«Котькуд адямилэн сюлэмаз Инмар мед улоз»

Котькуд адями, Инмарлы ӧз оскы ке но, улон вакытаз черке вуэ. Туннэ нуналэ осконлэн кулэлыкез эшшо но юнматскиз. Черк календарьысь одӥгез быдӟым праздникез но аслаз югыт буёлъёсыныз висъяськиз.

Выль ар праздникъёс йылпумъяськемен, адямиос каллен уж ӧразы пыризы ини. Шутэтскон нуналъёс калыкез кӧня ке лябӟытӥзы ке но, православнойёслэн та вакытэ туж чурыт визян вакытсы луиз. Та нунал, ку православной дунне Иисус Христослэсь дунне вылэ лыктэмзэ сӥлы каре.

Тодады возьыны кулэ: Ымусьтон — со лулпуш ужрад, кытын инъет луо вӧсь лыдӟон, жалян мылкыд но Инмарлы таукарон.

Ымусьтон уйез котькуд адями кыӵе ке лулэз бугыртӥсь мылкыдъёсын пумита кадь. Черкъёс чеберско, нимысьтыз сэрегъёс праздникез шараяло. Асьме ёросамы но та ласянь уж кысык нуиське. 

Праздниклэн валтӥсь тодметэз — семья но адями кусыпъёс. Та нуналэ семья бадӟым узыр ӝӧк сьӧрын пумиське. Соос ог-огзылэсь малпанъёссэс, мылкыдъёссэс верало, ог-огзэс кузьымъёсын шумпотто. Ымусьтонэ куно кузя ветлыны сяме пыремын ӧвӧл ке но, лыктэм куноез сӥлы карыса ӝӧк сьӧры пукто. Вашкала дыре кунолы нимысьтыз кузьым но лыдъямын луэм вылэм. 

Ымусьтон ӝӧк вылын одно ик ӵынатэм но сылалтэм чорыг, сӥлен чырс шыд, борщ, тукмачен курег шыд но холодец луэ. Нимысьтыз интыын луэ пыжем курег яке улмоен тырем ӵӧж, кыӵе ке чорыг но луыны быгатэ. Туннэ нуналэ сиён-юон пӧлын пӧртэмез луэмен, ӝӧк эшшо но узыргес шобырске.

Вӧсьлыко нуналэз сӥлы карыса, 7 толшоре Ципья черкогуртын «Сияние Рождественской звезды» шуыса нимаськем концерт ортчиз. Татчы пыриськизы Ӟаны шоръёзо школаысь, Ципья шоръёзо школаысь, Воскресной школаысь но Ципья нылпи садысь нылпиос но черке ветлӥсьёс. Шумпотымон, быдэс зал тырмемын вал. Учкисьёс мылкыдъёссэс ӧз ватэ, сюлмысь кичабонъёссы пыриськисьёсты но бурдъятӥзы. Чебересь веранъёс, пӧртэм эктонъёс, Библиысь пуктэм сценкаос — та ваньмыз Ымусьтон праздникез узыртӥз. Покчиысен ик нылпиосты осконлы матын карон — со одӥгез валтӥсь ужпум. Вакытъёс воштӥсько ке но, адямилыко луон сярысь вунэтоно ӧвӧл. 

Нылпиослы но соослэн кивалтӥсьёссылы туж бадӟым тау вераськом сыӵе тунсыко но пуштросо концерт радъямзы понна. Нимысьтыз декорациосын, дӥськутъёсын чеберъям ужрад зэмзэ но адямиез Инмарлы матынгес кариз, дыр.
Нош азьланяз асьмелэн выль черк праздникъёсмы матэкто. Соосты дано но пуштросо ортчытон понна, огкылысь тыршыны кулэ, матысьёсты гажаса, бускельёсын эшъяськыса улыны дышетсконо.

8 толсуре Покчи Лӧзя гуртысь черкын но нимысьтыз ужрад радъяськиз. Ымусьтон праздниклы сӥзьыса татын нылпиосты люказы.

— Туж пуштросо ужрад ортчиз. Нырысь ик отец Георгий лыктэм нылпиос понна таукарон молебен лыдӟиз. Собере нылпиос Ымусьтонлы дасям кылбуръёссэс веразы, матушка Фотиньяен ӵош Ымусьтон кырӟан кырӟамы. Черке ӵем ветлӥсь нылпиос вӧсь кылъёсты, кырӟанъёсты тодо ини, мукетъёсыз кышкалогес, возьдаськогес али. Нылпиосты ӵем вайылӥд ке, соослэн сямзы но воштӥське, Инмарлэсь юрттэт сётӥське, дыр, озьы соослы. Ма, асьсэос но кыл кутонэз валаны кутско ини. Бадӟым праздникъёсы котьку ветлыны тыршиськом. Матушка Фотинья лыктэмъёслы Ымусьтон сярысь юанъёс но сётъяз. Ваньзылы туж тунсыко вал. Пичиос но, бадӟымъёс но капчи мылкыдэн бертӥзы праздникысь. Пумаз ини нылпиосты ческыт кузьымен но шумпоттӥзы, — мылкыдъёсыны люкиськизы Балтась каргуртын улӥсь егит анай Юлия Григорьева но Ӟаны гуртын улӥсь опытэн анай Марина Соломина.
Тодады возьыны кулэ: Ымусьтон — со лулпуш ужрад, кытын инъет луо вӧсь лыдӟон, жалян мылкыд но Инмарлы таукарон.

Туспуктэм: Елена Демеева