Кыктоос — кык полэс шумпотон

Макем соос огкадесь, паймымон! Кыктоослы ӵемысь адямиос таӵе юанъёсын вазисько: «Кызьы тӥледыз адямиос тодмало?», «Тунсыко-а со — кыктоос луыны?», «Кудды бен бадӟымгес?». Ӵапак таӵе юанъёслы но пичи дырысенызы валэктон сётоно луиз Ярак-Чурмаысь кыктоослы — Надежда но Любовь Петроваослы. Ма, Петрова — со нылъёслэн картъёссылэсь басьтэм фамилиоссы... Малы бен та фамилиоссы но огкадесь шуиськоды-а? Валэктонэз капчи: нылъёс агаен вынъёслы бызиллям!

Капчи-а улыны, куке тынад кыктоед вань — та сярысь нылъёсын интервьюын.

— Нылъёс, вералэ ай, кыӵегес со — кыкто сузэрен улыны? Кесем-басьтэм ачид кадь адямилэн котьку тон вӧзын луэмез уг акыльты-а? Пичи дырысеныды ик тӥ шоры паймыса учкиллям, луоз. Оло, кин ке вожъяськем но, дыр?

Надежда: Тодӥськод-а, кыӵе со умой, куке тынад кыкто сузэред вань, уката ик Люба кадь йӧно ке со. Мон туж шумпотӥсько, со мынам вань шуыса. Туж бадӟым тау милям анай-атаймылы, ми кыкнамы шуыса. Мон Любатэк аслэсьтым улонме син азям но уг пуктӥськы... Пичи дырысен ик озьы вал. Кин ке мае ке сӧриз, тӥяз ке — со Люба. Пичи дыръямы милемлы котьку огкадь дӥськут басьтыло вал. Тани талэн аслаз бадӟым «плюсэз» вань — мынам дӥськутэн мар ке луиз ке, Любалэсьсэ дӥсясько но ужез быриз. Озьы вошъясько вал но, котькинлы оскытыса верасько вал, та мынам дӥськутэ шуыса. Ой, мынам мыскинь Любае... Котькуд нылпиослэн кадь ик милям но луыло вал керетонъёс, жугиськонъёс. Нош али дыре ми сузэреным самой матысь эшъёс, мон солы гинэ аслэсьтым пушдуннеме оскыны быгатӥсько. Паймисьёсыз луиллям, дыр, но вожъяськисьёсыз сярысь кызьы шуыны уг тодӥськы... ӧй вал кадь. «Кыӵе тӥледлы удалтэм, мыным но кыкто кулэ» шуыса, верасьёс луизы.  Нош ми Любаен серекъяса вераллямы: «Мынэсьтымзэ басьты».

Любовь: Анай-атаймы понна но, Надяен мон понна но милям кык луэммы — туж бадӟым шумпотон. Анаймы милемын секыто луыкуз, вайытозяз ик одӥг нылпи гинэ витем вылэм, нош ми кык кузя шуыса ваёно нуналаз гинэ тодэм... Витьымтэ шорысь кык полэс шумпотон! Апаелы котьку но верасько: «Кыӵе мыным удалтӥз, тон мынам вань шуыса!». Адямиос котьку паймыса учкылӥзы ми шоры: ми ялан огкадь дӥськутъёсын ветлӥмы. Соку уг поты вал озьы дӥсяськыса ветлэммы, ӧз кельшы со милемлы, али нош со шоры серемен учкиськомы ни…

Нылъёсын бадӟым интервьюез газетмылэн 16-тӥ номерысьтыз лыдӟыны быгатоды.