Хезмәт

Кытын вордскид, отын ик кулэ луид

Туннэ тросэз гуртын вордскем но будэм егитъёс, бадӟым улоназы вамыштыкузы, гурт улонлэсь палэнтӥсько.

Ярак-Чурмаысь Петровъёслэн улон-вылонзы сярысь

Соосты валаны но луэ кадь: городын уже интыяськыны, буш дырдэ ортчытыны луонлыкъёс тросгес. Соин, дыр, асьсэды гурт удыслы сӥзем адямиос эшшо но гажамонгес луо — соос бадӟым уксё сьӧры уйиськытэк, гурт улонлэсь вань секытъёссэ но шумпотонъёссэ тодыса, вордскем палъёссылы оскымон адямиос луыса кылё. Тани та статьяелэн героез но шуэ:

— Ма вань отын, городын? Мар карод отын? Тужгес но али, туала времае, куке коронавирусэн сэрен карантин но самоизоляция режим ялэмын. Ми гуртын, эсьмаса, пудо доры ке но потаны, гидкуазьын чылкыт омырен шоканы быгатӥськомы, — шуэ Валерий Петров.

Валерий Николаевич Петров огшоры гинэ уг вера та кылъёсты. Воргорон гурт улонлэсь аспӧртэмлыкъёссэ туж умой тодэ но вала.

Ярак-Чурма гуртын вордскыса, вордскем гуртысьтыз, Покчи Лӧзя но Балтась школаосын дышетскыса 10-тӥ классэ йылпумъямез бере, со дышетсконзэ Балтасьын ик азьланьтэ — каменщиклэсь ӧнерзэ басьтэ. Но вордскем палъёсыныз макем люкиськемез ӧз поты ке но солэн, армие кошконо луэ егит пилы. Кык ар ӵоже Германиын служить каре.

— Армиысь 1984-тӥ арын бертӥ. Нош ини 1985-тӥ арысен кызьы колхозэ ужаны интыяськи, али ке но колхозын ик тыршисько, — маде Валерий Николаевич.

Дас одӥг ар ӵоже «Алга» обществоын тракторист луыса ужамез бере, куара кылзӥсь ужасез 1996-тӥ арын бригадирлы тодмосто. Со дырысен ужан интызэ Валерий Николаевич уг вошты ни. Тросгес будосбудэтон (растениеводство) удысын тыршисько, пе, со. Тани туэ ужам стажез но 35 ар луэ ни солэн. Но жадемезлы ӝожтӥськытэк, нуналысь нуналэ аслэсьтыз ужзэ быдэстэ со. Тыршись пиосмуртэз гуртоосыз но туж ушъяло: «Ачиз но адӟем карымон пиосмурт, кышноез но, семьяез но». Нош ачиз Валерий Николаевич вакчияк шуэ: «Гурт улон сюлэмедъя ке, шумпотыса улыны луэ. Гуртоосыныд ӟеч кусып возьыны быгатӥд ке, семьяяд ваньмыз умой луиз ке, сӧл-таза луид ке — со ачиз ма быдӟа шумпотон». Та кылъёсыныз соглаш луэ Валерий Николаевичлэн кышноез но, Любовь Васильевна. Кузпалзэ кыдёкысь ик шедьтэм героймы — Киров улосвылысь Малмыж ёросысь (кылдэмез со луэм, дыр). Вордскем гуртаз улыкуз ик пудо-живот утьыны дышетскем Любовь Васильевна картлы кошкем бераз но улонзэ гурт удыслы сӥзе — со но «Алга» обществоын тырше, фермаын ужа. Та нылкышноез ужтэк син азе пуктыны но уг луы. Со зэмос кузё кышно: юртын чылкытлык кылдытыны но, ческыт ӝӧк дасяны но быгатэ. Сяськаосын вырыны, бакчаяз утялскыны но чеберлык кылдытыны яратэ вылэм со.

«Гурт улэп ӧвӧл ини» шуисьёслы Петровъёслэсь семьязэс примере пуктыса возьматоно кадь. Кузпалъёслэсь ог-огзэс, нылпиоссэс, гуртооссэс гажаса улэмзэс, гуртооссылы но матысьёссылы котьку юрттыны дась луэмзэс лыдэ басьтыса, вераны луэ: куке гуртын таӵе адӟем карымон адямиос уло, гурт улоз на. Вашкала ӵыжы-выжыоссылэсь сям-йылолъёссэс азинтыса, соос улонзэс гуртлы, музъем удыслы сӥзё. Музъемлы яратонзы Петровъёслэн пичиысен луэм. Валерий Николаевич син азяз пуктыны но уг быгаты, кызьы гуртын музъемын ужатэк но пудо-живот утьытэк улыны луэ. «Туннэ нуналэ пудомы туж уно ӧвӧл ке но ини — куинь скал, парсьёс но кӧня ке мукет пудо — со сяна мушъёсты но вордӥськом, — шуэ семьялэн главаез. — Адями ужлэсь уг кышка ке, со ноку но сютэм уз кыльы. Тыршид ке, гуртын ужаны но, улыны но луэ, — ватсаса вера Валерий Николаевич.

Валче улэм аръёссы ӵоже Петровъёслэн куинь пиналъёссы вордско — Светлана, Оксана но Сергей. Туннэ нуналэ нылпиоссы асьсэ семьяосынызы уло ини. Светлана — Балтасьын. Оксана но Сергей — Казаньын. Нылпиоссы анай-атайёссылы вить внукъёсты кузьмаллям ини. Соос ӵемысь Ярак-Чурмае куное бертыло. Нош татын соосты котьку шумпотыса пумита анайзы, Любовь Васильевна, атайзы, Валерий Николаевич, песянайзы, Мария Алексеевна но апайзы, Галина Николаевна. Сыӵе бадӟым семьяын улон но — геройёсмы понна туж бадӟым шумпотон луэ. Азьпалан но соослы куспазы ӟеч кусыпъёсты утьыса, гуртооссылы но матысьёссылы юн пыкет луыса, нылпиоссылы но внукъёссылы оскон луыса улыны мед кылдоз.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: