Ми понна самой устоосыз

Котькин понна аслаз анаез матын но дуно луэ. Аслад анаед котьку самой чеберез, самой визьмоез, самой яратоноез… Со — валтӥсь кенешчиед. Кайгу-куректонэд ке луэ, анаед тынэсьтыд но тросгес тон понна сюлмаське, шумпотӥськод ке — анайлэн сюлмыз бадӟым пальпотонэн пачылме. Сыӵе со — анай. Милям анаймы аслаз нылпиосыз но матысьёсыз понна гинэ ӧвӧл, трос мукет адямиос понна но — утёно муртъёсыз понна — сюлмаське. Соин газет лыдӟисьёсты но анаенымы тодматэммы потэ. Ӵужапаймы Ольга сярысь но мадеммы потэ.

Сидорова Нина Тихоновна но Ольга Тихоновна вордскизы 1971-тӥ арын Вукогуртысь огшоры семьяын. Анайзы но атайзы, Андреевъёс Тихон Ильич но Антонида Николаевна, колхозын ужазы. Семьяязы соос вить кузя нылпиос луиллям. Анаймы ӵемысь тодаз вае:

— Пичи дыръя туж шулдыр вал. Урамысь пырыса но ум вуиське вал ми, гужем гинэ ӧвӧл, толалтэ но. Нискыланы, куасэн ветлыны яратылӥмы. Песяйтэк, бабайтэк будӥмы, кызьы милемыз анай утем но пыд йыламы султытэм меда, али но паймисько. Ми ведь кыктоос. Али кадь корка газ, ву, пырымтэ вал. Анай (жаляса вераны кулэ, со 85 арессэ тырмытыса кылем арын кулӥз — ред.) вера вал, ву дуре гылъяськыны ветлӥсько вал шуыса.  Бускельысь Паши песяй яке Октя апай кылё вал милемын. Ми бере вордскем Галя нимо сузэрмы но вань вал. Ми куиньнамы огазе будӥмы, апаен агаймы школаын дышетско вал ини. Атай котьку колхоз ужын, бер гинэ бертэ вал.

Ципья школаез йылпумъямзы бере, анай но Оля ӵужапай ӵошен Ижкаре дышетскыны мыно. Экономикая факультетэ пырыны баллъёссы тырмымтэысь, нылъёс визьнодасьлэсь ӧнерзэ басьтон понна одӥг аръем курсъёсты ортчо. Городын улэмзы потымтэен, гуртэ берто. Кыкназы ик 1991-тӥ арын семья кылдыто. Анаймы картлы кошке аслаз вордскем гуртаз ик Павел нимо пилы. Атаенымы соос пинал дырысенызы тодмо луиллям, валче шудыса но ветлӥллям, озьы ик ӵош луиллям. 1992-тӥ арын бадӟым нылзы, Людмила, 1993-тӥ арын Анжела нылзы, 1998-тӥ арын куинетӥ нылзы Настя вордске. Анаен атай пи витиллям вылэм, но Инмар соослы нылъёсты гинэ сётэм. Кык нылъёсыз картлы кошкемын ини, кыкназы ик Сала Кушкет гуртэ. Покчи нылзы Казаньын медсестра луыса ужа. Нош Оля ӵужапаймылэн тани пиос гинэ.

Анай нылъёсызлы туж шумпотэ. Туннэ нуналэ солэн кык внукез но кык внучкаез вань ини. Ми но анай-атай доры куное бертылыны тыршиськомы.

Анаймы 1990-2001-тӥ аръёсы Ципья гуртысь нылпи садын завхоз луыса ужа. 2003-тӥ арысен но туннэ нуналозь со «Наз» центрын тырше. Ужез солэн туж кылкутымон, сабырлыкез но каньыллыкез кулэ каре. Клиентъёсыныз огъя кыл шедьтыса, даллашытэк-керетытэк ужзэ рос-прос быдэстэ, вань кутскем ужзэ пумаз-йылаз вуттэ. Куинь гуртын утёно муртъёсыз вань анайлэн — Сырьяын (1-тӥ группаысь инвалид Маня апай), Вукогуртын (Галя апай), кылемъёсыз Ципьяын. Али яра машина нуллыны правоез вань, мар кулэ, ачиз машинае пуксьыса нуллэ-вае, больницае но ачиз нуллэ. «Яра али тон вань», шуо солы утёно муртъёсыз. Социальной удысын ужасьлэн ужез капчи ӧвӧл. Сыӵе ужасьлы небыт, каньыл, усьтэм сюлэмо, адямиосты валась но чидась луыны быгатыны кулэ. Милям анаймы сыӵе адямиос пӧлысь. Туннэ нуналэ со тямыс адямиосты уте. Анай шуэ:

— Утёно адямиосы ваньзы но монэ асьсэлэсь нылзэс кадь витё. Соос доры лыктыса юртсэс гинэ утялтоно ӧвӧл, сиён-юон, эмъюмъёсты но нуллоно, бакча-садъёссэс чылкыт возёно. Со сяна, оген улӥсьёс туж ярато вераськыны, соосты кылзӥськыны быгатыны но кулэ, куддыръя кенеш сётыны но тупа. А ведь мӧйыослэн сямзы но ваньзылэн капчи ӧвӧл… Тросэзлы газ, ву пыртыны, канализация радъяны тырши.

Та ужын 18 ар тырше ини анаймы. Аслэсьтыз ужзэ со туж яратэ. Туннэ нуналэ огъя 30 ар стажез вань ини солэн.

Ноку но азьтэмъяськемез ӧй вал анаймылэн. Куинь нылпиосыз вордскем бере ини заочно юридической факультетэ но дышетскыны пыриз. Анай котьку тау каре атайлы, со — солэн валтӥсь юрттӥсез, визь-кенеш сётӥсез. Ужано коллективаз но анаймес гажало.

Туннэ нуналэ юртамы куинь ӵошен уло — анай, атай но ӵужатаймы. Ӵужатаймылы 86 арес тырмиз ини, мед улоз на али, гумырез кузь мед луоз.

Оля ӵужапаймы но туж ужась но тыршись кышномурт. Со «Борнак» колхозлэн фермаяз тырше, ужзы сменаен радъямын. 50 скалъёсты кыско. Солэн но ужез капчи ӧвӧл, вазь ӵукна ик султыса ужаны мыно, яра али Турьяысен (ӵужапай аслаз семьяеныз отын улэ) Бурнаке вуытозь ужасьёсты машинаен нулло. Оля ӵужапаймы ӝожтӥськисьёс пӧлысь ӧвӧл. Ужез секыт ке но, мукет интыын ассэ утьыны малпанъёсыз ӧвӧл. Со но куамын ар стаженыз ушъяськыны быгатэ ини.

Тӥни сыӵе милям анаймы но ӵужапаймы. Огласянь учконо ке, соос мукет нылкышноослэсь номаин но уг висъясько кадь. Нош мукет ласянь, ми понна, атаймы, матысь ӵыжы-выжыосмы понна соос самой йӧно анайёс, самой умой кенъёс но кышноос, самой усто кышномуртъёс луо.

Нылъёсыд Людмила, Анжелика, Анастасия.