Хезмәт

Каньыл улонэз утёнын

Паймисько мон соослэн каньыл мылкыдо луэмзылы, асьсэлэсь сюлэмшугъяськонъёссэс «кыре» поттытэк, адямиос азьын асьсэды возьыны быгатэмзылы. Гуртооссы но, матысь муртъёссы но ӟеч тодо, али соослы капчи ӧвӧл шуыса. Ма, кызьы уд сюлэмшугъяськы, куке тынад нуныяса-мусояса вордэм куинь пиосыд дорад ӧвӧл, палэнын, тодмотэм музъемын - Атыкаймузъемлэсь каньыл улонзэ утёнын. Но соос мӧзмемзэс...

Веранэ ӟаны гуртын улӥсь Мария Петровна но Константин Петрович Николаевъёс сярысь. Николаевъёсты котырысь гуртъёсын котькин ӟеч тодэ. Гуртысь огшоры адямиос. Константин Петрович армиысь бертэмез дырысен шофёр луыса ужа, нош Мария Петровна - дышетӥсь. Гуртын улӥсь мукет адямиос сямен ик, вазь ӵукна султыса пудозы котырын выро, собере уже дырто, ӝытсэ нош ик пудозэс утё. Вакчияк вераса, улыны тыршо, «ӵабъясько». Тыршемзылэн бервылыз но гуртооссылэн син азязы: пичигес гинэ финн корказэс сэрттыса, кык этажо вӧл-вӧл выль корка ӝутӥзы, гидъёссэс выльдӥзы, гараж лэсьтӥзы, корка пушказы каньыллыкъёс кылдытӥзы. Ваньзэ тае асьсэ кужыменызы лэсьтӥзы.
Нош Николаевъёслэн самой бадӟым узырлыксы, данъяськонзы, мон сямен, соослэн пиоссы, дыр. Гумырзылэсь зарни ӝынызэ гинэ ортчизы ке но, куинь пиоссэс бадӟым улон сюресэ поттыны вутскизы ини соос.
Бадӟым пизы Алёша педучилищеез йылпумъяз, собере кӧня ке дыр ӵоже школаын ужаз, нош али Казаньысь районъёслэн одӥгаз патрульно-постовой службаын (ППС) ужа. Алёша ини кылем арлэн декабрь толэзьысеныз Сочи городын ортчись тол Олимпиадаын порядокез утисьёс пӧлын. Кызьы гожъяз «Вечерняя Казань» газет, Татарстанысь Сочие командировкае мынӥсьёсты космонавтъёсты выллем бырйиллям. Мугорзыя но, кылэз тодэмзыя, дисциплиназыя но адӟем карымонъёсты гинэ лэзиллям отчы.
Шоретӥ пизы Дмитрий Удмурт государственной университетэз йылпумъяны гинэ вутскиз, кылем гужем сое армие басьтӥзы. Туннэ Дмитрий службазэ Пенза городын ортче. Нош покчи пизы Пётр кылем арлэн пумаз армилэн радъёсаз басьтӥськиз, Ростов улосын служить каре.
Тӥни озьы, Мария но Константин Николаевъёслэн пиоссы туннэ куинез ик каньыл улонмес утисьёслэн радазы сыло. Валамон ини, анай-атай понна та, огласянь, данъяськон мылкыд кылдытӥз ке, мукет ласянь - бадӟым сюлмаськон но.
Гажано Мария Петровна но Константин Петрович, ми оскиськом, тӥ та эскеронъёс пыр потыны одно ик кужым шедьтоды, луэм шуг-секытъёсты вормыса, ӵошен улондэс азинтоды. Инмар тӥледлы но вордэм пиостылы тазалык но шудбур гинэ мед сётоз, аръёс каньыл луыса, соослэсь ӟечсэс адӟыны, нуныкаостэс вешаны мед кылдоз тӥледлы.
Фото: http://forum.sonic-city.ru/index.php?showtopic=3130

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: