Кызьы ортчизы «Шошма моннары» фестивальлэн адӟытонъёсыз но мастер-классъёсыз

Нырысь ик, шонер луоз, дыр, гуртъёсысь калыклы бадӟым тау кылъёс вераны. Кыӵе данъяськымон возьматӥзы соос асьсэды! Котькуд пыриськем адями валтӥсь ужзэ быдэстэмез сяна, фестивале пыриськон понна ӝытъёссэ репетициосы ветлӥз, адӟытонъёслы арбериос люказ но мастер-классъёслы дасяськиз.

Сыӵе усто, котьмалы быгатӥсь адямиос луэмен, ёросмы азьлань вамыштэ. 

Семьялэн арез луыса, фестивальлэн но валтӥсь малпанэз семьяен герӟаськемын вал. Татын семьялэсь кулэлыксэ но воштонтэм луэмзэ данъязы. Туннэ нуналэ семья — со мерлыкез утись но юнматӥсь инты. Котькуд кужмо адями аслэсьтыз нырысь кужымзэ семьяысь басьтэ. Нылпи но нырысетӥ вамышъёссэ семьяын лэсьтэ, нырысетӥ кылъёссэ но семья пушкын вера. Со поколениысен поколение выжись тодмет. 

Висъяны луэ на кызьы лулчеберетъя ёзэтэн кивалтӥсь — Ильназ Петров — котькуд поселенилэн ужрадаз ветлӥз, котькуд пыриськисьлы ушъямон кылъёс вераз. Таӵе кивалтӥсьёс, зэмзэ но, асьме ёросмы понна туж кулэ. Огшоры калык понна висись но сюлмаськись кивалтӥсьёс интыужазы кема уг возисько ке но, ёрослэн улоназ пыртэм люкетсы дунъянтэм луэ.

Огъя та фестивале 17 гурт поселение но 1 город поселение пыриськизы. Валтӥсь вожвылъяськон гурт поселениос понна ӵектэмын бере, Балтась город поселение инты понна ӧз нюръяськы.

Вожвылъяськонлэн положениезъя котькуд поселение адӟытон, мастер-класс, концерт программа дасяны кулэ вал. Та ужпумез котькуд поселение вылӥ уровеньын быдэстӥз.

Адӟытон
Адямилэсь улон интызэ ачиз адями гинэ кылдытэ. Инкуазь, коркаос, ужрадъёс пыр кыдёкысь калык но интыен тунсыкъяськыны кутске. Та понна гуртъёсын мерлыко сетьёс зол ужаны кулэ. Асьме ёросын котькуд калык, котькуд гурт кыӵе ке аспӧртэмлыкъёсыныз висъяське ук. Кылсярысь, Вуж Турья но Покчи Лӧзя гуртъёс асьсэлэн гожъяськисьёсынызы — Николай Никифоровен но Григорий Медведевен — тодмо, Сырья гуртэз «Cырья зоутъёс» самодеятельной ансамбльтэк син азе пуктыны уг луы, Вуж Кушкет гуртын Россилэн Героез — Олег Исаев но Удмуртиысь «Айкай» кун театрлэн кивалтӥсез — Пётр Данилов вордӥськизы, мукет гуртъёс но бере уг кылё: котькытын вань аслаз героез, аслаз лулчеберетэз но аслаз «изюминкаез». Гурт калык уг кӧлы, соос быдэс шаерлэсь инъетсэ кылдыто. «Гуртъёс городъёсты сюдо» — таӵе тодмо веран вань калыкын, со огшоры гинэ верамын ӧвӧл, зэмзэ но, гурт калык ас тыршеменыз но юн ужаменыз азьпал радэ потэ. 

Нимысьтыз тае ик висъяны тыршизы гуртъёс асьсэлэн адӟытонъёсазы. Мар гинэ отын ӵектэмын ӧй вал: суредъёс, керттэм арбериос, дурем сяськаос, чеберманъёс, дӥськут, ньӧрлэсь кутам арбериос... Паймод, ма гинэ уг быгаты лэсьтыны гурт калык. Татын нимысьтыз интые пуктысал Сизнер гуртысь калыкез. Соослэн нимысьтыз лулчеберетъя юртсы ӧвӧл ке но, поселенизы понна соос туж бадӟым уж лэсьтӥзы: зэмос удмурт корка сэрег радъязы. Татын нуны веттан кӧкы но, сандык но, ӵушконъёс но, вашкала выждэраос но, сиён-юон ӝӧк но — ваньмыз удмурт дуннелэcь валтӥсь шӧмзэ поттӥз. 

Адӟытонъёс, зэмзэ но, туж пуштросо луизы. Кезьыт брусчаткаен вӧлдэм интыын шуныт композициос вордӥськизы. 

Мастер-класс
Калык понна та уж вылен уг лыдъяськы ке но, тросэз понна та аспӧртэмлыко ӧрен лыдъяське. Татын котькуд мылкыд карись адями аслэсьтыз быгатонлыксэ эскерыны-шараяны быгатэ. 

Мастер-классъёс сярысь верано ке, соос татын пӧртэм но тунсыко луизы. Чеберман тӥрлык лэсьтон, суредаськон, керттӥськон, веник керттон, кутаськон — ваньмыз вашкала дырысен калык пӧлын вӧлмем ужъёс. Киужъёсын бадӟымъёс гинэ ӧз выре, пичиос но шумпотыса пыриськизы, асьсэлы синпельлы кузьымъёс лэсьтӥзы. 

Аслэсьтыз вылӥ быгатонлыкъёссэ татын шараяз Янгул гурт поселениын улӥсь Наталья Уськеева. Со калыкез точкаосын суредаськон амалэн тодматӥз. Кӧня ке гинэ шонтыса калык азе ӵыдонтэм суредъёс пуксизы. Усто быгатонлыкъёсыз пиналъёс понна туж тунсыко луизы, бер ӝытозь нылпиос Наталья Михайловна дорысь ӧз кошке, концерт программа бырытозь дораз улӥзы. 

Лыктэм куноос понна вань мастер-классъёс нимысьтыз дунне кадь потӥз. «Мар гинэ уг быгаты асьме калык», — таӵе веран котькуд поселенилэн ужрадаз кылӥськиз.