Калык кичабонъёссэ ӧз жаля (+фоторепортаж)

Одӥг сцена вылэ со 70-лэсь уно адямиосты люказ. Концертэ пыриськизы школаосын но нылпи садъёсын ужасьёс, дышетскисьёс, гурт культура юртъёсын ужасьёс но Тюнтерын, Шор Кушкетын, Пор-Кутешын, Сала Кушкетын улӥсь егитъёс.

Ужрад вылӥ уровеньын ортчиз. Вань пыриськем коллективъёс туж умой дасяськемын вал. Клубын ужасьёс уно кужымзэс сётӥллям, концерт пуштросо мед луоз шуыса. Кунаева Лилия, Ишмурзина Татьяна, Павлова Юлия, Колоколова Елена, Камаев Виктор учкисьёсты шумпоттӥзы удмурт кырӟанъёсынызы, паймытӥзы чебересь куараосынызы но усто быдэстэменызы. Залэз туж шумпоттӥзы Шор Кушкет школаысь но нылпи садысь коллективъёслэн удмурт кылын быдэстэм калык кырӟанъёссы. Нимысьтыз пусъем потэ Шор Кушкет культура юртысь артистъёсты. Матысь гуртъёсысь егитъёсты кыскыса, соос быгатӥзы пуктыны чебересь фольклор номеръёсты, эктонъёсты но кырӟанъёсты. Ас эктонъёсынызы сцена вылын ворекъязы Тюнтер но Шор Кушкет школаосын дышетскись пиналъёс. Сцена вылын пӧртэм калыкъёслэсь эктонъёссэс огазеяса, концерт возьматӥз уно аръёс ӵоже районамы бигер, удмурт, ӟуч, пор калыкъёсысь адямиослэсь эшъяськыса улэмзэс. Котькуд выступление презентациен нуиськиз. О.Н. Исаев нимо шоръёзо Шор Кушкет но Тюнтер школалэн кужыменызы дасямын вал «Умелые руки» киужъёсын адӟытон. Залын пачыл пукись калык кичабонъёссэ ӧз жаля, та ӝытэ со шумпотыса шутэтскиз.

Концертлы вылӥ дунъет сётӥз жюриын луэм Балтась районысь исполнительной комитетэн кивалтӥсьлэн воштӥсезлэсь ужъёссэ быдэсъясь Галимуллин Ильшат Султанович.

Клубын ужасьёс узыр программа дасязы, сцена вылын сое усто возьматыны быгатӥзы. Вань пыриськем муртъёслы бадӟым тау.