Хезмәт

Карек-Сермаысь Матвеевъёс куинь кузя «Бурнак» обществоын ужало

Котькуд семья котькуд дыре визьбуро анай-атаеныз, каньыл но ӟеч кузёосыныз, кылзӥськись нылпиосыныз данъяськем. Шумпотымон, туала дыре но сыӵе адӟем карымон, данъяськымон семьяосмы трос.

Карек-Серма гуртысь Матвеевъёслэн семьязы тросэзлы тодмо. Тодмо умой ласянь гинэ. Та семьяысь куинь кузя Матвеевъёс «Бурнак» обществоын ужало: Юрий — ветфельдшер, Владислав — пудо утись, Ирина — скал кыскись. Соосын матысенгес тодматскомы. 

Семьялэн главаез, Владислав, та гуртын, Карек-Сермаын, вордскемын. Куинь аресозь татын улыса, Матвеевъёс семьяенызы Удмуртие улыны выжо, отысен — Киров улосвылысь Бураши гуртэ (улон интызэс воштон ужен герӟаське). Нош вордскем палъёсаз Владислав берытске 1999-тӥ арын, армиын служить карыса бертэмез бере.

Пичи дырысеныз Владислав, Юрий выныз кадь ик, ужаны дышемын. Школаын дышетскыкузы ик пиос анай-атайзылы ужаны юрттӥллям. Кузпалэныз, Шор Кушкет гуртысь Ирина Николаевнаен, Владислав Карек-Сермае улыны бертэмез бере тодматске. Соку Ӟаны гуртысь ныл школаын утялскись луыса ужам, нош ачиз Владислав — Карек-Серма гуртысь фермаын. Со дырысен трос аръёс ортчемын ини. Трос секытсэ адӟыны тупа Матвеевъёслы. Одӥгез сыӵе шуг-секыт — гуртысьтызы фермазылэн «куашкамез».

— Мазэ ватонэз, гуртын фермалэн луэмез туж умой вал. Малпасько, таин котькин соглаш луоз. Ачим но фермаын ужай. Кышное но кузпалъяськеммы бере, 2008-тӥ арысен, Починка фермаын ошъёсты сюдӥз. Табере кыкнамы но Бурнакын ужаськомы. Мон куинетӥ арзэ ини пудо утисько, Ирина кык ар ӵоже скалъёсты кыске, — маде Владислав Александрович.

Владиславлэн выныз но, Юрий Александрович, гуртэ бертэмез дырысен, 2002-тӥ арысен, ассэ пӧртэм интыужъёсын эскере — нырысь ужа Карек-Сермаысь фермаын, кунянъёсты но ошъёсты сюдэ, пӧртэм ужъёсты быдэсъясь но луэ. Но тросгес со пудоен герӟаськем ужъёсын вырыны яратэм. Озьы Юрий 2015-тӥ арысен ветфельдшер луыса ужаны кутске. «Ужед ӧз ке кельшы, ужаны уг луы шуыса верало калыкын. Озьы ик вань со. Туала дыре гуртэ кыльыса фермаын, яке гурт удысысь мукет ужен ужаны котькуд адями уз быгаты. Со понна гуртлэн но ас ужедлэн зэмос патриотэз луыны кулэ. Мон, кылсярысь, аслэсьтым ужме туж яратӥсько. Пудоосын ужан — со мынам удысэ», — шуэ Юрий Александрович. Ужась семья пудо но вордэ. Матвеевъёслэн скалъёссы вань, парсьёссы но луо. Воргоронъёс ватытэк верало: пичиысен ужаны дышем бере, ужтэк пукыны соослэн сюлэмзы уг чида. Бадӟым агайзы, Сергей, туннэ нуналэ аслаз семьяеныз Киров улосвылын улэ. Анайзы, Мария Петровна, ас дыраз колхозын ужам, фермаын скал кыскем. Фермаын ик солэн быдэс гумырез но ортчем. Егит дыръяз ик, Карек-Сермаын улыкуз, гуртысь ыж фермаын ужам. Туннэ нуналэ со дано шутэтсконын, Юриен, Владиславен но солэн семьяеныз ӵош улэ. Атайзы но, Александр Серафимович, аслэсьтыз улонзэ гурт удыслы сӥзем — тыршем оператор луыса но, пудоен но трос ужам. Жаляса верано, 2013-тӥ арын атайзы кулэм. Сыӵе семьяын будыса, паймонэз но ӧвӧл, Матвеев агай-вынъёс кыкназы ик гуртэ улыны но ужаны кылизы шуыса.

— Анаен атаймы пичи дырысен ик ми понна зэмос пример луизы. Кылсярысь, мон 9-тӥ классэз йылпумъяме бере ик, нокытчы дышетскыны пырытэк, фермаын пудо утьыны кутски. Выны но егит дырысеныз фермаын ужаз. Анай-атайлэсь ужаны дышетскемысь озьы луиз, дыр, со, — валэктэ Владислав Александрович.

Зэмзэ но, сыӵе семьяосын, кудъёсаз нылпиос анай-атайзылэсь ужаса улэмзэс адӟыса будо, куке котьма ласянь соослы юрттыны дась луо, ужасьтэм нылпиосты син азе пуктыны уг луы. Владиславлы та ласянь кышноеныз но удалтэм. Ирина Николаевна ужаз но гажамон адями, гурт калык но сое ужась но тыршись кышномуртэз кадь тодэ. Анайзыезлы но котьма ласянь юрттэ. Огъя вераса, Матвеевъёслэн вань семьязы ужась. «Бурнак» обществолэн кивалтӥсез но, Рафкат Накипович Назипов, Матвеевъёсты ушъяса вераз: «Матвеевъёс сярысь верано ке, вань кадь ушъямон кылъёс соослы тупало. Ужасесь, тыршисесь соос ваньзы но. Коллективамы куинь кузя ужало — Владислав, солэн Ирина кузпалыз но Владиславлэн выныз Юрий. Сюлмысь ужзылы сётскыса ужась кузпалъёс, Владислав но Ирина, ужаны но валче ветло, ог-огзылы юртто, ужзэс радызъя быдэсъяло. Юрий но туж тыршыса ужа. Огшоры кунян сюдӥсь луыса ужаны кутскиз, туннэ нуналэ со ветфельдшер. Солэсь тыршыса ужамзэ синйылтыса, та ужез ӵектӥ. Куинетӥ арзэ выль интыужын ужа ни — ӧй жаля сое быръемелы. Пудоосты туж яратэ, ужзэ матын каре. Лумбыт, дораз но бертытэк, татын ужаны быгатэ. Ми но ас паласенымы сыӵе тыршись ужасьёсмылы юрттыны тыршиськомы ни. Тани, кылдэм ке, кема улытэк Юрийлы ужаны выль машина сётомы. Та ини солэн куинь ар понна куинетӥ машинаез луоз».

Матвеевъёслэн семьязылы юрттӥсьёс луыса кык пиоссы будо. Максим 2009-тӥ арын вордскемын, туэ 5-тӥ классэз йылпумъяз, Роман 2-тӥ классэз йылпумъяз, вордскемын 2011-тӥ арын. Пиослэн анай-атайзы, Владислав но Ирина, нылпиоссылы но ужез гажан мылкыд пыӵатыны  тыршо. «Нош кыӵе ӧнер соос вуонояз быръёзы — созэ асьсэос тодозы ни», — йылпумъя Владислав Александрович.

Вашкала дырысен гуртын тыршыса ужась, выжыысен выжые нылпиоссылы, внукъёссылы ужзэс, сям-йылолъёссэс выжтӥсь семьяосты гажаллям но дунъяллям. Туала гурт семьяос та ласянь кӧня ке поколение талэсь азьло улэм семьяослэсь номаин уг висъясько: татын ваньзы ог-огзылы юртто. Та — эшлыко но тупаса улонлэн инъетэз. Матвеевъёс — сыӵе семьялэн яркыт примерез. Мазэ веранэз, та огшоры семья, трос мукет сыӵе семьяослэсь номаин висъяськисьтэм, нокыӵе бадӟым батырлыкъёсты но соос уг лэсьто кадь, но озьы ке но та туж гажамон но синмаськымон семья, кудӥз аслэсьтыз аспӧртэмлыксэ утьыса улыны тырше.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: