Хезмәт

«Кинлы гинэ кылдэм ай сыӵе узыр песяй луыны»

2 мартэ Покчи Лӧзя гуртын улӥсь Быдӟым ожысь но тылысь ветеранлы, Кушаева Екатерина Степановналы, 90 арес тырмиз.

Таӵе бадӟым юбилеен Екатерина Степановнаез Балтась муниципальной районлэн главаез Рамиль Нутфуллин, социальной дурбасьтонъя отделлэн кивалтӥсез Алсу Гатиятуллина, доре лыктыса ужась социальной обслуживаниея отделлэн кивалтӥсез Аниса Хайруллина, Покчи Лӧзя гурт поселенилэн главаез Сергей Мухин, Балтасьысь центральной больницалэн валтӥсь врачез Газинур Давлиев но районысь журналист ӟечкыланы лыктӥзы.

Юбилярлы Россия Президентлэсь В. В. Путинлэсь нимысьтыз ӟечкыланзэ вуттӥзы, Балтась районлэн главаезлэсь, гурт поселенилэсь кузьымъёссэ сётӥзы, озьы ик Екатерина Степановналэн берпуметӥ ужам интыысьтыз представитель но юбиляр доры буш киосын ӧз лыкты.

Улын Ушма гуртын вордскыса будэм Екатерина Степановна Арчаысь медучилищеез йылпумъям. 7 ар ӵоже Соснаысь медпунктын ужам, 7 ар ик Покчи Лӧзя медпунктын но тыршем. Собере ини, 22 ар ӵоже, пенсие потытозяз, Балтасьысь амбулаториын, синъёсты эскерон кабинетын ужам. Пичи дыръяз, война аръёсы, тросэзлы нылпиослы кадь ик, Екатерина Степановналы колхозын ужаны но тупам.

Туннэ нуналэ нылызлэн Любовь Петровналэн семьяяз улӥсь Екатерина Степановна нуналлы быдэ бадӟым семьяезлэсь яратэмзэ шӧдыса улэ. Вордскем нуналэныз ӟечкыланы лыктэм куноослэн вуэмзы но со понна туж шумпотымон луэм.

— Мон понна та нуналэ зэмзэ но праздник луиз. Дорам матысь яратоно адямиосы люкаськизы, районысь но кӧня ӵошен лыктыса ӟечкылазы... Нош мар кулэ на мыным, — шумпотон мылкыдзэ ватытэк пальпотыса вераз Екатерина Степановна. — Мынам 2 пие но 1 нылы, 5 внуке но 2 внучкае, 11 правнуке но 6 правнучкае вань, — внукъёсызлы шумпотыса но соосын данъяськыса вера гажамон анай но песянай. — Тӥни мамында соос мынам! Кыӵе мон узыр песяй но ӵужанай. Кинлы гинэ кылдэм ай сыӵе узыр песяй луыны, — шуиз юбиляр.

Екатерина Степановналэн нылыз но, Любовь Петровна, пусйиз, семьязы соослэн туж быдӟым шуыса. «Ми дорын котьку сямен адями трос, куноос но ветлыса уг дугдо», — шуиз со серекъяса. — Туж шумпотыса дырзэ ортчытэ внукъёсыныз но правнукъёсыныз анаймы».

Сыӵе ик шулдыр но бадӟым семьяын, матысь адямиосызлэсь гажамзэс но яратэмзэс шӧдыса али трос шудо нуналъёслэсь вордскемзэс  адӟыны мед кылдоз Екатерина Степановналы.

 

 

 

 

 

Реклама
Нравится
Поделиться:
Реклама
Комментарии (0)
Осталось символов: