Кузьма Иванович Яковлевлы сӥзьыса

Ожмаськон...1941-тӥ-1945-тӥ аръёс бадӟым но мур яра кельтӥзы быдэс шаермылы, котькуд семьялы. Син азе пуктыны ик секыт, кызьы пичиесь гинэ гуртъёсысь но егитъёс, кышномуртъёс, пиосмуртъёс ожмаськыны кошкизы. Кошкизы но ваньзы ӧз берытске. Верантэм мур куректон вайиз со кышномуртъёслы, анаймуртъёслы. Угось со понна-а нылпи ваемын вал? Со понна-а кузпалъяськемын вал? Кӧня нылпиос анай-атайтэк кылемын. Кӧня пиосмуртъёс берпумзэ шокчыса, тушмонэз вийыны султӥзы. Мар меда соослэн йыразы вал соку? Шаермес мозмытон? Тушмонэз пезьгытон? Яке кышноеныз, анаеныз но нылпиосыныз меда ас понназ келяськон? Нош кӧня вал сютэм уйёс но нуналъёс...

Туэ Вормон Нуналлы 75 ар тырме! Ӧжыт кылемын ни ветеранъёс но, со дырысь нылпиос но. Озьы ке но аръёс ортчыса, эшшо но золгес гажаськом кадь асьмеды утисьёсты. Мургес но тросгес тодыны тыршиськом пересь песятай-песянайёсмы, ӵужанай-ӵужатайёсмы сярысь.

Яковлев Кузьма Иванович вордӥськиз 20-тӥ коньывуонэ 1920-тӥ арын Кисаль (Сала Кушкет) гуртын. Семьязы пичи ӧй вал, ӵошен ужазы, ог-огзылы юрттыса улӥзы. Кызь арес тырмем бераз, 1940-тӥ арын, Кузьмаез Атыкай музъемез утьыны военкомат ыстэ Новороссийск каре. Татысен сое 1941-тӥ арын, ожмаськон кутскем бере, келяло Сталинградэ, Кавказэ. Тазьы кутске солэн кузь ожмаськон сюресэз.

Младшой сержант Яковлев фронтын ассэ котьку но кужмо но ӟӥбыт воргоронэн возьматэм, фронтын наводчик луыса тыршем. Сётэм заданизэ асьсэлы ӧжыт ыштонъёсын котьку но дыраз но интыяз быдэсъям. Угось, котькуд боевой снарядэн кулэ вал шонерак тушмонэз быдтыны. Наградной листаз но батареялэн командирез Москалёв гожтэм: «Участвуя в боях на фронте борьбы с немецкими захватчиками при прорыве Варшавского укреплённого района, товарищ Яковлев показал себя отважным, инициативным. Знающий свою специальность воин. 10.09.1944 вел огонь по танкам в районе высоты 123.1., благодаря точным наводкам, снаряды рвались прямо у цели. Кроме того, огнём своего оружия разрушил бетонированный НИ противника. Товарищ Яковлев участвовал в боях у г. Рогалев. 24 июня 1944 г. разрушил НИ противника, подавил огнём 2-й батарей противника, так же на юго-западе г. Ковель подавил огнём 3-й артиллерийский батарей противника, рассеял узел сопротивления и частично уничтожил танки и оружия противника.» Таӵе сямъёсыз но ужъёсыз понна Яковлев Кузьма Иванович трос медалъёсын но орденъёсын пусъемын.

Со - «За отвагу», «За взятие Берлина», «За победу над Германией», «За оборону Кавказа», «30 лет Советской Армии», «20 лет Вооружённым силам» медальёс но  lll степенё «Слава», ll степенё «Отечественной война» орденъёс.

Войнаез Кузьма Иванович пыр потӥз... Берлинозь вуиз... Ожмаськон бырем бере эшшо одӥг ар служба нуиз на. Кыӵе шимес суредъёсты со адӟиз, дыр, та ожмаськон сюресаз, кӧня вал, дыр, ыштонъёсыз но. Кӧня пол кынмылӥз, дыр, кезьыт окопъёсын, кыӵе малпанъёсын тодаз вайылӥз меда семьязэ но гуртсэ? Зэм, секыт адӟон палэнтӥз ӧз кошкы, ымныраз дырызлэсь вазь трос кисыриос пуксизы, пурысьтаз но.

1946-тӥ арын Кузьма Иванович бертэ гуртаз. Кузпалъяське Чибай (Иванова) Татьянаен, ӵошен соос сизьым нылпи вордо: вить пиос но кык нылъёс. Бадӟым семьяез сюдыны но дӥсяны но кулэ вал, соин но Кузьма но Татьяна ноку но ужлэсь ӧз кышкалэ. Кузьмаез «Новая деревня» колхозэ бригадирен ужаны пуктӥзы. Ђытъёсы уж бере кузпалэныз гын сапег погыллязы. Гын сапегъёссы быдэс ёросэ тодмоесь вылӥллям, трос гинэ бигеръёс, пе, басьяло вал. Со сяна, быгатӥсь киосыныз ку но посӥз, шуныт пась (шуба) вурылӥз. Эшшо ке чечы зынзы но трос адямиосты бордаз кыскылӥз.

Котькуд паласен учкы но, котыр адӟымон но учкымон вылэм Кузьма Иванович Яковлев — милям атаймы, бабаймы но ӵужатаймы. Сӥлы карымон, данъяськымон но утьымон.

Тау шуиськом ассэ жалятэк, кышкатэк ожмаськемез понна. Туэ Кузьма Ивановичлы 100 арес тырмысал. Солэн кужыменыз но вуиз Атыкай музъем выламы Вормон Нунал! Ми данъяськиськом но утиськом нимзэ!!!

Яковлев Кузьма Ивановичлэн нылпиосыз, кенъёсыз, эмеспиосыз но нунокъёсыз.