Кушкетэ дышетскыны вуылӥзы

Соосын ӵош ёрос исполкомзылэн кивалтӥсьсылэн социальной ужпумъёсъя кивоштӥсез. Лыктэмзылэн мугзы но паймымон: опытэн вошъяськон понна вуиллям вылэм асьме пала. Утёд ке, соос интернет пыр кушкетъёслэсь Татарстанысь гурт клубъёс но лулчеберет юртъёс пӧлын тужгес умойёссэ шараян вылысь ортчытӥськем конкурсэ пыриськыса вормонэ вутскемзы сярысь тодӥллям но куное лыктыса тодматскыны малпаллям.

«Нырысь соос Пестрецы ёросын луиллям, собере ми доры сюрес кутӥллям. Куноосты пумитамы удмурт калык дӥсен, вӧен-нянен но кырӟан крезьгурен. Калыкмылэн азьло улэм-вылэменыз тодматон вылысь сценаын, пӧртэм йӧскалык арбериосын чебертыса, удмурт корка радъямы, фольклор номер возьматӥмы. Клубамы кылдытэм керттӥськонъя кружоклэсь ужамзэ возьматыса дасямы киужъёсын адӟытон. Озьы ик сиён-юонъёсын ӝӧк но дасямы. Тау гуртоосылы-юрттӥсьёсылы, сыӵе умой ӝӧк радъяны быгатӥмы. Со ӝӧк сьӧрын ик бератаз куноосты но куноямы», — шуэ Вуж Кушкет клублэн кивалтӥсез Светлана Щербакова.

Палэнысь вуэм куноосты Кушкет клублэн ужамез зэмзэ но синмаськытэм. Тазьы но ужаны луэ вылэм шуыса йылпумъян лэсьтӥллям соос. Лулчеберет удысын ужасьёсты паймытэм самодеятельной коллективзылэн бадӟым (коллективын 22 мурт лыдъяське), пӧртэм арлыдъем (аресоос но, егитъёс но, 6 кузя нылпиос но вань пӧлазы) луэмез но воргоронъёслэн мыло-кыдо пыриськемзы. Таӵе эшлыко, туж тупаса, ог-огзылы юрттыса ужамзы адӟем карымон шуыса но пусйиллям. Тӥни озьы, табере Ивановской улосвылын но асьме Кушкет клублэсь адӟем карыса ужасьёс луозы ини шуыса шумпотыны быгатӥськом.