон» праздникын огезлэсь огез тунсыко шудонъёс но вожвылъяськонъёс ортчизы, соос нокинэ мылкыдтэм ӧз кельтэ, дыр. Ёросысь самодеятельной артистъёс но кырӟанъёсынызы, эктонъёсынызы шумпоттӥзы.

Котьку сямен люкаськем куноосты, празднике лыктэм калыкез Балтась ёрослэн главаез Рамиль Нутфуллин ӟечкылаз. Со ваньзылы мылкыд кариз тупаса, эшлыко, ог-огзэс валаса улыны. Рамиль Рашитович таукарон гожтэтъёсын пусйиз Плотникова Ольга Юрьевнаез, «Хезмэт» («Азьлане») газетлэн валтӥсь редакторезлэсь дубляжъя воштӥсьсэ; Манашева Валентина Ивановнаез, Вылын Ушма гуртлэн ФАП-ысьтыз фельдшерез; Антонова Наталия Львовнаез, Покчи Лӧзя шоръёзо школаысь удмурт кылъя но литературая дышетӥсез; Перемечева Антонида Михайловнаез, Вукогуртысь клублэсь заведующийзэ; Антонов Владимир Владиславовичез, «Сурнай» обществоысь электрогазосварщикез; Никифорова Елена Михайловнаез, «Алга» обществоысь азьмынӥсь скал кыскисез.  Праздникез сӥё-дано карыса усьтыны – флагез ӝутыны — оскемын вал Антонов Владимирлы но Никифорова Еленалы.

Ужрадэ пыриськиз Татарстанысь удмуртъёслэн НКА-зылэн тӧроез Андрей Герасимов но. Со но, Балтась удмуртъёсты праздникен ӟечкыласа, шуныт кылъёсты вераз; Конькина Любовь Николаевнаез, Медведева Надежда Николаевнаез, Волков Александр Сергеевичез Таукарон гожтэтъёсын шумпоттӥз. Озьы ик Карек-Серма гуртысь клублэн заведующиезлы Никитина Зоя Михайловналы но Покчи Лӧзя Культура юртысь устолыкъя кивалтӥсезлы Петрова Галина Денисовналы Татарстанысь калыкъёслэн ассамблеязылэсь почётной грамотазэ кузьмаз. Кыл сётэмын вал Удмуртиысь вуэм гажано куноослы — «Айкай» калык кырӟанъя но эктонъя удмурт кун театрлэн кивалтӥсезлы Пётр Павлович Даниловлы но кырӟасьлы Геннадий Васильевич Кузнецовлы. Геннадий Васильевич куноосты кӧня ке кырӟанъёсыныз но шумпоттӥз.

«Гырон быдтон» мылысь-кыдысь шутэтскыны, ӵыжы-выжыосын, матысь адямиосын пумиськыны луонлык сётӥз. Удмурт-а тон, бигер-а, пор-а, ӟуч-а — пӧртэмлыкез ӧвӧл. Эшъяськон мылкыд майданын гурлам пӧртэм тунсыко шудонъёсын но, вожвылъяськонъёсын но шӧдӥськиз. Шудонъёсын та нунал узыр вал: кытчы эн учкы, котькытын шудо-вожвылъясько, арессы шоры учкытэк. Праздникын горшок пыргытӥзы, пу вандылӥзы, чорыгазы, атас кутӥзы, гынсапег куязы… Озьы ик валэн ӵошатсконъёс но луизы.

Ужрадэз Покчи Лӧзя зонаысь гуртъёс радъязы ке но, вань удмурт гуртъёс концертлэн программаяз мыло-кыдо пыриськизы — кырӟазы но эктӥзы. Праздникез шулдыртӥзы Ижкарысь вуэм артистъёс но — Алина Антонова, Альбина Беспалова, Влад Андреев, Владимир Вахрушев. Огъя вераса, ортчем «Гырон быдтонлэн» программаез узыр но пуштросъем луиз. Та сярысь ужрадэ Киров улосысь, Удмуртиысь но Марий Элысь вуэм куноос но веразы. Пӧзьтэм ӝук гинэ ӧз тырмы шуыса пусйизы…